༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་སེམས་ཁམས་འཕྲོད་བསྟེན་སྡེ་ཚན་དང་བོད་ཀྱི་སྨན་རྩིས་ཁང་གི་སེམས་ཁམས་འཕྲོད་བསྟེན་སྡེ་ཚན་གཉིས་ཟུང་འབྲེལ་ཐོག་ཕྱི་ལོ་ ༢༠༢༢ ཟླ་ ༢ ཚེས་ ༡༢ དང་ ༡༣ བཅས་ཉིན་གྲངས་གཉིས་རིང་རྒྱ་གར་ལྷོ་ཕྱོགས་བཻངྒ་ལོར་དུ་རྟེན་གཞི་བྱས་པའི་བོད་ཀྱི་སྨན་རྩིས་ཁང་དུ་ནུབ་ཕྱོགས་སེམས་ཁམས་རིག་པ་ལས་སེམས་ནད་ཀྱི་ངོ་བོ་དང་། དེར་གཉེན་པོ་བསྟེན་ཐབས་སྐོར་ཟབ་སྦྱོང་ཞིག་གོ་སྒྲིག་གནང་ཡོད། དེ་ཡང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་པདྨ་གཡུ་སྒྲོན་ལགས་དང་ཚེ་རིང་དབྱངས་སྒྲོལ་ལགས་རྣམ་གཉིས་ཀྱིས་མཐུན་འགྱུར་འོག་མུམ་བྷེ་དང་སི་ཀེནྡྲ་བྷཏ། ཧུན་སུར། སྦེལ་ཀོབ། བཻངྒ་ལོར། མོན་གྷོ། མཻ་སུར་བཅས་ཀྱི་ཡན་ལག་སྨན་རྩིས་ཁང་གི་སྨན་པ་མཉམ་ཞུགས་དང་། རྒྱ་གར་གྱི་མངའ་སྡེ་གོ་ཝཱར་རྟེན་གཞི་བྱས་པའི་སེམས་ཁམས་འཕྲོད་བསྟེན་དང་འབྲེལ་བའི་གཞུང་ཁོངས་མིན་པའི་ཚོགས་པ་སང་གྷཊ་ (Sangath) ཞེས་པ་ནས་སེམས་ནད་སྨན་པ་རཱ་ཝིནྡྲ་ཨ་གྷར་ཝལ་ལགས་དང་སེམས་ཁམས་རིག་པ་བ་ཏ་ནུ་ཤྲི་ལགས་རྣམ་གཉིས་ཀྱིས་ཟབ་ཁྲིད་གནང་ཡོད། ལས་གཞི་འདིར་ཨ་རིའི་པི་ཨར་ཨེམ་ (PRM) གྱིས་རོགས་སྐྱོར་གནང་ཡོད་པ་བཅས།།