༄༅། །ཕྱི་ལོ་ ༢༠༢༢ ཟླ་ ༢ ཚེས་ ༢༤ རེས་གཟའ་ཕུར་བུ་ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༡༠༠ དེ་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་གཙོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་། སྨན་པ་བསྟན་འཛིན་རྣམ་གྲོལ་ལགས་བཅས་ཀྱིས་སྤེལ་གནང་སོང་།
དེ་ཡང་ཐོག་མར་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་གཙོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་གསུང་དོན། ད་བར་ནད་རླབས་དང་པོ་དང་གཉིས་པ། གསུམ་པ་བཅས་བྱུང་བ་རེད། བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་སུ་གྲངས་ཐོ་འབྱོར་བ་ལྟར་ན། ཕྱི་ལོ་ ༢༠༢༢ ཟླ་བ་དང་པོ་ནས་འགོ་བཙུགས་ཏེ་ད་བར་རྒྱ་གར་དང་བལ་ཡུལ་ནང་གི་བཙན་བྱོལ་བོད་མི་ ༢༠༠༠ ཙམ་ལ་ནད་རླབས་གསུམ་པ་འདི་ཕོག་པའི་གནས་སྟངས་ཆགས་ཀྱི་འདུག བོད་མི་ ༢༠༠༠ ཙམ་ལ་ནད་ཡམས་འདི་ཕོག་པའི་ཁོངས་ནས་མི་གྲངས་ལྔ་ཙམ་འདས་གྲོངས་སུ་གྱུར་འདུག་པ་དེ་དག་དགུང་ལོ་བགྲེས་པོ་དང་བླ་གཉན་གྱི་ན་ཚ་ཡོད་པ་རེད་འདུག ད་ལྟའི་ཆར་རྒྱ་གར་དང་བལ་ཡུལ་ནང་ནད་ཡམས་གསར་པ་ཕོག་པ་མི་གྲངས་ ༧༠ ཙམ་ལས་མེད། འདས་པའི་ལོ་ངོ་གཉིས་ཙམ་རིང་དབུས་ཀྱི་ལས་བྱེད་དང་ས་གནས་ཀྱི་ལས་བྱེད། དེ་བཞིན་དགོན་སྡེ་ཁག་གི་ཕྱག་མཛོད་དང་བརྒྱ་དཔོན། སྤྱི་མི། ས་གནས་གཞོན་ནུ་དང་བུད་མེད་སོགས་གཞུང་ཁོངས་མིན་པའི་ཚོགས་པ་མང་དག་ཅིག་གིས་ནད་ཡམས་འདི་བཙན་བྱོལ་བོད་མིའི་སྤྱི་ཚོགས་ཁྲོད་ཁྱབ་བརྡལ་མི་འགྲོ་བ་དང་། ཁྱབ་བརྡལ་ཕྱིན་རྗེས་བོད་མིའི་ཚེ་སྲོག་མི་ཤོར་བའི་འབད་བརྩོན་ཉིན་མཚན་དུས་དྲུག་གནང་མཁན་ཡོངས་ལ་སྙིང་ཐག་པ་ནས་ཐུགས་རྗེ་ཆེ་ཞེས་ཞུ་རྒྱུ་ཡིན།
ཕྱི་ལོ་ ༢༠༢༢ ཟླ་ ༢ ཚེས་ ༡༡ ཉིན་དབུས་ཛ་དྲག་ལས་དོན་ཚོགས་ཆུང་ནས་ཡོངས་ཁྱབ་གསལ་བསྒྲགས་ཤིག་ཕུལ་བ་ཡིན། གསལ་བསྒྲགས་འདི་མ་འབུལ་སྔོན་ཛ་དྲག་ལས་དོན་ཚོགས་ཆུང་ནང་གྲོས་བསྡུར་གནང་སྟེ་གསལ་བསྒྲགས་ཟིན་བྲིས་གནང་ཟིན་པ་དང་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་ཡོངས་ལ་ཕུལ་ཏེ་གསར་འཇུག་དང་སྣོན་འཕྲི་བྱེད་རྒྱུ་ཡོད་མེད་གོ་བསྡུར་ཞུས་ཏེ་མཐར་ཕྱི་ཟླ་ ༢ ཚེས་ ༡༡ ཉིན་ཡོངས་ཁྱབ་གསལ་བསྒྲགས་ཕུལ་བ་ཡིན།
གསལ་བསྒྲགས་འདི་ཕུལ་དགོས་པའི་རྒྱུ་མཚན་གཙོ་བོ་ནི། འཛམ་གླིང་སྤྱི་དང་། ལྷག་པར་རྒྱ་གར་ནང་ཏོག་དབྱིབས་གཉན་རིམས་དང་འབྲེལ་བའི་ལས་དོན་བྱེད་ཕྱོགས་དེ་ཁྲིམས་དང་སྒྲིག་གཞི་མང་དག་ཅིག་འགྱུར་བ་འགྲོ་གི་ཡོད་སྟབས། བོད་མིའི་སྒྲིག་འཛུགས་ཀྱི་ཁྱབ་ཁོངས་སུ་ཡོད་པ་དེ་དག་འགྱུར་བ་འགྲོ་དགོས་ཀྱི་ཡོད་པར་གཟིགས་ནས་སློབ་སྟོན་གནང་མཁན་གྱིས་སློབ་སྟོན་དང་ཚོགས་འདུ་ཚོགས་ཏེ་གྲོས་བསྡུར་གནང་བ་རེད།
ས་གནས་སོ་སོའི་ཛ་དྲག་ལས་དོན་ཚོགས་ཆུང་གི་ཚོགས་གཙོ་ས་གནས་འགོ་འཛིན་ཚང་མའི་ངོས་ནས་ས་གནས་ཀྱི་གནས་སྟངས་ལ་གཞིག་པའི་ས་གནས་སོ་སོའི་འགོ་དབྱེ་ཟུར་འཇོག་ཁང་ཟུར་དུ་དགོས་མིན་དང་། ཏོག་དབྱིབས་གཉན་རིམས་གསོ་བཅོས་ཁང་ཟུར་དུ་དགོས་ཀྱི་འདུག་གམ་མི་འདུག དེ་དག་གི་སྐུ་དབང་ས་གནས་སོ་སོའི་ཛ་དྲག་ལས་དོན་ཚོགས་ཆུང་ལ་ཕུལ་ཟིན་པ་ཡིན། ས་གནས་སོ་སོའི་ཛ་དྲག་ལས་དོན་ཚོགས་ཆུང་སོ་སོས་དེའི་སྐོ་གོ་བསྡུར་དང་། མི་མང་ཕར་འགྲོ་ཚུར་འོང་བདེ་པོ་ཡོང་ཐབས་དང་ནད་ཡམས་ཁྱབ་བརྡལ་མི་འགྲོ་བའི་ཐབས་ཤེས་ཐོག་རྣམ་པ་ཚོ་ཚང་མས་གྲོས་བསྡུར་གནང་རོགས་ཞེས་ཡིག་ཐོག་ནས་འབོད་སྐུལ་ཞུས་པ་ནང་བཞིན་ད་རེས་ཡང་འབོད་སྐུལ་ཞུ་རྒྱུ་ཡིན།
ད་ལྟའི་ཆར་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་ནས་དམིགས་སུ་བཀར་ནས་ལྟ་རྟོགས་བྱེད་པའི་སྡེ་ཚན་དེ་སུ་རེད་དམ་ཞེ་ན། དགུང་ལོ་ ༦༠ ཡན་དང་། སྔོན་འགོག་སྨན་ཁབ་མ་བརྒྱབ་པ་རྣམས། དེ་བཞིན་དུས་ཡུན་བླ་གཉན་གྱི་ན་ཚ་སོགས་ཡོད་མཁན་རྣམས་ལ་ནད་རྟགས་ཕྲན་བུ་ཐོན་པ་ཡིན་ན། སོ་སོའི་ངོས་ནས་འགན་འཁྱེར་ཏེ་བརྟག་དཔྱད་གནང་རྒྱུ་དང་། སྨན་ཁང་སོ་སོའི་ངོས་ནས་བླ་གཉན་གྱི་ན་ཚ་ཡོད་མཁན་དང་དགུང་ལོ་ ༦༠ ཡན། སྔོན་འགོག་སྨན་ཁབ་མ་བརྒྱབ་པ་དེ་དག་ལ་དམིགས་སུ་བཀར་ནས་ལྷོད་གཡེང་མེད་པར་གཟིགས་རྟོགས་ནན་པོ་གནང་རོགས་ཞེས་ཡིག་ཐོག་འབོད་སྐུལ་ཞུས་པ་བཞིན་ད་རེས་སླར་ཡང་ཁྱབ་ཁོངས་སྨན་ཁང་ཆེ་འབྲིང་ཆུང་གསུམ་དང་འགན་འཁྱེར་མཁན་ཡོངས་ལ་འབོད་སྐུལ་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་གྲུབ་མཚམས་རྡ་ས་བདེ་ལེགས་སྨན་ཁང་གི་སྨན་པ་བསྟན་འཛིན་རྣམ་གྲོལ་ལགས་ཀྱིས་ལམ་སྟོན་གནང་དོན། སྤྱིར་ཏོག་དབྱིབས་གཉན་རིམས་ནད་ཡམས་ཕོག་སྟེ་བདུན་ཕྲག་གཉིས་ནང་ཚུད་དྲག་སྐྱེད་བྱུང་གི་ཡོད་པ་རེད། འོན་ཀྱང་ཁག་གཅིག་ལ་ནད་རྟགས་རྒྱུན་རིང་པོ་སྡོད་མཁན་ཡང་ཡོད། ནད་ཡམས་ཕོག་ནས་ཟླ་བ་གཅིག་ལྷག་ནད་རྟགས་བསྡད་པ་ཡིན་ན་དེ་ལ་ (Long Covid/Post Covid syndrome) ཞེས་བརྗོད་ཀྱི་ཡོད།
ཏོག་དབྱིབས་གཉན་རིམས་ཕོག་པ་ཡིན་ན་གཙོ་བོ་གློ་བར་སྐྱོན་རྒྱག་གི་ཡོད། འོན་ཀྱང་སྙིང་དང་། མཁལ་མ། རྩ་སོགས་ལའང་སྐྱོན་རྒྱག་གི་ཡོད། ད་ལྟའི་ཆར་རྒྱ་གར་ནང་་ཏོག་དབྱིབས་གཉན་རིམས་ཀྱི་གནས་སྟངས་བཟང་དུ་འགྲོ་གི་ཡོད། འདས་པའི་ཆུ་ཚོད་ ༢༤ ནང་རྒྱ་གར་དུ་ནད་གཞི་གསར་པ་ཕོག་མཁན་མི་གྲངས་སྟོང་ཕྲག་བཅུ་བཞི་དང་བརྒྱ་དང་བཞི་བཅུ་ཞེ་བརྒྱད་བྱུང་འདུག་པ་དང་། ནད་ཡམས་འདི་ལ་བརྟེན་ནས་མི་གྲངས་གསུམ་བརྒྱ་གཉིས་འདས་གྲོངས་སུ་གྱུར་འདུག ཅེས་སོགས་ཀྱི་ལམ་སྟོན་གནང་སྟེ་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༡༠༠ དེ་མཇུག་སྒྲིལ་གནང་ཡོད། །
