༄༅། །ཕྱི་ལོ་ ༢༠༢༢ ཟླ་ ༠༡ ཚེས་ ༢༩ ཉིན་བྱང་ཨ་རིའི་སྐུ་ཚབ་དོན་ཁང་གིས་དྲ་ལམ་བརྒྱུད་ཁེ་ན་ཌའི་ནང་ཡོད་པའི་བོད་རིགས་སྤྱི་མཐུན་ཚོགས་པ་དྲུག་གི་ཚོགས་གཙོ་དང་ཚོགས་མི་རྣམ་པ་དང་ལྷན་ཚོགས་འདུ་བསྐོང་ཚོགས་གནང་ཡོད། སྐབས་དེར་ཊོ་རོན་ཊོ་ཨོན་ཊེ་རི་ཡོ་བོད་རིགས་སྤྱི་མཐུན་ཚོགས་པ་དང་། ཨོ་ཊ་ཝ་བོད་རིགས་ཚོགས་པ། ཁེལ་གྷེ་རེ་ཨལ་བྷར་ཊ་བོད་རིགས་སྤྱི་མཐུན་ཚོགས་པ། བྷི་རི་ཊི་ཞི་ཁོ་ལུམ་བྷི་ཡ་ཝན་ཁོར་ཝར་བོད་རིགས་སྤྱི་མཐུན་ཚོགས་པ། ཝིག་ཊོ་རི་ཡ་ཨ་ཡི་ལན་ཌི་ཝན་ཁོ་ཝར་བོད་རིགས་སྤྱི་མཐུན་ཚོགས་པ། ཁུ་ཡོ་བྷིག་མོན་ཊི་རེལ་བོད་རིགས་སྤྱི་མཐུན་ཚོགས་པ་བཅས་ཀྱི་ཚོགས་གཙོ་དང་ཚོགས་མི། དེ་བཞིན་ཁེ་ན་ཌའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་བསམ་འཕེལ་ལགས་དང་འགན་འཛིན་ཤེས་རབ་མཐར་ཕྱིན་ལགས། ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨ་རིབ་ཝི་ར་ནི་ (Arif Virani) མཆོག་གི་ལས་ཁུངས་ཀྱི་ལས་བྱེད་བསྟན་འཛིན་ཆོས་སྐྱིད་ལགས་དང་ལས་བྱེད་གསར་པ་ཕུན་ཚོགས་དབང་མོ་ལགས་བཅས་མཉམ་ཞུགས་གནང་ཡོད།
དེ་ཡང་བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་གྲུབ་ལགས་ཀྱིས་ཚོགས་བཅར་བ་ཡོངས་ལ་ཐེངས་འདིའི་ཚོགས་འདུའི་དགོས་དམིགས་སྐོར་ངོ་སྤྲོད་གསུང་བཤད་གནང་བ་དང་འབྲེལ་ན་ནིང་ལོར་བཀའ་ཤག་སྐབས་ ༡༦ པའི་ལས་གཞི་གསར་པ་དང་བླངས་བོད་དོན་ཞུ་གཏུག་ལས་འགུལ་ཞེས་པ་དབུ་འབྱེད་གནང་ཡོད་པ་དང་། ཁེ་ན་ཌའི་ནང་ཡོད་པའི་བོད་མི་རྣམས་ཀྱིས་བོད་དོན་ཞུ་གཏུག་གི་ལས་འགུལ་ཆེད་ནུས་པ་མཉམ་སྤུངས་གནང་དགོས་པ། ལྷག་པར་ཁེ་ན་ཌའི་ནང་ཡོད་པའི་གཞོན་སྐྱེས་རྣམས་དང་བླངས་བོད་དོན་ཞུ་གཏུག་ལས་འགུལ་གྱི་ལས་གཞི་ལ་མཉམ་ཞུགས་གནང་དགོས་པའི་གལ་གནད་སྐོར་གསུངས། གཞན་ཡང་ཁོང་གིས་ཁེ་ན་ཌའི་ནང་ཡོད་པའི་བོད་མི་ཚོས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་གཞི་ལྟར་ཁེ་ན་ཌའི་མཐོ་སློབ་ཁག་ཏུ་འགྲིམ་བཞིན་པའི་རྒྱ་རིགས་སློབ་མ་རྣམས་ཀྱིས་གཙོས་རྒྱ་རིགས་རྣམས་ལ་བོད་རྒྱའི་དཀའ་རྙོག་སེལ་ཐབས་སུ་གོ་རྟོགས་སྤེལ་དགོས་པའི་གལ་གནད་སོགས་ཀྱི་སྐོར་གསུངས་ཡོད།
བྱང་ཨ་རིའི་སྐུ་ཚབ་དོན་ཁང་གི་རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་རྒྱ་རིགས་རྣམས་དང་ཐུག་འཕྲད་གནང་བའི་རྒྱབ་ལྗོངས་ལོ་རྒྱུས་སྐོར་ངོ་སྤྲོད་དང་། དེ་བཞིན་ད་ལྟ་རྒྱ་རིགས་རྣམས་དང་ཐུག་འཕྲད་ཀྱི་ལས་རིམ་སྐོར་ངོ་སྤྲོད་གནང་ཡོད། ཨོན་ཊེ་རི་ཡོ་བོད་རིགས་སྤྱི་མཐུན་པའི་ཚོགས་གཙོ་སྐལ་བཟང་ཕུན་ཚོགས་ལགས་ཀྱིས་གཞོན་སྐྱེས་རྣམས་བོད་དོན་ཞུ་གཏུག་གི་ལས་འགུལ་ལ་མཉམ་ཞུགས་གནང་ཆེད་ལས་འགུལ་འདྲ་མིན་སྤེལ་དགོས་པའི་སྐོར་གསུངས། ཁེལ་གྷེ་རེ་ཨལ་བྷར་ཊ་བོད་རིགས་སྤྱི་མཐུན་ཚོགས་པའི་འགན་འཛིན་ལྷན་ཚོགས་ཀྱི་ཚོགས་མི་ཚེ་བརྟན་ཡེ་ཤེས་ལགས་ཀྱིས་གཞོན་སྐྱེས་རྣམས་བོད་དོན་ཞུ་གཏུག་ལས་འགུལ་ལ་མཉམ་ཞུགས་གནང་ཆེད་རྩེད་མོའི་རིགས་དང་ཟབ་སྦྱོང་གོ་སྒྲིག་གནང་དགོས་པའི་ཐབས་ལམ་སྐོར་གསུངས།
ཁེ་ན་ཌའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་བསམ་འཕེལ་ལགས་དང་འགན་འཛིན་ཤེས་རབ་མཐར་ཕྱིན་ལགས་ཀྱིས་ཁེ་ན་ཌའི་བོད་དོན་རྒྱབ་སྐྱོར་ཚོགས་པས་ད་བར་བོད་དོན་དང་འབྲེལ་བའི་ལས་འགུལ་ཇི་སྤེལ་སོགས་ཀྱི་སྐོར་གསུངས། ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨ་རིབ་ཝི་ར་ནི་མཆོག་གི་ལས་ཁུངས་ཀྱི་ལས་བྱེད་བསྟན་འཛིན་ཆོས་སྐྱིད་ལགས་ཀྱིས་ཁེ་ན་ཌའི་ནང་ཡོད་པའི་བོད་མི་ཚོས་ཁེ་ན་ཌའི་བོད་དོན་རྒྱབ་སྐྱོར་ཚོགས་པ་དང་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ལས་འགུལ་ཁག་ལ་རྒྱབ་སྐྱོར་གནང་དགོས་པའི་གལ་གནད་སྐོར་གསུངས།
བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་གྲུབ་ལགས་ཀྱིས་ཁེ་ན་ཌའི་བོད་རིགས་སྤྱི་མཐུན་ཚོགས་པ་ཁག་དང་ཁེ་ན་ཌའི་བོད་དོན་རྒྱབ་སྐྱོར་ཚོགས་པ་བཅས་ཀྱི་ཚོགས་གཙོ་དང་ཚོགས་མི་སོགས་ཀྱིས་གཙོས་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨ་རིབ་ཝི་ར་ནི་མཆོག་གི་ལས་ཁུངས་ཀྱི་ལས་བྱེད་བསྟན་འཛིན་ཆོས་སྐྱིད་ལགས་བཅས་ཀྱིས་བོད་དོན་ཆེད་དུ་བློས་བཏང་གིས་ཕྱག་ལས་གནང་དང་གནང་བཞིན་པར་ཐུགས་རྗེ་ཆེ་ཞུས་གནང་ཡོད།
མཐར་བྱང་ཨ་རིའི་དོན་ཁང་གི་དྲུང་ཆེ་བཀྲ་ཤིས་དོན་གྲུབ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་བཅས།།
