༄༅། །རྒྱ་གར་གཞུང་དང་མེ་གྷ་ལ་ཡའི་ཨ་སམ་དམག་དཔུང་རུ་ཁག་གིས་ཕྱི་ལོ་ ༡༩༨༨ ལོར་རྒྱ་གར་ས་མཚམས་སུ་འདས་གྲོངས་སུ་གྱུར་པའི་ལྡིང་དཔོན་བསྟན་འཛིན་ནོར་བུ་ལགས་ཀྱི་སྙིང་སྟོབས་ལ་ཆེ་བསྟོད་དང་རྗེས་དྲན་གཟེངས་རྟགས་ཀྱི་མཛད་སྒོ་ཞིག་ཚོགས་ཡོད་པ་དང་། སྐབས་དེར་ལྡིང་དཔོན་བསྟན་འཛིན་ནོར་བུ་ལགས་དམ་པ་དེ་ཉིད་ཀྱི་བཟའ་ཟླ་ཚེ་རིང་བུ་འཁྲིད་ལགས་དང་བུ་བསྟན་འཛིན་ཟླ་བ་ལགས་རྣམ་གཉིས་མཛད་སྒོར་མཉམ་ཞུགས་གནང་ཡོད།
ཤི་ལོང་ས་གནས་འགོ་འཛིན་པདྨ་དོན་གྲུབ་ལགས་ཀྱིས་རྒྱ་གར་གཞུང་དང་མེ་གྷ་ལ་ཡའི་ཨ་སམ་དམག་དཔུང་རུ་ཁག་གིས་ལྡིང་དཔོན་བསྟན་འཛིན་ནོར་བུ་ལགས་ཀྱི་སྙིང་སྟོབས་ལ་ཆེ་བསྟོད་དང་རྗེས་དྲན་གཟེངས་རྟགས་གནང་བར་ཐུགས་རྗེ་ཆེ་ཞུས་པ་དང་འབྲེལ་འཕགས་བོད་གཉིས་ཀྱི་དམག་མིས་ས་མཚམས་སྲུང་སྐྱོབ་ཀྱི་ཆེད་དུ་རང་སྲོག་བློས་བཏང་གིས་ཞབས་འདེགས་བསྒྲུབས་པར་ཆེ་བསྟོད་ཞུས་ཡོད་པ་བཅས།།