༄༅། །ཕྱི་ལོ་ ༢༠༢༢ ཟླ་ ༢ ཚེས་ ༩ ཉིན་རྒྱ་གར་གྱི་མངའ་སྡེ་ཨ་སམ་ནང་ཡོད་པའི་བོད་དོན་རྒྱབ་སྐྱོར་ཚོགས་པས་ (Core group for Tibetan Cause) ཨ་སམ་དམག་དཔུང་རུ་ཁག་གི་དམག་མི་ཟུར་པ་སྐུ་ཞབས་ན་རེན་ཅནྡྲ་དཱས་ (Naren Chandra Das) ལགས་ལ་བཀའ་དྲིན་རྗེས་དྲན་གྱི་མཛད་སྒོ་ཞིག་ཚོགས་ཡོད།
དེ་ཡང་རྒྱ་ནག་དམར་ཤོག་གཞུང་གིས་བོད་ས་ཡོངས་རྫོགས་དབང་བསྒྱུར་བྱས་རྗེས་ཕྱི་ལོ་ ༡༩༥༩ ཟླ་ ༣ ཚེས་ ༡༧ ཉིན་གྱི་མཚན་མོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་སྐུ་འཁོར་ལྷན་རྒྱས་བོད་ཀྱི་རྒྱལ་ས་ལྷ་ས་ནས་བཙན་བྱོལ་དུ་ཆིབས་སྒྱུར་བསྐྱངས་དགོས་བྱུང་ཡོད་པ་དང་། ཕྱི་ལོ་ ༡༩༥༩ ཟླ་ ༣ ཚེས་ ༣༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་སྐུ་འཁོར་ལྷན་རྒྱས་རྒྱ་གར་ས་ཐོག་ཏུ་བཙན་བྱོལ་ལ་ཐོག་མར་༸ཞབས་སོར་འཁོད་སྐབས་ཨ་སམ་དམག་དཔུང་རུ་ཁག་གི་དམག་མི་ཟུར་པ་སྐུ་ཞབས་ན་རེན་ཅནྡྲ་དཱས་ (Naren Chandra Das) ལགས་ཀྱིས་གཙོས་ཨ་སམ་དམག་དཔུང་རུ་ཁག་གི་དམག་མི་ཁག་གཅིག་གིས་ཕེབས་བསུའི་སྣེ་ལེན་ཞུས་ཡོད། ཨ་སམ་དམག་དཔུང་རུ་ཁག་གི་དམག་མི་ཟུར་པ་སྐུ་ཞབས་ན་རེན་ཅནྡྲ་དཱས་ལགས་ནི། ཕྱི་ལོ་ ༢༠༢༡ ཟླ་ ༡༢ ཚེས་ ༢༨ ཉིན་རང་ཁྱིམ་དུ་འདས་གྲོངས་སུ་གྱུར་ཡོད་པ་དང་། ཕྱི་ལོ་ ༢༠༡༨ ཟླ་ ༣ ཚེས་ ༣༡ ཉིན་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་རའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་གཙོས་སེར་སྐྱ་མི་མང་ ༤༠༠༠ བརྒལ་བས་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་སྲུང་བརྩི་གཟབ་རྒྱས་ཞུས་པའི་སྐབས་བོད་མིའི་སྒྲིག་འཛུགས་ནས་སྐུ་ཞབས་ན་རེན་ཅནྡྲ་དཱས་སྐུ་མགྲོན་དུ་མགྲོན་འབོད་གནང་ཡོད།
ཕྱི་ལོ་ ༢༠༢༢ ཟླ་ ༢ ཚེས་ ༩ ཉིན་སྐུ་ཞབས་ན་རེན་ཅནྡྲ་དཱས་ལགས་ལ་བཀའ་དྲིན་རྗེས་དྲན་གྱི་མཛད་སྒོ་ཞིག་དམ་པ་དེ་ཉིད་ཀྱི་འཁྲུངས་ཡུལ་ཨུཏ་མཱ་རི་ (Udmari) གྲོང་གསེབ་ཏུ་ཚོགས་ཡོད་པ་དང་། སྐབས་དེར་བོད་དོན་རྒྱབ་སྐྱོར་ཚོགས་པས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་དམ་པ་དེ་ཉིད་ཀྱི་ཤུལ་ལུས་ནང་མི་ཉེ་འབྲེལ་ཀུན་ལ་ཐུགས་གསོའི་གསུང་འཕྲིན་གནང་བ་དེ་ཕུལ་ཡོད། ཐོག་མའི་འཆར་གཞི་ལྟར་ན་མཛད་སྒོ་དེ་ཉིད་ཕྱི་ལོ་ ༢༠༢༢ ཕྱི་ཟླ་ ༡ བདུན་ཕྲག་དང་པོའི་ནང་འཚོགས་རྒྱུའི་འཆར་གཞི་བསྒྲིགས་ཡོད། འོན་ཀྱང་སྐབས་དེ་དུས་རྒྱ་གར་ནང་ཏོག་དབྱིབས་གཉན་རིམས་ཁྱབ་བརྡལ་ཤུགས་ཆེ་ཕྱིན་པར་བརྟེན་མཛད་སྒོ་དེ་འཚོགས་མ་ཐུབ་པར་ད་བར་ཕར་འགྱང་ཞུས་དགོས་བྱུང་ཡོད།
མཛད་སྒོ་དེ་བཞིན་ཨ་སམ་དང་མེ་གྷཱ་ལ་ཡའི་ས་གནས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་སོམ་ཡ་དིཔ་དཏྟཱ་ (Soumyadeep Datta) ལགས་དང་ཨ་སམ་གྱི་བོད་མིའི་རང་དབང་དང་བླངས་ཚོགས་པའི་ཚོགས་མི་བཅས་ནས་གོ་སྒྲིག་གནང་ཡོད། མཛད་སྒོར་ས་གནས་ཀྱི་གྲོང་སྡེའི་དཔོན་པོ་དང་གསར་འགོད་མཐུན་ཚོགས་ཀྱི་ཚོགས་གཙོ་དང་ཚོགས་མི་སོགས་མཉམ་ཞུགས་གནང་འདུག མཛད་སྒོའི་ཐོག་ཨ་སམ་དང་མེ་གྷཱ་ལ་ཡའི་ས་གནས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་སོམ་ཡ་དིཔ་དཏྟཱ་ལགས་ཀྱིས་ད་བར་འཕགས་བོད་ས་མཚམས་ཡོད་པ་ལས་རྒྱ་དཀར་ནག་གི་ས་མཚམས་ཞེས་པ་མེད་པའི་སྐོར་དང་། སྐུ་ཞབས་ན་རེན་ཅནྡྲ་དཱས་ལགས་ཀྱི་མཛད་རྗེས་རྣམས་ཉམས་ལེན་བྱེད་དགོས་པ། སྐུ་ཞབས་ན་རེན་ཅནྡྲ་དཱས་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་འཕགས་བོད་གཉིས་ཀྱི་འབྲེལ་བ་ཡར་རྒྱས་གོང་འཕེལ་སླད་ཞབས་འདེབས་རླབས་ཆེན་བསྒྲུབས་ཡོད་སྟབས། ཁོང་གི་སྐུ་བརྙན་ཞིག་བཟོ་སྐྲུན་གནང་དགོས་པ་སོགས་ཀྱི་སྐོར་གསུང་བཤད་གནང་ཡོད་པ་བཅས།།
