༄༅། །ཇར་མ་ནཱི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་ཕྱི་ལོ་ ༢༠༢༢ ཟླ་བ་ ༢ ཚེས་ ༡༠ ཉིན་བོད་དོན་ཚོགས་འདུ་ཞིག་བསྐོང་ཚོགས་གནང་ཡོད། སྐབས་དེར་གྲོས་ཚོགས་འཐུས་མི་མ་ཨི་ཀལ་བེ་རན་ (Michael Brand) ལགས་ཚོགས་གཙོ་དང་། གྲོས་ཚོགས་འཐུས་མི་མ་རི་ཡ་ཀི་ལིན་ (MP Maria Klein-Schmeink) ལགས། གྲོས་ཚོགས་འཐུས་མི་པི་ཀྲར་ཧིཊ་ (Peter Heidt) ལགས། གྲོས་ཚོགས་འཐུས་མི་ནཊ་ཇ་ས་ཐ་མར་ (Nadja Sthamer) ལགས་བཅས་ཚོགས་གཙོའི་ལས་རོགས་སུ་བསྐོ་གཞག་གནང་ཡོད་པ་རེད། 

གསར་དུ་བདམས་ཐོན་བྱུང་བའི་ཚོགས་གཙོ་བེ་རན་ལགས་ཀྱིས་བོད་དོན་ཐོག་རྒྱབ་སྐྱོར་མུ་མཐུད་གནང་རྒྱུ་ནན་བརྗོད་དང་འབྲེལ་ཇར་མན་གྲོས་ཚོགས་ནང་བོད་དང་བོད་མིའི་ཆེད་ཆབ་སྲིད་ལངས་ཕྱོགས་གསལ་པོ་བཟོ་རྒྱུ་ཡིན་སྐོར་དང་། དེ་རྗེས་གསར་འགོད་གསལ་བསྒྲགས་སྐབས་རྒྱ་ནག་གཞུང་གིས་བོད་མིར་སྡུག་སྦྱོང་མནར་སྤྱོད་མུ་མཐུད་ཇེ་དྲག་ཏུ་གཏོང་བཞིན་པར་ཁ་ཁུ་སིམ་པོས་སྣང་མེད་གཏོང་མཚམས་འཇོག་པའི་དུས་ལ་སླེབས་ཡོད་ཅེས་གསུངས། 

སུད་སི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་ཇར་མན་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་ལས་རོགས་ཡོངས་ནས་བོད་དོན་ཐོག་རྒྱབ་སྐྱོར་བརྟན་པོ་གནང་བར་ཐུགས་རྗེ་ཆེ་ཞུས་པ་དང་འབྲེལ། ལྷག་པར་གྲོས་ཚོགས་འཐུས་མི་རྣམས་ནས་བོད་ཀྱི་གནད་དོན་མདུན་དུ་ཁྱེར་ཏེ་ཡོང་འགྱུར་ལོ་ཟླའི་ནང་ཇར་མན་གྲོས་ཚོགས་སུ་གླེང་སློང་གནང་སྟེ་བོད་དོན་ཤུགས་ཆེ་རུ་གཏོང་རྒྱུའི་ཞལ་བཞེས་གནང་བར་བཀའ་དྲིན་ཆེ་ཞེས་ཞུས་ཡོད་པ་བཅས།།