༄༅། །ཕྱི་ལོ་ ༢༠༢༢ ཟླ་ ༠༢ ཚེས་ ༢༡ ཉིན་ཨོསྟྲེ་ལི་ཡཱའི་རྒྱལ་ས་ཁེན་བྷེ་ར་ཁུལ་དུ་ཡོད་པའི་བོད་མི་རྣམས་རྒྱལ་སྤྱིའི་ཕ་སྐད་ཉིན་མོ་སྲུང་བརྩི་མཛད་སྒོར་མཉམ་ཞུགས་གནང་ཡོད།
ཕྱི་ལོ་ ༡༩༩༩ ལོར་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཚན་རིག་དང་ཤེས་ཡོན། རིག་གཞུང་ལྷན་ཁང་གིས་ཕྱི་ཟླ་ ༢ ཚེས་ ༢༡ ཉིན་ནི་རྒྱལ་སྤྱིའི་ཕ་སྐད་ཉིན་མོ་ཞེས་ཡོངས་ཁྱབ་གསལ་བསྒྲགས་སྤེལ་ཡོད་པ་དང་། ཕྱི་ལོ་ ༢༠༠༠ ཟླ་ ༢ ཚེས་ ༢༡ ཉིན་ནས་བཟུང་ལོ་ལྟར་འཛམ་གླིང་ཡོངས་སུ་ཕ་སྐད་ཉིན་མོ་ཞེས་སྲུང་བརྩི་ཞུ་ཡི་ཡོད།

དེ་ཡང་ཨོསྟྲེ་ལི་ཡཱའི་རྒྱལ་ས་ཁེན་བྷེ་ར་ཁུལ་དུ་ཡོད་པའི་བོད་མི་རྣམས་རྒྱལ་སྤྱིའི་ཕ་སྐད་ཉིན་མོ་སྲུང་བརྩི་མཛད་སྒོར་མཉམ་ཞུགས་གནང་ཡོད། སྐབས་དེར་བོད་མི་ཚོས་རྒྱ་གར་དང་། བཱངྒ་ལ་དེཤ། ཡུ་ཀེ་རེན། རྒྱ་ནག་སོགས་ཀྱི་མི་རིགས་རྣམས་ལ་བོད་ཡིག་ནི་བོད་ཀྱི་ཆོས་དང་། རིག་གཞུང་། ངོ་བོའི་སྲོག་རྩ་ཡིན་པའི་གལ་གནད་དང་། བོད་ནང་གཏན་འཇགས་སློབ་གྲྭ་ཁག་ཏུ་འགྲིམ་བཞིན་པའི་བོད་པའི་སློབ་ཕྲུག་རྣམས་ལ་རྒྱ་ནག་གཞུང་གིས་བཙན་དབང་གིས་རྒྱ་ཡིག་སློབ་སྦྱོང་བྱེད་དུ་འཇུག་གི་ཡོད་པ་སོགས་སྐོར་གསུངས་ཡོད་པ་མ་ཟད། བོད་ཡིག་དང་སྒོར་གཞས་བསླབས་གནང་ཡོད། དེ་བཞིན་རྒྱ་གར་དང་། བཱངྒ་ལ་དེཤ། ཡུ་ཀེ་རེན། རྒྱ་ནག་སོགས་ཀྱི་མི་རིགས་རྣམས་ཀྱིས་སོ་སོའི་ཕ་སྐད་ཐོག་མཛད་སྒོར་མཉམ་ཞུགས་གནང་མཁན་ཡོངས་ལ་སྐད་ཡིག་དང་འཚམས་འདྲི་ཞུ་སྟངས་སྐོར་བསླབས་ཡོད།  ཁེན་བྷེ་ར་མངའ་སྡེའི་གྲོས་ཚོགས་འཐུས་མི་ལྕམ་སྐུ་ཏཱ་ར་ཆེ་ནེ་ (Tara Cheyne) ལགས་དང་ཨེ་ལི་ཛེ་བྷེ་ཐི་ལེ་ (Elizabeth Lee) ལགས་རྣམ་གཉིས་མཛད་སྒོར་མཉམ་ཞུགས་གནང་ཡོད། ཁོང་རྣམ་གཉིས་ཀྱིས་རྒྱལ་སྤྱིའི་ཕ་སྐད་ཉིན་མོར་མི་རིགས་སྣ་མང་གི་ཚོགས་སྡེ་ཡོངས་ལ་འཚམས་འདྲི་དང་། སོ་སོའི་སྐད་ཡིག་མི་ཉམས་རྒྱུན་འཛིན་བྱེད་དགོས་པའི་གལ་གནད་སྐོར་གསུང་བཤད་གནང་། ཨོསྟྲེ་ལི་ཡཱའི་སྐུ་ཚབ་དོན་གཅོད་ཀརྨ་སེང་གེ་ལགས་དང་དྲུང་ཆེ་ལྷ་དབང་རྒྱལ་པོ་ལགས་རྣམ་གཉིས་ཀྱང་རྒྱལ་སྤྱིའི་ཕ་སྐད་ཉིན་མོ་སྲུང་བརྩི་མཛད་སྒོར་མཉམ་ཞུགས་གནང་ཡོད་པ་བཅས།།