༄༅། ཕྱི་ལོ་ ༢༠༢༢ ཟླ་ ༢ ཚེས་ ༡༣ ཉིན་གྱི་ཕྱི་དྲོའི་ཆུ་ཚོད་ ༥ ཡས་མས་སུ་རྒྱ་ནག་གཞུང་གིས་བཅད་བགོས་བྱས་པའི་བོད་རང་སྐྱོང་ལྗོངས་ཟེར་བའི་ཁོངས་གཏོགས་ཆབ་མདོ་རི་བོ་ཆེའམ་མདའ་སྡེ་པ་ནས་ཡིན་པའི་མཐོ་རིམ་སློབ་མ་ཆོས་སྒྲོན་ཞེས་པ་ཞིག་རྒྱ་ནག་གི་ཉེན་རྟོག་པས་བཙན་འཁྲིད་བྱས་ཏེ་ཉིན་གྲངས་ ༥ ལྷག་འགྲོ་བཞིན་ཡོད་ཀྱང་ཁོང་མོ་གང་དུ་ཡོད་མེད་སོགས་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད།
དེ་ཡང་གསར་འགྱུར་བརྒྱུད་ལམ་ཁག་གཅིག་གི་ནང་གནས་ཚུལ་སྤེལ་གསལ་ལྟར་ན། རྒྱ་ནག་གཞུང་གིས་སློབ་གྲྭ་ཁག་གི་དགུན་དུས་གུང་གསེང་དང་བསྟུན་གསབ་ཁྲིད་གང་བྱུང་བྱས་མི་ཆོག་པའི་བཀོད་ཁྱབ་བཏང་ཡོད་པ་ལྟར། ཟླ་འདིའི་ཕྱི་ཚེས་ ༡༣ ཉིན་རྒྱ་ནག་གཞུང་གིས་བཅད་བགོས་བྱས་པའི་བོད་རང་སྐྱོང་ལྗོངས་ཟེར་པའི་ཁོངས་གཏོགས་ཆབ་མདོ་རི་བོ་ཆེའམ་མདའ་སྡེ་པ་ནས་ཡིན་པའི་མཐོ་རིམ་སློབ་མ་ཆོས་སྒྲོན་ལགས་ཀྱིས་དགུན་ཁའི་གུང་སེང་འགོ་ཚུགས་པ་དང་བསྟུན་ཕ་ཡུལ་གྱི་བྱིས་པ་ཚོར་བོད་ཡིག་གསབ་ཁྲིད་བྱས་པས། རྒྱ་ནག་གི་ཉེན་རྟོག་པས་རྒྱུ་མཚན་གསལ་ཁ་གང་ཡང་མེད་པར་བཙན་འཁྲིད་བྱས་ཏེ་གར་ཡོད་ཆ་མེད་དུ་གྱུར་ཡོད།
ཆོས་སྒྲོན་ལགས་འཛིན་བཟུང་བཙན་ཁྲིད་བྱས་ཏེ་ཉིན་གྲངས་ ༥ ལྷག་འགྲོ་བཞིན་ཡོད་ཀྱང་ད་དུང་ཁོང་མོ་གང་དུ་ཡོད་མེད་དང་གནས་སྟངས་གང་འདྲ་ཡིན་སོགས་ཤེས་རྟོགས་མེད་པ་དང་། ཐེངས་འདིར་ཁོ་མོ་འཛིན་བཟུང་བཙན་ཁྲིད་བྱེད་དོན་གཙོ་བོ་བོད་ཡིག་གསབ་ཁྲིད་ཀྱི་གནད་དོན་ཡིན་པ་ལས། གཞན་ནག་ཉེས་རིགས་གང་ཡང་མེད་པ་མ་ཟད། ནམ་རྒྱུན་བོད་སྐད་ཡིག་ལ་དོ་སྣང་ཆེན་པོ་ཡོད་མཁན་ཞིག་ཀྱང་ཡིན།
ཆོས་སྒྲོན་ལགས་ནི། མཚོ་སྔོན་ཞིང་ཆེན་ལྷོ་ནུབ་མི་རིགས་སློབ་ཆེན་གྱི་ཞིབ་འཇུག་སློབ་མ་ཞིག་ཡིན་པ་དང་། ཁོང་མོའི་པ་ལགས་སྔོན་ཆད་ནས་འདས་གྲོངས་སུ་གྱུར་ཡོད་པ་དང་། ཨ་མ་ལགས་ཀྱི་མིང་ལ་ཁངས་སྐྱིད་ཟེར་གྱི་ཡོད་འདུག ཆོས་སྒྲོན་ལགས་ལ་རང་ལོ་ ༡༤ ཅན་གྱི་གཅུང་མོ་ཞིག་དང་གཅུང་པོ་ལོ་ ༨ ཅན་ཞིག་ཡོད་འདུག །
