༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཆོས་རིག་ལས་ཁུངས་དང་རྒྱུད་སྨད་གངས་ཅན་རིག་གནས་སློབ་གྲྭ་ཟུང་འབྲེལ་གྱིས་གོ་སྒྲིག་གནང་བའི་ཟླ་དྲུག་ཟབ་ཁྲིད་ཐེངས་བརྒྱད་པ་འདི་འདས་ལོར་ནད་ཡམས་དབང་གིས་ཕྲན་བུས་ཕྱི་བསྣུར་གནང་སྟེ་ཕྱི་ཟླ་ ༠༨ ཚེས་ ༡༦ ཉིན་དབུ་འཛུགས་བསྐྱངས་ཡོད་པ་ལྟར། སློབ་ཚན་དང་རྒྱུགས་སྤྲོད་བཅས་ལེགས་གྲུབ་བྱུང་སྟེ་ད་ལམ་ཕྱི་ལོ་ ༢༠༢༢ ཟླ་ ༠༢ ཚེས་ ༡༠ ཉིན་མཇུག་བསྡོམས་མཛད་སྒོ་བསྐྱངས་ཡོད་པ་རེད།དེ་ཡང་མཇུག་བསྡོམས་མཛད་སྒོའི་སྐུ་མགྲོན་དུ་སྨད་རྒྱུད་གྲྭ་ཚང་གི་མཁན་རིན་པོ་ཆེ་རྗེ་བཙུན་བསྟན་འཛིན་བཟང་པོ་མཆོག་དང་། ཆོས་རིག་ལས་ཁུངས་ཀྱི་སྐུ་ཚབ་ས་གནས་འགོ་འཛིན་ཐུབ་བསྟན་ཚེ་རིང་ལགས། དེ་བཞིན་སྐུ་མགྲོན་རྣམ་པས་འདི་ཕྱིའི་ལམ་སྟོན་བཀའ་སློབ་སྤྱི་དང་བྱེ་བྲག་ཟླ་དྲུག་ཟབ་ཁྲིད་ཀྱི་ལས་འཆར་འདིའི་ཕན་ཡོན་དང་དགེ་མཚན་སྐོར་གསུང་བཤད་ཟབ་ཅིང་གསལ་བར་གནང་ཡོད། གཞན་ཡང་མཛད་སྒོའི་ཐོག་གྲྭ་ཚང་ཕྱག་མཛོད་དང་སློབ་སྤྱི་གཅིག་ལྕོགས་སྔགས་རམས་པ་ཚེ་རིང་བཀྲིས་ལགས་ཀྱིས་སློབ་གྲྭའི་བྱུང་བ་དང་མ་འོངས་བྱེད་འཆར་བཅས་ཀྱི་ཐོག་གསུང་བཤད་གནང་ཞིང།  སློབ་ཕྲུག་རྒྱུགས་སྤྲོད་ཀྱི་རྩེ་མོར་སོན་པ་དང་ཉེ་བའི་རྩེ་ཕུད་བཅས་ལ་བྱ་དགའ་གསོལ་རས་གནང་བ་དང་། བསླབ་པ་ཐར་སོན་ཌིབ་ལོ་མའི་ (Diploma) ཕྱག་ཁྱེར་བཅས་གནང་ཡོད། ཐེངས་འདིར་སློབ་ཕྲུག་འཛུལ་ཞུགས་པ་མང་དུ་བྱུང་ཡང་ནད་ཡམས་དབང་གིས་དངོས་སུ་ཕེབས་མ་ཐུབ་པས་མཐར་སློབ་ཕྲུག་ ༢༡ ནས་མཉམ་ཞུགས་གནང་ཐུབ་པ་བྱུང་ཡོད།བསླབ་གཞིར་མཚོན་ན་ནང་དོན་རིག་པའི་དབུ་ཕར་དང་ཚད་མ་སོགས་གཞུང་ཆེན་བཀའ་པོད་ལྔའི་སྙིང་བཅུད་ཕྱོགས་བཏུས། བོད་ཀྱི་རིག་གནས་སུམ་རྟགས་དག་གསུམ་སོགས་དང་། རིགས་ལམ་བཅས་བསླབ་གཞིར་ཡོད་པ་རྣམས་འཛིན་གྲྭའི་ནང་སློབ་ཁྲིད་དང་། ཆོས་རར་རྩོད་པ། ཕན་ཚུན་གོ་རྟོགས་སྤེལ་རེས་ཀྱི་བགྲོ་གླེང་རིགས་འདྲ་མིན་སོགས་ཐབས་ལམ་སྣ་ཚོགས་བརྒྱུད་གོ་རྟོགས་སྤེལ་ཏེ།  མཐའ་མའི་གྲུབ་འབྲས་སུ་སློབ་ཕྲུག་རྣམས་སེམས་རྒྱུད་བཟང་དུ་དང་ཀུན་སྤྱོད་དུལ་དུ་ཕྱིན་པའི་རྣམ་པ་གསལ་པོར་མངོན་པ་བྱུང་ཡོད་འདུག་བཅས།།