༄༅། །འདི་གར་བྱང་ཨ་རི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་བ་ ༡ ཚེས་ ༢༩ དང་ ༣༠ བཅས་ཉིན་གྲངས་གཉིས་རིང་རྒྱ་ནག་མང་གཙོ་ཚོགས་པའི་དམིགས་གསལ་སྐུ་ཚབ་ཚོགས་ཆེན་ཐེངས་གསུམ་པ་དྲ་ཐོག་བསྐོང་ཚོགས་གནང་ཡོད་པ་དང་། ཚོགས་ཆེན་ཐོག་ཚོགས་པའི་འགན་འཛིན་རྣམ་པ་དང་རྒྱ་རིགས་མཁས་དབང་དང་རྒྱ་ནག་མང་གཙོ་དོན་གཉེར་བ་མང་དག་ཅིག་མཉམ་ཞུགས་གནང་སྟེ་གཏམ་བཤད་གནང་ཡོད། མགྲོན་འབོད་ལྟར་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་ཚོགས་ཆེན་གྱི་སྐུ་མགྲོན་གྱི་མིང་ཐོག་བོད་རྒྱ་འབྲེལ་མཐུད་ཀྱི་སྐོར་ལ་གཏམ་བཤད་གནང་བ་དང་ཡུ་གུར་བ་ཨི་ལི་ཤཊ་ནས་ཀྱང་སྐུ་མགྲོན་གྱི་ངོ་བོའི་ཐོག་ཡུ་གུར་མི་རིགས་ཀྱི་གནས་བབ་ཐོག་གཏམ་བཤད་གནང་ཡོད་པ་རེད།
རྒྱ་རིགས་འབྲེལ་མཐུད་པས་རྒྱ་རིགས་ཚོས་རང་ཉིད་ཀྱི་མེས་པོ་ཡན་ཧོང་དང་འབྲུག་གི་བརྒྱུད་པ་ཡིན་པར་ཡིད་ཆེས་ཡོད་པ་དང་། བོད་པ་ཚོས་རང་ཉིད་ཕ་སྤྲེའུ་བྱང་ཆུབ་སེམས་པ་དང་མ་བྲག་སྲིན་མོའི་བརྒྱུད་པ་ལས་བྱུང་བ་ཡིན་པར་མོས། དེ་བཞིན་རྒྱ་ནག་ནང་རྒྱའི་རྒྱལ་རབས་རིམ་བྱུང་ལ་བོད་བཙན་པོའི་རྒྱལ་རབས་ནས་དགའ་ལྡན་ཕོ་བྲང་བར་གྱི་ལོ་རྒྱུས་ཀྱི་ཆ་ནས་མི་འདྲ་བ་ཡོད་ཀྱང་། དེ་སྔ་དང་མ་འོངས་པར་བོད་རྒྱ་གཉིས་ཁྱིམ་མཚེས་བཞིན་གནས་ཡོད་པ་དང་གནས་དགོས་པ་ནི་ལྡོག་ཐབས་མེད་པ་ཡིན་པ་བཤད། རྒྱ་ནག་དམར་ཤོག་གཞུང་གིས་བོད་ས་བཙན་བཟུང་བྱས་པ་ནས་བཟུང་ད་བར་མི་ཆོས་ལས་འདས་པའི་གཉའ་གནོན་བྱས་ཐད་རྒྱ་རིགས་འབྲེལ་མཐུད་པས་ལོ་རབས་སོ་སོར་བོད་ནང་ལག་བསྟར་བྱས་པའི་སྲིད་བྱུས་ཁག་འགྲེལ་བཤད་དང་བོད་ནང་བཙན་འཛུལ་རྗེས་ལོ་རབས་སོ་སོར་བྱུང་བའི་བསམ་ཡུལ་ལས་འདས་པའི་གོད་ཆག་དང་བོད་མི་ ༡༥༥ ནས་རང་ལུས་མེར་སྲེག་བཏང་དགོས་བྱུང་ཡོད་པ་འུ་ཐུག་ཐབས་ཟད་ཡིན་པ་འགྲེལ་བཤད་གནང་།
བོད་རྒྱ་འབྲེལ་མཐུད་ནི་སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞི་ལས་བྱུང་བ་ཡིན་པ་དང་༧གོང་ས་མཆོག་ས་གནས་གང་སར་ཆིབས་སྒྱུར་སྐབས་དམིགས་བསལ་གྱིས་རྒྱ་རིགས་མཁས་དབང་དང་སློབ་ཕྲུག་རྣམས་ལ་མཇལ་འཕྲད་ཀྱི་གོ་སྐབས་སྩལ་ཡོད་ལ། བཀའ་ཤག་སྐབས་ ༡༣ ནས་རྒྱ་རིགས་འབྲེལ་མཐུད་ཀྱི་ལས་གནས་གསར་བསྐོ་གནང་བ་ནས་ཕྱི་རྒྱལ་ཡུལ་གྲུ་ཁག་ནང་རྒྱ་བོད་འབྲེལ་མཐུད་ཀྱི་རྨང་གཞི་ལེགས་པོ་བཙུགས་ཐུབ་པ་བྱུང་བ་དང་། ཁ་སང་རྒྱལ་སྤྱིའི་བོད་རྒྱ་མཛའ་འབྲེལ་ཚོགས་པའི་ཐའེ་ལེནྜ་དུ་ཡོད་པའི་ཡན་ལག་འགན་འཁུར་བ་རྒྱ་རིགས་གཉིས་ནས་བོད་ཀྱི་གནད་དོན་ཆེད་ཡུལ་དེའི་རྒྱལ་ཚོགས་ཀྱི་ལས་ཁུངས་སུ་ལས་འགུལ་སྤེལ་ཡོད་པའི་གནས་ཚུལ་ནས། དེ་སྔ་རྒྱ་གཞུང་གིས་བོད་ཀྱི་སྐོར་ལ་ལོག་འགྲེལ་བྱས་རྐྱེན་རྒྱ་རིགས་བོད་ལ་ལྡང་མཁན་དང་དགྲ་འཛིན་གྱི་མཐོང་སྣང་ཡོད་པའི་གནས་བབ་ལས་ད་ཆ་བོད་ལ་ཆ་རྒྱུས་ཡོད་པ་མ་ཟད་བོད་ཀྱི་གནད་དོན་ཆེད་ལས་འགུལ་སྤེལ་མཁན་རྒྱ་རིགས་ཡོང་གི་ཡོད་པ་ནས་བོད་རྒྱ་འབྲེལ་མཐུད་ཀྱི་འབྲས་བུ་མཐོང་ཐུབ་བ་དང་། ལས་འགུལ་སྤེལ་མཁན་དང་ད་བར་རྒྱབ་སྐྱོར་ཆད་མེད་ཞུ་མཁན་གྱི་རྒྱ་རིགས་གྲོགས་པོ་རྣམས་ལ་ཐུགས་རྗེ་ཆེ་ཞུས་ཡོད་པ་རེད།
རྒྱ་རིགས་འབྲེལ་མཐུད་པས་ཏོག་དབྱིབས་ནད་ཡམས་ཀྱི་རྐྱེན་པས་བོད་རྒྱ་འབྲེལ་མཐུད་ཀྱི་ལས་འཆར་མང་དག་ཅིག་ཕྱིར་འཐེན་བྱས་དགོས་བྱུང་ཡོད་ཀྱང་ལས་དོན་དེ་བཞིན་གལ་ཆེན་དང་བོད་རྒྱ་གཉིས་ཕྱོགས་ནས་ལས་དོན་འདི་ཐོག་མུ་མཐུད་ཤུགས་རྒྱག་དགོས་པའི་འབོད་སྐུལ་ཞུས་པ་དང་བྱང་ཨ་རི་སྐུ་ཚབ་དོན་ཁང་ནས་ནད་ཡམས་ལས་གྲོལ་སྟེ་འགྲོ་བསྡད་སྟབས་བདེ་དང་འདུ་འཛོམས་ལ་དཀའ་ངལ་མེད་སྐབས་ལས་གཞི་གང་མང་སྤེལ་རྒྱུ་ཡིན་པ་བཤད། དེ་བཞིན་ཚོགས་ཆེན་གྱི་སྐུ་ཚབ་ནས་ཀྱང་བོད་རྒྱ་འབྲེལ་མཐུད་ཐད་ཚོགས་པའི་ངོས་ནས་སྔར་ཡོད་བཞིན་པའི་ལས་འཆར་ཁག་ལ་རྒྱབ་སྐྱོར་མཉམ་ཞུགས་དང་བོད་རྒྱ་འབྲེལ་མཐུད་ཀྱི་ལས་དོན་ཡར་རྒྱས་གོང་འཕེལ་ཡོང་ཐབས་གནང་རྒྱུ་ཡིན་པ་བཅས། །
