༄༅། །ལྡི་ལི་སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས་ཀྱིས་ཕྱི་ལོ་ ༢༠༢༢ ཟླ་བ་ ༡ ཚེས་ ༣༡ ཉིན་རྒྱ་གར་གྲོས་ཚོགས་གོང་མའི་འཐུས་མི་དང་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་སུ་ཇཱིཏ་ཀུ་མཱར་ (Shri Sujeet Kumar) ལགས་དང་མཇལ་འཕྲད་གནང་ཡོད།

དེ་ཡང་སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས་ཀྱིས་སྐུ་ཞབས་སུ་ཇཱིཏ་ཀུ་མཱར་ལགས་ལ་དཀར་གཙང་མཇལ་དར་དང་བཅས་དགའ་བསུ་དང་ཁོང་ཉིད་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོར་བསྐོ་གཞག་བྱུང་བར་འཚམས་འདྲི་ཞུས་ཤིང་། དེ་ལྟར་སྐུ་ཞབས་སུ་ཇཱིཏ་ཀུ་མཱར་ལགས་ཀྱིས་ཀྱང་སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས་ལ་གོས་ཟན་གནང་སྟེ་འཚམས་འདྲི་གནང་ཡོད་པ་རེད། 

སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས་ཀྱིས་སྐུ་ཞབས་སུ་ཇཱིཏ་ཀུ་མཱར་ལགས་སུ་ད་ལྟའི་བོད་ནང་གི་གནས་སྟངས་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག བོད་མིའི་སྒྲིག་འཛུགས། དབུ་མའི་ལམ་གྱི་སྐོར་ངོ་སྤྲོད་དང་། ཕྱོགས་མཚུངས་ལྡི་ལིར་རྟེན་གཞི་བྱས་པའི་སྐུ་ཚབ་དོན་གཅོད་ཁང་དང་དེའི་ལས་དོན་གནང་ཕྱོགས། དེ་མ་ཟད་འདི་ལོར་འཚོགས་འཆར་ཡོད་པའི་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུའི་སྐོར་བཅས་ངོ་སྤྲོད་གནང་ཡོད་པ་རེད། མཇལ་མོལ་སྐབས་ཁོང་གཉིས་ཀྱིས་བོད་དོན་དང་འབྲེལ་བའི་གནད་དོན་འདྲ་མིན་ཐོག་གོ་བསྡུར་གནང་ཞིང་། སྐུ་ཚབ་དོན་གཅོད་དངོས་གྲུབ་ལགས་ཀྱིས་སྐུ་ཞབས་སུ་ཇཱིཏ་ཀུ་མཱར་ལགས་ལ་རྒྱ་གར་གྱི་གྲོས་ཚོགས་སུ་ཆབ་སྲིད་ཙམ་མ་ཡིན་པར་བོད་ནང་རྒྱ་ནག་གཞུང་གིས་བོད་ཀྱི་ཆོས་དང་། རིག་གཞུང་། སྐད་ཡིག ཁོར་ཡུག་སོགས་ལ་གཏོར་སྐྱོན་ཚབས་ཆེ་གཏོང་གི་ཡོད་པའི་གནད་དོན་རྣམས་གླེང་སློང་གནང་དགོས་པའི་རེ་སྐུལ་ཞུས། 

སྐུ་ཞབས་སུ་ཇཱིཏ་ཀུ་མཱར་ལགས་ཀྱིས་རང་ཉིད་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་གུས་བརྩི་ཞུ་མཁན་ཞིག་ཡིན་པའི་ཆ་ནས་བོད་དོན་ཐོག་རྒྱབ་སྐྱོར་གཙང་མ་གནང་རྒྱུ་ཡིན། ཞེས་དང་། རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་དེ་བཞིན་བོད་དོན་ཞུ་གཏུག་ལས་གཞིའི་ཐད་སྔར་ལས་ཧུར་ཞིང་སྒྲིམ་པོ་བཟོ་རྒྱུར་འབད་རྩོལ་གང་ཡོད་གནང་རྒྱུ་ཡིན་ཞེས་གསུངས། 

མཐར་སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས་ཀྱིས་སྐུ་ཞབས་སུ་ཇཱིཏ་ཀུ་མཱར་ལགས་ཀྱིས་བོད་དོན་ཐོག་རྒྱབ་སྐྱོར་ཚད་མཐོ་པོ་གནང་བར་ཐུགས་རྗེ་ལེགས་འབུལ་དང་། མ་འོངས་ལས་དོན་རྣམས་ལམ་ལྷོངས་ཡོང་བའི་སྨོན་འདུན་ཞུས་རྗེས་ཁོང་ལ་བོད་དོན་དང་འབྲེལ་བའི་ཕྱག་དེབ། Tibet Brief 20/20 དང་། བོད་ཀྱི་སྲིད་དོན་རྒྱལ་རབས།(ཧིནྡི།) རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཐེངས་བདུན་པའི་སྙན་ཐོ་བཅས་ཕུལ་ཡོད་པ་བཅས།།