༄༅། །ཕྱི་ལོ་ ༢༠༢༢ ཟླ་བ་ ༢ ཚེས་ ༡༠ ཉིན་འཕགས་བོད་འབྲེལ་མཐུད་ལས་ཁང་གི་འགན་འཛིན་འཇིགས་མེད་ཚུལ་ཁྲིམས་ལགས་ཀྱིས་ཡར་ཀླུང་གཙང་པོའི་ཉེ་འགྲམ་དུ་བོད་རང་བཙན་ཨ་སམ་གྱི་འབོད་སྒྲ་གཙོས་པའི་བོད་དོན་རྒྱབ་སྐྱོར་ཚོགས་པ་ཁག་གི་ཚོགས་མི་ལྷན་ཚོགས་འདུ་བསྐོང་ཚོགས་གནང་ཡོད།

དེ་ཡང་ཚོགས་འདུའི་ཐོག་རྒྱ་གར་བོད་དོན་རྒྱབ་སྐྱོར་ཚོགས་པའི་ཨ་སམ་དང་མེ་གྷཱ་ལཡ་ས་གནས་འབྲེལ་མཐུད་པ་པ་སྐུ་ཞབས་སོམ་ཡ་དིབ་དཏྟ་ (Soumyadeep Datta) ལགས་དང་། ཨ་སམ་འཕགས་བོད་འབྲེལ་མཐུད་ཚོགས་པའི་ཚོགས་གཙོ་ལྕམ་ཨུར་བ་ཤི་མ་ཧན་ཏ་ (Urbashi Mahanta) ལགས། རྩོམ་པ་པོ་དང་གསར་འགོད་པ་རྒན་པ་སྐུ་ཞབས་རུ་པམ་བ་རུ་ཧ་ (Rupam Barua) ལགས། གསར་འགོད་པ་རྒན་པ་སྐུ་ཞབས་ན་ཝ་ཋ་ཀུ་རི་ (Nava Thakuria) ལགས། བོད་རང་བཙན་ཨ་སམ་གྱི་འབོད་སྒྲའི་འབྲེལ་མཐུད་པ་ལྕམ་ནོ་ཝ་ནི་ཏ་ཤར་མ་ (Novanita Sharma) ལགས། གཞན་ཡང་བོད་དོན་རྒྱབ་སྐྱོར་བ་གང་ཟག་སྒེར་བཅས་མཉམ་ཞུགས་གནང་ཡོད། སྐབས་དེར་བོད་རང་བཙན་ཨ་སམ་གྱི་འབོད་སྒྲ་ཞེས་པའི་ཚོགས་པས་ཨིན་ཡིག་དང་ཨ་སམ་སྐད་གཉིས་ཐོག་གཙང་པོ། སེང་། ཡར་ཀླུང་གཙང་པོ། (Tsangpo – Siang – Brahmaputra) ཞེས་པའི་ཚགས་ཤོག་དབུ་འབྱེད་གནང་ཡོད་ཅིང་། ཚགས་ཤོག་དེའི་ནང་རྒྱ་གར་བྱང་ཤར་མངའ་སྡེ་ཁག་གི་ནང་བོད་ཀྱི་རང་དབང་ལས་འགུལ་དང་འབྲེལ་བའི་གོ་རྟོགས་དང་ལས་འགུལ་ཇི་སྤེལ་རྣམས་འགོད་ཀྱི་ཡོད་འདུག ཚོོགས་པའི་འབྲེལ་མཐུད་པས་གསུངས་པ་ལྟར་ན། ཚགས་ཤོག་དེས་མ་འོངས་པར་ཨ་སམ་གྱིས་གཙོས་རྒྱ་གར་མི་མང་རྣམས་བོད་རང་དབང་ལས་འགུལ་དང་འབྲེལ་ཐག་ཇེ་ཉེར་གཏོང་ངེས་རེད་ཅེས་གསུངས།

གཞན་ཡང་སྐབས་དེར་གསར་འགོད་པ་རྒན་པ་སྐུ་ཞབས་རུ་པམ་བ་རུ་ཧ་ལགས་ཀྱིས་ཡུན་རིང་བོད་དོན་ཐོག་ཕྱག་ལས་གནང་བར་ཆེ་བསྟོད་གནང་ཡོད། དེའི་རྗེས་ཚོགས་མི་རྣམས་ཀྱིས་རྒྱ་གར་བྱང་ཤར་ཁུལ་དུ་བོད་རང་དབང་ལས་འགུལ་ཤུགས་ཆེ་རུ་གཏོང་རྒྱུར་འཆར་གཞི་དང་ལས་འགུལ་བཀོད་སྒྲིག་གནང་ཕྱོགས་ཐད་བགྲོ་གླེང་དང་། ཡར་ཀླུང་གཙང་པོའི་གལ་གནད་གོ་རྟོགས་སྤེལ་ཆེད་ཨ་རུ་ན་ཅལ་མངའ་སྡེའི་གྷི་ལིང་ནས་ཨ་སམ་གྱི་དུབ་རི་བར་རྐང་འཁོར་འགྲུལ་བཞུད་ལས་འགུལ་སྤེལ་ཡོད་པ་བཅས།།