༄༅། །བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་དྲུང་ཆེ་ཀརྨ་ཆོས་དབྱངས་ལགས་ཀྱིས་བདུན་ཕྲག་གཅིག་རིང་གི་གཟིགས་སྐོར་སྐབས་ཨ་རིའི་ཕྱི་སྲིད་ལྷན་ཁང་དུ་ཨ་རིའི་ཕྱི་སྲིད་ལྷན་ཁང་གི་སྤྱི་དམངས་བདེ་འཇགས་དང་མང་གཙོ། འགྲོ་བ་མིའི་ཐོབ་ཐང་ཚན་པའི་དྲུང་ལས་དང་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛི་རཱ་ཛེ་ཡ་ (Uzra Zeya ) མཆོག་དང་། ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་སྐུ་ཞབས་ར་ཤིཊ་ཧུ་སེན་ (Rashad Hussain) མཆོག  ཨ་རིའི་ཕྱི་སྲིད་ལྷན་ཁང་གི་མི་འབོར་དང་། སྐྱབས་བཅོལ་བ། གཞིས་སྤོས་བཅས་ཀྱི་ལས་དོན་ཚན་པའི་ཨ་རིའི་ཕྱི་སྲིད་དྲུང་ཆེའི་ཕྱག་རོགས་ལྕམ་སྐུ་ནན་སི་ཨི་ཛོ་ཇེག་སན་ (Nancy Izzo Jackson-A) ལགས། ཨ་རིའི་ཕྱི་སྲིད་ལྷན་ཁང་གི་མང་གཙོ་དང་། འགྲོ་བ་མིའི་ཐོབ་ཐང་། ངལ་རྩོལ་བཅས་ཀྱི་ཚན་པའི་ཨ་རིའི་ཕྱི་སྲིད་དྲུང་ཆེའི་ཕྱག་རོགས་སྐུ་ཞབས་སི་ཁོ་ཊི་བྷུ་སི་བྷེ་(Scott Busby-A) ལགས་བཅས་དང་མཇལ་འཕྲད་གནང་ཡོད། གཞན་ཡང་ཕྱི་དྲིལ་བཀའ་བློན་མཆོག་གིས་ཨ་རིའི་རྒྱལ་ས་ཁུལ་དུ་ཨ་རིའི་གྲོས་ཚོགས་གོང་མའི་འཐུས་མི་མ་ཡི་ཀི་བྷུ་རུན་(Mike Braun) མཆོག་གི་འབྲེལ་ཡོད་ལས་བྱེད་ཊན་ནར་ཧི་ཤི་ཊ་(Tanner Hishta) ལགས་དང་། ཨ་རིའི་གྲོས་ཚོགས་འཐུས་མི་ཇན་ནི་ཧྥར་(Jennifer Wexton) མཆོག་གི་འབྲེལ་ཡོད་ལས་བྱེད་མ་ཡི་ཀི་ལུ་སེར་(Mike Lucier) ལགས། ཨ་རིའི་གྲོས་ཚོགས་གོང་མའི་འཐུས་མི་ལི་ས་མུར་ཀའོ་སི་ཀི་(Lisa Murkowski ) མཆོག་གི་འབྲེལ་ཡོད་ལས་བྱེད་མེ་ཐེའོ་ཧི་ཀེ་(Mathew Hickey) ལགས། ཨ་རིའི་གྲོས་ཚོགས་ཀྱི་འཐུས་མི་ཡོན་གི་ཀིམ་(Young Kim) ལགས་ཀྱི་འབྲེལ་ཡོད་ལས་བྱེད་སེ་བྷ་སི་ཊིན་ཝིག་ལེ་(Sebastian Wigley) ལགས་དང་ཞི་ནེ་ལེ་(Shine Lee) ལགས་སོགས་དང་མཇལ་འཕྲད་གནང་ཡོད།སྐབས་དེར་ཕྱི་དྲིལ་བཀའ་བློན་མཆོག་གིས་བོད་ནང་གི་གནས་སྟངས་ཉིན་རེ་བཞིན་ཇེ་ཞན་ཇེ་སྡུག་ཏུ་འགྲོ་བཞིན་པའི་སྐོར་དང་། བོད་མིའི་སྒྲིག་འཛུགས་ནས་རྒྱ་ནག་གཞུང་དང་མཉམ་གྲོས་མོལ་བརྒྱུད་བོད་རྒྱའི་དཀའ་རྙོག་སེལ་ཐབས་གནང་དང་གནང་རྒྱུའི་ཆོད་སེམས་བརྟན་པོ་ཡོད་པ་སོགས་ཀྱི་སྐོར་གསུངས་ཡོད། བཀའ་བློན་མཆོག་དང་ལྷན་ཕྱི་དྲིལ་དྲུང་ཆེ་ཀརྨ་ཆོས་དབྱངས་ལགས་དང་།བྱང་ཨ་རི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་གྲུབ་ལགས་དང་དྲུང་ཆེ་བཀྲ་ཤིས་དོན་གྲུབ་ལགས་བཅས་ཕེབས་ཡོད།

ཕྱོགས་མཚུངས་ཕྱི་དྲིལ་བཀའ་བློན་མཆོག་གིས་དྲ་ལམ་བརྒྱུད་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་མཆོག་གི་འབྲེལ་ཡོད་ལས་བྱེད་རེ་ཝ་པི་ར་ཡི་སི་(Reva Price) ལགས་དང་མཇལ་འཕྲད་གནང་སྟེ་འབྱུང་འགྱུར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་རྒྱལ་ས་ཝ་ཤིན་ཊོན་དུ་གཟིགས་སྐོར་ཕེབས་གཏན་འཁེལ་ཡོད་པའི་སྐོར་གསུངས་ཡོད། དེ་བཞིན་བཀའ་བློན་མཆོག་གིས་ཧོང་ཀོང་རང་དབང་ལས་དོན་ཚོགས་ཆུང་གི་ཚོགས་གཙོ་ཨེ་ལེན་བྷོར་ཀི་(Ellen Bork) ལགས་དང་། རྒྱལ་སྤྱིའི་བོད་དོན་ལས་འགུལ་ཁང་གི་བར་བརྒལ་འགན་འཛིན་བུ་ཆུང་ཚེ་རིང་ལགས་དང་བར་བརྒལ་འགན་འཛིན་གཞོན་པ་བསྟན་ཆོས་རྒྱ་མཚོ་ལགས། འབྲེལ་ལམ་འགན་འཛིན་སྐུ་ཞབས་ཕི་རན་ཛི་མཱ་ཊི་ཛི་ནར་ (Franz Matzner) ལགས་སོགས་དང་མཇལ་འཕྲད་གནང་སྟེ་རྒྱལ་སྤྱིའི་བོད་དོན་ལས་འགུལ་ཁང་གི་ངོས་ནས་བོད་མིའི་སྒྲིག་འཛུགས་དང་བྱང་ཨ་རི་སྐུ་ཚབ་དོན་གཅོད་ཁང་དང་མཉམ་རུབ་ཀྱིས་ཐུན་མོང་གི་དམིགས་ཡུལ་ཏེ་བོད་དོན་ཞུ་གཏུག་གི་ལས་འགུལ་སྤེལ་ཕྱོགས་སྐོར་གྲོས་བསྡུར་གནང་ཡོད།གཞན་ཡང་བཀའ་བློན་མཆོག་གིས་ཨ་རིའི་རླུང་འཕྲིན་ཁང་གི་བོད་སྐད་སྡེ་ཚན་གྱི་འགན་འཛིན་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས་དང་། ཨེ་ཤི་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གྱི་འགན་འཛིན་སྐལ་ལྡན་བློ་གྲོས་ལགས་བཅས་དང་མཇལ་འཕྲད་གནང་ཡོད། ཨ་རི་རྒྱལ་སའི་མངའ་ཁུལ་བོད་རིགས་སྤྱི་མཐུན་ཚོགས་པའི་ཚོགས་གཙོ་བསྟན་འཛིན་ལགས་དང་འགན་འཛིན་ལྷན་ཚོགས་ཀྱི་ཚོགས་མི་རྣམ་པས་བྱང་ཨ་རི་སྐུ་ཚབ་དོན་གཅོད་དུ་བཀའ་བློན་མཆོག་དང་མཇལ་འཕྲད་ཞུས་ཏེ་ཉིན་གུང་དང་དགོང་དྲོའི་གསོལ་ཚིགས་འདེགས་འབུལ་ཞུས་ཡོད། བཀའ་བློན་མཆོག་གིས་ཨ་རིའི་མང་གཙོ་ཡར་རྒྱས་བསྟི་གནས་ཁང་(National Endowment for Democracy) གི་ཨེ་ཤི་ཡའི་འབྲེལ་མཐུད་པ་པདྨ་ལགས་དང་། རྒྱ་རིགས་མང་གཙོ་དོན་གཉེར་བ་ཝེ་ཇིན་ཤིང་(Wei Jingxiang) ལགས། རྒྱ་རིགས་མང་གཙོ་དོན་གཉེར་བ་ཧོང་ཚི་ཕིང་(Huang Ciping) ལགས་བཅས་ལ་མཇལ་འཕྲད་གནང་ཡོད།ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛི་རཱ་ཛེ་ཡ་ (Uzra Zeya ) མཆོག་གིས་ཕྱི་ལོ་ ༢༠༢༢ ཟླ་ ༢ ཚེས་ ༢༦ ཉིན་སྤྱི་ཚོགས་དྲ་རྒྱ་ཊུ་ཝི་ཊར་བརྒྱུད་ཕྱི་དྲིལ་བཀའ་བློན་མཆོག་དང་མཇལ་འཕྲད་གནང་བའི་སྐོར་གསུང་དོན། བདུན་ཕྲག་སྔོན་མའི་ནང་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་མཇལ་འཕྲད་ཞུ་རྒྱུ་བྱུང་བས་དགའ་པོ་བྱུང་། ངས་འཛམ་གླིང་གི་ས་ཕྱོགས་གང་སར་གནས་པའི་བོད་མི་རྣམས་ཀྱི་མ་འོངས་མདུན་ལམ་ཡར་རྒྱས་གོང་འཕེལ་གཏོང་བར་མཉམ་རུབ་བྱེད་རྒྱུའི་འདུན་པ་ཡོད། ཅེས་གསུངས་ཡོད། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་དྲུང་ཆེ་ཀརྨ་ཆོས་དབྱངས་ལགས་ཀྱི་བདུན་ཕྲག་གཅིག་རིང་གི་གཟིགས་སྐོར་ལེགས་པར་མཇུག་སྒྲིལ་རྗེས་ཕྱི་ལོ་ ༢༠༢༢ ཟླ་ ༢ ཚེས་༢༦ ཉིན་རྡ་སར་ཕེབས་འབྱོར་བྱུང་ཡོད་པ་བཅས།།