༄༅། །འདི་གར་ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༢ ཚེས་ ༩ ནས་ ༡༤ བར་ཐའེ་ཝན་རྒྱལ་ས་ཐའེ་པེ་གྲོང་ཁྱེར་ནང་ ༼ཡིག་ཀློག་སྤྱི་དམངས་དཔེ་དེབ་འགྲེམས་སྟོན།༽ ཞེས་པ་ཞིག་གཙོ་བོ་ཐའེ་ཝན་གྱི་གཞུང་ཁོངས་མིན་པ་རང་དབང་དཔེ་སྐྲུན་མནའ་མཐུན་ཚོགས་པ་སོགས་ནས་གཙོ་གཉེར་གནང་བ་ཞིག་ཡིན་པ་དང་། ཐེངས་འདིའི་དཔེ་དེབ་ཀྱི་འགྲེམས་སྟོན་ནང་ཐའེ་ཝན་གྱི་དཔེ་སྐྲུན་ཁང་དང་། གཞུང་ཁོངས་མིན་པའི་ཚོགས་པ་ཁག་གཅིག་མཉམ་ཞུགས་གནང་ཡོད་པ་རེད།
ཐའེ་ཝན་བོད་ཀྱི་སྐུ་ཚབ་དོན་གཅོད་ལས་ཁུངས་ཀྱི་སྟངས་འཛིན་འོག་ཡོད་པའི་གངས་ལྗོངས་དཔེ་སྐྲུན་ཁང་ཡང་ཐེངས་འདིའི་དཔེ་དེབ་ཀྱི་འགྲེམས་སྟོན་ཁོངས་མཉམ་ཞུགས་གནང་བ་མ་ཟད། མཉམ་ཞུགས་གནང་མཁན་ཚོགས་སྡེ་ཚང་མར་ཆུ་ཚོད་གཅིག་རིང་གི་ལེགས་སྦྱར་གྱི་གོ་སྐབས་ཡོད་པ་ལྟར། ཕྱི་ཚེས་ ༡༣ རེས་གཟའ་ཉི་མའི་དགོང་དྲོ་ཆུ་ཚོད་ ༥ ནས་ ༦ བར་ཀུན་གསལ་འོད་སྣང་དུས་དེབ་ཀྱི་རྩོམ་སྒྲིག་པ་བོད་མིང་བློ་བཟང་ཆོས་སྐྱིད་ལགས་ཀྱིས་གཙོ་སྐྱོང་དང་། གངས་ལྗོངས་དཔེ་སྐྲུན་ཁང་གི་འགན་འཛིན་ལྕམ་ལེའི་གཡུས་ཉིང་ལགས་ཀྱིས་རྒྱ་ཡིག་ཐོག་ཕབ་བསྒྱུར་གནང་བ་གངས་ལྗོངས་དེབ་ཕྲེང་ ༣༨ པ་སྟེ་ར་ཤེ་ཡའི་རྩོམ་པ་པོ་སྐུ་ཞབས་ཨེལ་ཀུཛ་མིན་ལགས་ཀྱིས་བརྩམས་པའི་༼སྦས་པའི་བོད། བོད་ཀྱི་རང་བཙན་དང་བཙན་འཛུལ་གྱི་ལོ་རྒྱུས།༽ ཞེས་པའི་དཔེ་དེབ་ངོ་སྤྲོད་གནང་བ་རེད།
ཐའེ་ཝན་ནང་ལོ་ལྟར་གཞི་རྒྱ་ཆེ་བའི་ཐའེ་པེ་རྒྱལ་སྤྱིའི་དཔེ་དེབ་འགྲེམས་སྟོན་ཞེས་པ་ཚོགས་ཀྱི་ཡོད་པ་དང་། ཕྱི་ལོ་ ༢༠༡༧ ལོ་ནས་བཟུང་ཐའེ་ཝན་རིག་གཞུང་ལྷན་ཁང་ནས་འགྲོ་གྲོན་བཏང་སྟེ། རྒྱལ་སྤྱིའི་དཔེ་དེབ་འགྲེམས་སྟོན་ཚོགས་ཡུལ་ནང་ས་ཆ་ལོགས་སུ་གཡར་ནས་གཞུང་ཁོངས་མིན་པའི་ཚོགས་པ་ཁག་མཉམ་སྤྱོད་བྱེད་འཇུག་གི་ཡོད་པ་དང་། ཕྱི་ལོ་ ༢༠༢༠།༢༠༢༡ ལོ་གཉིས་ནད་ཡམས་ཀྱིས་རྐྱེན་པས་རྒྱལ་སྤྱིའི་དཔེ་དེབ་འགྲེམས་སྟོན་ཚོགས་མ་ཐུབ་ཀྱང་། གཞུང་ཁོངས་མིན་པའི་ཚོགས་པ་ཁག་ནས་གཞི་རྒྱ་ཆུང་བའི་དཔེ་དེབ་འགྲེམས་སྟོན་གཉེར་བཞིན་ཡོད་པ་ལྟར། གངས་ལྗོངས་དཔེ་སྐྲུན་ཁང་ཡང་རྟག་བཅར་མཉམ་ཞུགས་ཐོག་བོད་དོན་སྐོར་གྱི་གངས་ལྗོངས་དེབ་ཕྲེང་བཤམས་སྟོན་དང་དུས་མཉམ་བོད་དོན་ངོ་སྤྲོད་ཀྱི་གཏམ་བཤད་ཀྱང་སྤེལ་གྱི་ཡོད་པ་རེད།
ད་ཐེངས་དཔེ་དེབ་ངོ་སྤྲོད་ཀྱི་ལས་རིམ་ནང་སྐུ་ཚབ་དོན་གཅོད་དང་། ཐའེ་སྡོད་བོད་རིགས་ཚོགས་པའི་ཚོགས་གཙོ་བསྟན་འཛིན་རྣམ་དག་ལགས་ཀྱིས་གཙོས་བོད་དོན་ལ་དོ་སྣང་ཅན་འགའ་མཉམ་ཞུགས་གནང་ཡོད་པ་མ་ཟད། ཐའེ་སྡོད་བོད་རིགས་ཚོགས་པའི་ངོ་དེབ་ཐོག་ཐད་གཏོང་ཡང་གནང་ཡོད། །
