༄༅། །བེལ་ཇམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཕྱི་ལོ་ ༢༠༢༢ ཟླ་བ་ ༠༢ ཚེས་ ༡༤ ཉིན་རྒྱལ་ཁབ་ཀྱི་ངོས་འཛིན་མ་ཐོབ་པའི་མི་རིགས་མཐུན་ཚོགས་(Unrepresented Nations and Peoples Organization) ཀྱི་སྤྱི་ཁྱབ་དྲུང་ཆེ་རལ་ཕ་བུན་ཆི་ (Ralph Bunche) ལགས་དང་མཇལ་འཕྲད་གནང་ཡོད་པ་དང་། ཆུ་ཚོད་གཅིག་དང་ཕྱེད་ཀའི་མཇལ་མོལ་སྐབས་ཁོང་རྣམ་གཉིས་ནས་ཐུན་མོང་གི་ཁེ་ཕན་དང་མ་འོངས་མཉམ་ལས་གནང་རྒྱུ་ཤུགས་ཆེར་གཏང་རྒྱུའི་ཐད་གྲོས་བསྡུར་གནང་ཡོད་པ་རེད། 

བོད་ནི་རྒྱལ་ཁབ་ཀྱི་ངོས་འཛིན་མ་ཐོབ་པའི་མི་རིགས་མཐུན་ཚོགས་ཀྱི་གསར་འཛུགས་ཚོགས་མི་གསུམ་ནང་ནས་གཅིག་ཡིན་སྟབས། སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ལོ་འདིའི་ནང་མཐུན་ཚོགས་ངོས་ནས་༸རྒྱལ་བའི་ཡང་སྲིད་དང་དབུ་མའི་ལམ་དང་འབྲེལ་བའི་ལས་འགུལ་སྤེལ་དགོས་པའི་རེ་སྐུལ་གནང་ཡོད། 

སྐུ་ཞབས་བུན་ཆི་ལགས་ནི་སྐུ་ཞབས་རལ་ཕ་ཇོན་སོན་བུན་ཆིའི་ (Ralph Johnson Bunche) ཚ་བོ་ཡིན་པ་དང་། ཁོང་ནི་དུས་རབས་ཉི་ཤུ་པའི་ནང་ཨ་རི་མི་སེར་སྤེལ་ཡུལ་ལས་རྒྱལ་ཁ་ཐོབ་ཅིང་། དམངས་དོན་ཁེ་དབང་འཐབ་རྩོད་བྱེད་སྐབས་ཀྱི་ཆབ་སྲིད་རིག་པ་བ་དང་། ཕྱི་འབྲེལ་མི་སྣ་གལ་ཆེ་ཞིག་ཡིན་པ་མ་ཟད། ཁོང་གིས་ཨིས་རལ་ནང་བར་སྡུམ་གནང་བར་བརྟེན་ཕྱི་ལོ་ ༡༩༥༠ ལོར་ནོ་ཝེལ་ཞི་བདེའི་གཟེངས་རྟགས་ཐོབ་ཅིང་། དེ་ནི་ལོ་རྒྱུས་ནང་ཨ་རིའི་མི་རིགས་ནག་པོ་ཞིག་ལ་ནོ་ཝེལ་གཟེངས་རྟགས་ཐོབ་པ་ཐོག་མ་ཆགས་ཡོད། 

ཕྱི་ལོ་༢༠༢༢ཟླ་བ་༠༢ཚེས་༡༡ཉིན་ཡུ་རོབ་སྤྱི་མཐུན་རྒྱལ་ཁབ་ལ་ཞུ་གཏུག་བྱེད་མཁན་འབྲེལ་ཡོད་ལས་བྱེད་རིག་འཛིན་ལགས་རྒྱབ་ཁབ་ཀྱི་ངོས་འཛིན་མ་ཐོབ་པའི་མི་རིགས་མཐུན་ཚོགས་ཀྱི་ཚོགས་འདུར་དྲ་ཐོག་མཉམ་ཞུགས་གནང་ཡོད། ཚོགས་པའི་ངོས་ནས་ལོ་རེའི་ནང་ཚོགས་འདུ་ཐེངས་འགའ་ཚོགས་ཏེ་མཐུན་ཚོགས་ཀྱི་ཡར་རྒྱས་དང་། དཀའ་ངལ། ལས་དོན་བྱེད་ཕྱོགས་སོགས་ཀྱི་སྐོར་བགྲོ་གླེང་གནང་གི་ཡོད་པ་རེད་བཅས།།