༄༅། །ཕྱི་ལོ་ ༢༠༢༢ ཟླ་བ་ ༢ ཚེས་ ༤ ནས་འགོ་འཛུགས་ཀྱི་ཡོད་པའི་རྒྱ་ནག་དགུན་ཁའི་ཨོ་རྩེད་འགྲན་ཚོགས་ལ་ཉེ་ལམ་ཨ་རི་དང་། ཨིན་ཡུལ། ཁེ་ན་ཌ། ཨོསྟྲེ་ལི་ཡཱ་སོགས་ཀྱིས་རྒྱ་ནག་གཞུང་གིས་བོད་མི་དང་། ཡུ་གུར་མི་རིགས་སོགས་ཀྱི་འགྲོ་བ་མིའི་ཐོབ་ཐང་རྡོག་རོལ་བརྩི་མེད་བཏང་བར་གཞུང་འབྲེལ་ངོ་རྒོལ་མཚོན་ཆེད་ཨོ་རྩེད་འགྲན་ཚོགས་སུ་གཞུང་འབྲེལ་མི་སྣ་དང་གཞུང་ཚབ་གཏོང་རྒྱུ་མིན་པའི་གསལ་བསྒྲགས་བསྐྱངས་ཡོད། ཁ་སང་ཕྱི་ལོ་ ༢༠༢༢ ཟླ་བ་ ༢ ཚེས་ ༣ སྟེ་རྒྱ་ནག་དགུན་ཁའི་ཨོ་རྩེད་འགྲན་ཚོགས་འགོ་མ་ཚུགས་སྔོན་གྱི་ཉིན་གཅིག་གོང་ཨ་རི་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གིས་རྒྱ་ནག་ཏུ་འཚོག་གཏན་འཁེལ་བའི་ཨོ་རྩེད་འགྲན་ཚོགས་དང་འབྲེལ་བའི་ཉན་ཞིབ་ཅིག་གོ་སྒྲིག་ཞུས་ཡོད་པ་རེད། 

ཉན་ཞིབ་སྐབས་གྲོས་ཚོགས་ཀྱི་ཚོགས་གཙོ་ལྕམ་ནན་སི་པི་ལོ་སི་མཆོག་གིས་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་མདུན་དུ་རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་བརྩི་མེད་བཏང་བ་རྣམས་གསལ་སྟོན་བྱ་རྒྱུ་དེ་ཛ་དྲག་གི་ལས་འགན་ཞིག་ཆགས་ཡོད་ཅེས་དང་། དེ་དང་མཉམ་དུ་ཨ་རིའི་རྩེད་འགྲན་པ་རྣམས་ནས་གདུང་རྩུབ་ཆེ་བའི་རྒྱ་ནག་གཞུང་ལ་དོགས་གཟོན་བྱ་དགོས་ཞེས་བགྲོས་བཏོན་གནང་ཡོད། 

དེ་བཞིན་མུ་མཐུད་ཁོང་མོས་ང་ཚོས་རྩེད་འགྲན་པ་རྣམས་ལ་རྒྱབ་སྐྱོར་བྱེད་པ་དང་མཉམ་དུ་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ལ་སྣང་ཆུང་གཏོང་མི་ཉན། གྲོས་ཚོགས་ཀྱི་འཐུས་མི་མང་པོས་འཛམ་གླིང་ཡོངས་ནས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་འགྲོ་བ་མིའི་ཐོབ་ཐང་གི་གནས་སྟངས་ཤེས་རྟོགས་དང་། དེ་ལ་བརྟེན་ནས་རྒྱ་ནག་ལ་ཨོ་རྩེད་འགྲན་ཚོགས་གོ་སྒྲིག་བྱ་རྒྱུའི་གོ་སྐབས་སྤྲད་རྒྱུར་དགག་པ་བརྒྱབ་སྟེ་རྒྱ་ནག་གིས་འགྲོ་བ་མིའི་ཐོབ་ཐང་གནས་བབ་ལ་གསལ་བཤད་བྱ་རྒྱུ་ཡོད་པ་བཟོ་རྒྱུར་སྐུ་ངལ་སྐྱོན་ཡོད། ད་ཆ་ཁེ་ལས་མཉམ་འདུས་ཀྱིས་མཐུན་རྐྱེན་སྦྱར་བའི་རྒྱལ་སྤྱིའི་ཨོ་རྩེད་ཚོགས་པས་ཕྱི་ལོ་ ༢༠༢༢ ལོའི་དགུན་ཁའི་ཨོ་རྩེད་འགྲན་ཚོགས་ལ་སྣང་མེད་བཏང་ཡོད། གལ་ཏེ་ང་ཚོས་ཚོང་གི་ཁེ་ཕན་རྒྱུ་མཚན་དུ་བྱས་ཏེ་རྒྱ་ནག་གིས་འགྲོ་བ་མིའི་ཐོབ་ཐང་རྡོག་རོལ་བརྩི་མེད་བཏང་བར་ཡ་ལན་མ་བྱས་ན། ང་ཚོས་འཛམ་གླིང་ས་ཆ་གཞན་གང་སར་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་ཡ་ལན་བྱ་རྒྱུའི་དབང་ཚད་ཀྱང་ཤོར་བ་རེད། ཅེས་གསུངས། 

ཨ་རིའི་གྲོས་ཚོགས་ནང་ཉེ་ལམ་ཕྱི་ལོ་ ༢༠༢༡ ཟླ་བ་ ༡༢ ནང་ཡུ་གུར་བཙན་འདེད་ངལ་རྩོལ་སྔོན་འགོག་ཁྲིམས་ཡིག་གཏན་འབེབས་གནང་ཡོད་པ་དང་། ད་ཆ་སླར་ཡང་ཨ་རིའི་གྲོས་ཚོགས་ནང་རྒྱ་ནག་གི་ཁ་གཏད་དུ་འགྲོ་བའི་ཁྲིམས་འཆར་ (The America COMPETES Act of 2022) ཞེས་པ་ཞིག་གཏན་འབེབས་གནང་འཆར་ཡོད་ཅིང་། ཁྲིམས་ཡིག་དེ་བརྒྱུད་ཨ་རིས་འཛམ་གླིང་ཁྱོན་ཡོངས་ཀྱི་རིག་རྩལ་ལྡན་པའི་གང་ཟག་ལ་གོ་སྐབས་གསར་པ་བསྐྲུན་ནས་རྒྱལ་ཁབ་ཀྱི་དཔལ་འབྱོར་གནས་བབ་ཇེ་མཐོར་བཏང་སྟེ་རྒྱ་ནག་ལས་མདུན་དུ་ཐོན་ཐུབ་པའི་དམིགས་ཚད་བཟུང་གི་ཡོད་པ་རེད། 

མཐར་ལྕམ་པེ་ལོ་སི་མཆོག་གིས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་བཙན་གནོན་འོག་དཀའ་སྡུག་མྱོང་བཞིན་པ་རྣམས་ལ་ཞུ་རྒྱུར། ཨ་རིས་ཁྱེད་ཚོ་མཐོང་ཡོད། ཨ་རི་ཁྱེད་ཚོ་མཉམ་དུ་ཡོད་ལ། མུ་མཐུད་ཁྱེད་ཚོའི་ཆེད་འཐབ་རྩོད་བྱེད་ཀྱི་རེད། ཅེས་གསུངས་ཏེ་གསུང་བཤད་མཇུག་བསྡུས་ཡོད་པ་བཅས།།