༄༅། །ཕྱི་ལོ་ ༢༠༢༢ ཟླ་ ༠༢ ཚེས་ ༠༡ ནས་ ༠༢ བར་ལ་དྭགས་བསོད་ནམས་གླིང་བོད་མི་གཞིས་ཆགས་སུ་ལ་སྤྱི་ཟུར་པ་ཚེ་བརྟན་དབང་ཕྱུག་ལགས་དང་ལ་སྤྱི་གསར་པ་དོན་གྲུབ་བཀྲ་ཤིས་ལགས་རྣམ་གཉིས་དབར་སྤྲོད་དཔང་ནང་སྲིད་ལས་ཁུངས་ཀྱི་སྐུ་ཚབ་དྲུང་ལས་བསྟན་འཛིན་ནོར་ལྡན་ལགས་དབུ་བཞུགས་ཐོག་རྩིས་སྤྲོད་རྩིས་ལེན་་གནང་ཡོད།
དེ་ཡང་ཕྱི་ལོ་ ༢༠༢༢ ཟླ་ ༠༢ ཚེས་ ༠༡ ཉིན་ལ་སྤྱི་གསར་རྙིང་ནས་༧རྒྱལ་བའི་སྐུ་པར་མཐོང་གྲོལ་རིན་པོ་ཆེའི་དྲུང་དུ་མཇལ་དར་ཕུལ་བ་དང་། ནང་སྲིད་སྤྲོད་དཔང་དྲུང་ལས་བསྟན་འཛིན་ནོར་ལྡན་ལགས་ཀྱི་མདུན་དུ་ལས་ཁུངས་ནང་གི་སྡེ་ཚན་སོ་སོའི་འཛིན་ཆས་དང་ཡིག་སྣོད་ཁག་རྩིས་སྤྲོད་རྩིས་ལེན་གནང་ཡོད། དེ་བཞིན་ལས་དོན་གལ་ཆེ་མཇུག་སྐྱོང་བྱ་བསྡད་ཁག་རྒྱུས་སྟོན་གནང་ཡོད།

ཕྱི་ལོ་ ༢༠༢༢ ཟླ་ ༠༢ ཚེས་ ༠༢ ཉིན་ལ་སྤྱི་གསར་རྙིང་དབར་ཞབས་འདེགས་བརྗེ་ལེན་གནང་བ་དང་། ལ་སྤྱིའི་ཚོགས་ཁང་ཆུང་བ་ནང་ས་གནས་ཀྱི་གནད་ཡོད་མི་སྣ་ཁག་ཚང་འཛོམས་ཐོག་མཛད་སྒོ་ཚོགས་གནང་ཡོད། ཉིན་རྒྱབ་ལ་སྤྱི་ཟུར་པ་ཚེ་བརྟན་དབང་ཕྱུག་ལགས་ཀྱིས་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་སླེའི་སྡེ་དཔོན་སྐུ་ཞབས་བཀྲ་ཤིས་རྒྱལ་མཚན་ལགས་དང་ལ་དྭགས་ནང་ཚོགས་ཀྱི་ཚོགས་གཞོན་སྐུ་ཞབས་ཚེ་རིང་རྡོ་རྗེ་ལགས་རྣམ་གཉིས་ཀྱི་ལས་ཁུངས་སུ་ཆེད་བཅར་གྱིས་ལ་སྤྱི་གསར་པ་དོན་གྲུབ་བཀྲ་ཤིས་ལགས་ངོ་སྤྲོད་གནང་ཡོད་པ་བཅས། །