༄༅། །ཕྱི་ལོ་ ༢༠༢༢ ཟླ་བ་ ༠༢ ཚེས་ ༡༦ ཉིན་ཤི་ལོང་ས་གནས་འགོ་འཛིན་པདྨ་དོན་གྲུབ་ལགས་ཀྱིས་མེ་གྷཱ་ལཡ་མངའ་སྡེའི་སྲིད་སྐྱོང་སཏྱ་པཱལ་མ་ལིཀ་མཆོག་དང་མཇལ་འཕྲད་གནང་ཡོད། མཇལ་འཕྲད་སྐབས་ས་གནས་འགོ་འཛིན་དང་ལྷན་དུ་ཕྱོགས་བཞུགས་སྤྱི་འཐུས་ཚེ་རིང་སྒྲོལ་མ་ལགས་དང་། དགའ་ལྡན་ཆོས་གླིང་དགོན་པའི་མཁན་རིན་པོ་ཆེ་མཆོག ས་གནས་འཐུས་ཚོགས་ཀྱི་ཚོགས་གཙོ་བཅས་ལྷན་བཅར་གྱིས་མངའ་སྡེའི་སྲིད་སྐྱོང་མཆོག་ལ་དཀར་གཙང་མཇལ་དར་དང་བཀའ་དྲིན་རྗེས་དྲན་གྱི་ཕྱག་རྟགས་ཕུལ་ཡོད། དེ་ཡང་སྐབས་དེར་ཕྱོགས་བཞུགས་སྤྱི་འཐུས་ཚེ་རིང་སྒྲོལ་མ་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་མངའ་སྡེའི་སྲིད་སྐྱོང་མཆོག་ལ་ཐུགས་རྗེ་ཆེ་ཞུས་པ་དང་སྦྲགས། འཚོགས་ལ་ཉེ་བའི་ཕྱི་ཟླ་གསུམ་པའི་གྲོས་ཚོགས་སྐོར་དང་། བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་གནང་བར་མངའ་སྡེའི་སྲིད་སྐྱོང་མཆོག་གིས་བོད་མི་ཡོངས་ལ་གདུང་སེམས་མཉམ་སྐྱེ་ཞུས་གནང་ཡོད། 

ས་གནས་འགོ་འཛིན་པདྨ་དོན་གྲུབ་ལགས་ཀྱིས་འཕགས་བོད་གཉིས་ཀྱི་ཆོས་ཕྱོགས་ཀྱི་འབྲེལ་བའི་སྐོར་ངོ་སྤྲོད་དང་། བོད་དུ་ནང་པ་སངས་རྒྱས་པའི་བསྟན་པའི་འོད་སྣང་སྤེལ་མཁན་དཔལ་ནཱ་ལེནྡྲའི་མཁས་གྲུབ་གཉིས་ལྡན་གྱི་སྐྱེས་ཆེན་དམ་པ་རྣམས་ལ་རྗེས་དྲན་ཞུས་ཡོད། མངའ་སྡེའི་སྲིད་སྐྱོང་མཆོག་གིས་དེ་སྔ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་མཇལ་འཕྲད་ཞུས་པ་ཕྱིར་དྲན་གནང་ཞིང་། མགོན་པོ་མཆོག་དང་ལྷན་དུ་སྐྱེལ་བའི་དུས་དེ་ནི་བདེ་སྐྱིད་སྣང་བས་ཁྱབ་པའི་དུས་ཤིག་ཡིན་སྐོར་གསུངས། གཞན་ཡང་མཇལ་འཕྲད་སྐབས་ཕྱོགས་བཞུགས་སྤྱི་འཐུས་དང་ས་གནས་འགོ་འཛིན་རྣམ་གཉིས་ནས་མངའ་སྡེའི་སྲིད་སྐྱོང་མཆོག་ལ་ད་ལྟ་གསར་བཞེངས་གནང་བཞིན་པའི་དགོན་པའམ་རིག་གཞུང་བསྟི་གནས་ཁང་གི་སྐོར་འགྲེལ་བརྗོད་དང་། བསྟི་གནས་ཁང་དེ་བརྒྱུད་བྱམས་སྙིང་རྗེ་དང་། བཟོད་སྒོམ། བག་ཡོད། ཞི་བདེ། འཚེ་བ་མེད་པ་གཞི་ལ་བཞག་པའི་དཔལ་ནཱ་ལེནྡྲའི་ལྟ་གྲུབ་རིག་གནས་ཁྱབ་སྤེལ་བཏང་སྟེ་བྱམས་བརྩེ་དང་ཞི་བདེའི་སྤྱི་ཚོགས་ཤིག་བསྐྲུན་རྒྱུའི་དམིགས་ཡུལ་ཡོད་སྐོར་གསུངས། རིག་གཞུང་བསྟི་གནས་ཁང་གསར་པའི་དགོས་དམིགས་དེ་དག་ལ་མངའ་སྡེའི་སྲིད་སྐྱོང་མཆོག་གིས་བསྔགས་བརྗོད་གནང་ཡོད། 

མཐར་ཕྱོགས་བཞུགས་སྤྱི་འཐུས་དང་ས་གནས་འགོ་འཛིན་རྣམ་གཉིས་ནས་རྒྱ་གར་དབུས་དང་མངའ་སྡེ་གཞུང་གཉིས་ནས་བོད་མི་རྣམས་ལ་རྒྱབ་སྐྱོར་རོགས་འདེགས་གནང་བར་ཐུགས་རྗེ་ཆེ་ཞུས་ཡོད་པ་བཅས།།