༄༅། །རྡོར་གླིང་ས་གནས་འགོ་འཛིན་ཚེ་དབང་ཕུན་ཚོགས་ལགས་ཀྱིས་ཕྱི་ལོ་ ༢༠༢༢ ཟླ་བ་ ༡ ཟླ་མཇུག་ཏུ་ས་འགོའི་ཁྱབ་ཁོངས་ཁ་འཐོར་བོད་མི་འདུས་སྡོད་ས་གནས་ཁག་ཏུ་གཞུང་འབྲེལ་ཕྱོགས་བསྐྱོད་གནང་ཡོད། ཁོང་དང་ལྷན་དུ་རྩིས་པ་བློ་བཟང་སྒྲོལ་དཀར་ལགས་དང་ལས་དྲུང་བསྟན་འཛིན་ཚུལ་ཁྲིམས་ལགས་གཉིས་མཉམ་བཅར་ཞུས་ཡོད་པ་རེད། 

དེ་ཡང་རྡོར་གླིང་ས་གནས་འགོ་འཛིན་ཚེ་དབང་ཕུན་ཚོགས་ལགས་ཀྱིས་ས་གནས་ཁག་གི་འགོ་ཁྲིད་དང་ཐུག་འཕྲད་ཀྱིས་གནད་དོན་འདྲ་མིན་ཐོག་གོ་བསྡུར་གནང་ཡོད་པ་མ་ཟད། ལྷག་པར་ད་ལྟ་ལག་བསྟར་བྱེད་བཞིན་པའི་རང་ལོ་ ༡༥ནས་ ༡༨ བར་གྱི་བྱིས་པར་ཏོག་དབྱིབས་གཉན་རིམས་སྔོན་འགོག་སྨན་ཁབ་དང་། རང་ལོ་ ༦༠ ཡན་གྱི་རྒན་རྒོོན་རྣམས་ལ་ནུར་སྤར་འགོག་ཁབ་བརྒྱབ་རྒྱུའི་ལས་གཞི་ངོ་སྤྲོད་དང་འབྲེལ། བོད་མི་རྣམས་ནས་བོད་མིའི་སྒྲིག་འཛུགས་ཀྱི་སྨན་བཅོས་ལྟ་སྐྱོང་ལས་གཞིའི་ཁོངས་སུ་འཛུལ་ཞུགས་གནང་རྒྱུའི་སྐུལ་མ་ཡང་གནང་ཡོད། ཕྱོགས་བསྐྱོད་སྐབས་སུ་ས་གནས་འགོ་འཛིན་ལས་ཁུངས་ནས་བོད་མི་རྣམས་ལ་ཁ་རས་དང་། འཕྲུལ་ཐང་བགོ་འགྲེམས། དེ་བཞིན་ཏོག་དབྱིབས་གཉན་རིམས་རླབས་གསུམ་པའི་སྐབས་མཐུན་རྐྱེན་སྦྱོར་སྤྲོད་ཆེད་རྡོར་གླིང་ས་འགོ་ལས་ཁུངས་ཀྱི་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་མིའི་ཁ་པར་ཨང་གྲངས་ཕུལ་ཡོད་པ་རེད། 

ད་ཐེངས་ཀྱི་ཕྱོགས་བསྐྱོད་དེ་བཞིན་མ་འོངས་ལས་འཆར་ཆེད་ས་གནས་སོ་སོའི་གནས་སྟངས་རྒྱུས་ལོན་ཆེད་ཡིན་པ་དང་། ཕྱོགས་བསྐྱོད་སྐབས་བོད་མི་གནས་སྡོད་ས་གནས་པ་ཤུ་པ་ཏི་དང་། མི་རིག སུ་ཁེ། མ་ནི་སྦ་ཆང་།  ཕྱི་ཏེ་རི། སྤོག་རེ་སྦོང་། ཁར་ཤང་། མལ་ལེ་དྲུག་པ། ཏག་ད། བླ་མ་ཧ་ཊ་བཅས་སུ་ཕེབས་ཡོད། 

ཚེ་དབང་ཕུན་ཚོགས་ལགས་ཀྱིས་ཕྱི་ལོ་ ༢༠༢༡ ཟླ་བ་ ༡༢ ཚེས་ ༢༧ ཉིན་རྡོར་གླིང་ས་གནས་འགོ་འཛིན་གྱི་ལས་འགན་བཞེས་ཡོད་པ་བཅས།།