༄༅། །ཕྱི་ལོ་ ༢༠༢༢ ཟླ་ ༢ ཚེས་ ༣ ཉིན་རྒྱ་གར་གྱི་གྲོས་ཚོགས་གོང་མའི་འཐུས་མི་སྐུ་ཞབས་ཨམ་རེནྡྲ་ངྷ་རི་ (Shri Amarendra Dhari Singh) ལགས་ཀྱིས་རྒྱ་གར་གྱི་གྲོས་ཚོགས་གོང་མའི་ནང་བོད་དོན་སྐོར་གླེང་སློང་གནང་འདུག
དེ་ཡང་རྒྱ་གར་གྱི་ཆབ་སྲིད་ཚོགས་པ་ (Rashtriya Janata Dal) ཞེས་པའི་ཚོགས་མི་དང་རྒྱ་གར་གྱི་གྲོས་ཚོགས་གོང་མའི་འཐུས་མི་སྐུ་ཞབས་ཨམ་རེནྡྲ་ངྷ་རི་ལགས་ཀྱིས་གོང་ཚེས་ཉིན་རྒྱ་གར་གྱི་གྲོས་ཚོགས་གོང་མའི་ནང་བོད་དོན་སྐོར་གླེང་སློང་གནང་སྐབས་གསུང་དོན། རྒྱ་གར་གྱི་ངོས་ནས་རང་གི་གྲོགས་པོ་ཚོར་རྒྱབ་སྐྱོར་གྱི་ཆེད་དུ་སློབ་སྦྱོང་གནང་དགོས། དེ་ལྟར་མ་གནང་ཚེ་ང་ཚོས་སྔར་ལོ་རྒྱུས་ཐོག་ང་ཚོའི་བོད་ཀྱི་གྲོགས་པོ་ཚོར་སེམས་ཤུགས་ཆག་བཅུག་པའི་ནོར་འཁྲུལ་དེ་བསྐྱར་ཟློས་བྱེད་ཀྱི་ཡོད། ལོ་རྒྱུས་ཀྱི་ཡིག་ཆའི་སྟེང་ནས་བོད་མི་རྣམས་ཀྱིས་ནམ་ཡང་རྒྱ་ནག་གི་རང་དབང་གཙང་མའི་བདག་དབང་དང་མིང་ཙམ་གྱི་དབང་བསྒྱུར་ལ་ཁས་ལེན་བྱས་མྱོང་མེད།

ད་ལྟའི་གཞུང་འཛིན་ནས་དགའ་མོས་གནང་སའི་རྒྱ་གར་གྱི་སྲིད་བློན་ཇཝཱ་ཧར་ལལ་ནེཧ་རུ་མཆོག་གིས་ཐ་ན་ཕྱི་ལོ་ ༡༩༤༩ ལོར་རྒྱ་གར་གྱི་གཞོན་སྐྱེས་དམག་སྤྱི་ཛོ་ར་ཝར་བྷག་ཤི་ (Zorawar Bakshi) ལགས་དམག་གི་འཐབ་ཇུས་སྐོར་རྟོག་ཞིབ་ཆེད་བོད་དུ་བཏང་གནང་ཡོད། སྐབས་དེ་དུས་འཆར་གཞི་ལྟར་གྲུབ་འབྲས་ཐོན་མེད་ལ། དེ་ལས་འཕྲོས་པའི་གནད་དོན་ཁག་ལོ་རྒྱུས་ནང་འཁོད་ཡོད། འོན་ཀྱང་དེང་སང་འཛམ་གླིང་ནང་སྟོབས་ལྡན་གྱི་རྒྱལ་ཁབ་མང་དུ་འཕེལ་བཞིན་པའི་སྐབས་འདིར་རྒྱ་གར་གྱིས་དེ་སྔ་ལས་འགུལ་བརྩམས་པ་དང་མ་བརྩམ་པའི་མཇུག་འབྲས་ལ་བརྟེན་ནས་ད་ལྟ་རྒྱལ་ཁབ་ལ་ཡུན་རིང་གི་དཀའ་ངལ་འཕྲད་བཞིན་ཡོད། རྒྱ་གར་གྱི་ངོས་ནས་རང་གི་རྒྱལ་ཁབ་ཀྱི་ཁེ་ཕན་སླད་ཁྱིམ་མཚེས་རྒྱལ་ཁབ་དང་། ཁྱིམ་མཚེས་རྒྱལ་ཁབ་ལས་བརྒལ་བའི་མཐུན་ཕྱོགས་རྒྱལ་ཁབ་ཚོ་དང་ལྷན་དུ་ཕྱོགས་སྒྲིལ་གནང་དགོས། ཞེས་གསུང་བཤད་གནང་ཡོད། །