༄༅། །ཕྱི་ལོ་ ༢༠༢༢ ཟླ་བ་ ༡ ཚེས་ ༨ ནས་ ༩ བར་ཨོསྟྲི་ལི་ཡཱ་བོད་རིགས་ཚོགས་པའི་འགན་འཛིན་ལྷན་ཚོགས་ཐེངས་དྲུག་པ་ནའུ་ར་ (Nowra) རུ་ཚོགས་ཡོད་པ་དང་། འགན་འཛིན་ལྷན་ཚོགས་སུ་ཀེན་བྷེ་ར་ (Canberra) དང་། སིཊ་ནི། (Sydney) ཁུ་ཡིན་ལེནཊ། (Queensland) ཝིག་ཀྲོ་རི་ཡ། (Victoria) ནིའུ་ཀཱ་སལ། (Newcastle)  ནའུ་ར་ (Nowra) བཅས་ཀྱི་བོད་རིགས་ཚོགས་པའི་ཚོགས་གཙོ་དང་ཚོགས་མི་ལྷན་བཅར་ཞུས་ཡོད་པ་རེད། 

དེ་ཡང་སྤྱི་ནོར་༧གོང་ས་༧སྐྱབས་མགོན་རྒྱལ་བའི་དབང་པོ་མཆོག་གི་སྐུ་པར་མཐོང་གྲོལ་རིན་པོ་ཆེར་ལྷ་རས་དཀར་གཙང་མཇལ་དར་སྒྲོན་འབུལ་ཞུས་པ་དང་ལྷན་ཚོགས་འདུ་དབུ་འཛུགས་ཞུས་ཤིང་། དེ་ནས་བོད་དང་ཨོསྟྲི་ལི་ཡ་གཉིས་ཀྱི་རྒྱལ་གླུ་བཏང་གྲུབ་རྗེས་རྒྱ་ནག་གཞུང་གི་བཙན་གནོན་འོག་འདས་གྲོངས་གྱུར་པའམ་སྡུག་སྦྱོང་མྱངས་དང་མྱོང་བཞིན་པའི་བོད་མི་རྣམས་ཀྱི་ཆེད་སྐར་མ་གཅིག་རིང་ངག་བཅད་ཀྱིས་མྱ་ངན་གུས་འདུད་ཞུས་ཡོད། ཚོགས་འདུའི་ཐོག་མར་ཨོསྟྲི་ལི་ཡ་བོད་རིགས་སྤྱི་མཐུན་ཚོགས་པའི་ཚོགས་གཙོ་སྐལ་བཟང་ཡོན་ཏན་ལགས་ཀྱིས་ཚོགས་པའི་ལོ་གཉིས་རེའི་མཚམས་ཀྱི་ལས་བསྡོམས་སྙན་སྒྲོན་ཞུས་རྗེས་ས་གནས་ཚོགས་པ་སོ་སོའི་ལས་བསྡོམས་སྒྲོགས་སྦྱང་གནང་གྲུབ་མཚམས། ཨོསྟྲི་ལི་ཡ་སྐུ་ཚབ་དོན་གཅོད་ཁང་གི་དྲུང་ཆེ་ལྷ་དབང་རྒྱལ་པོ་ལགས་ཀྱིས་ཉེ་ལམ་བོད་མིའི་སྒྲིག་འཛུགས་ཀྱིས་བཏོན་པའི་དཔྱ་དངུལ་དང་འབྲེལ་བའི་ལམ་སྟོན་གསར་པ་ངོ་སྤྲོད་གནང་། སྐབས་དེར་སྐུ་མགྲོན་གཙོ་བོ་སྐུ་ཚབ་དོན་གཅོད་ཀརྨ་སེངྒེ་ལགས་ཀྱིས་ཚོགས་བཅར་བ་རྣམས་ལ་ཆབ་སྲིད་མི་སྣར་བོད་དོན་ཞུ་གཏུག་གནང་རྒྱུ་དང་། བོད་མི་ནང་ཁུལ་འཆམ་མཐུན་རྡོག་རྩ་ཆིག་སྒྲིལ་དགོས་རྒྱུ། དེ་བཞིན་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་གནང་རྒྱུ། གཞོན་སྐྱེས་རྣམས་ནས་བོད་ཀྱི་འཐབ་རྩོད་ནང་མཉམ་ཞུགས་གནང་རྒྱུ་གལ་གནད་ཆེ་ཚུལ་སྐོར་གསུང་བཤད་གནང་། ཚོགས་འདུའི་དམིགས་བསལ་སྐུ་མགྲོན་བོད་མི་མང་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་ཀྱི་གསུང་བཤད་ནང་། ཚོགས་མི་རྣམས་ནས་ས་གནས་སོ་སོར་བོད་མི་འདུ་འཛོམས་གནང་སྐབས་མང་ཚོགས་ནས་ཁོང་ཉིད་བརྒྱུད་ཞུ་འདོད་ཡོད་པའི་བསམ་ཚུལ་དང་། དཀའ་ངལ་ཇི་ཡོད་བསྡུ་རུབ་གནང་སྐྱོང་ཡོང་བའི་རེ་སྐུལ་གནང་ཡོད། 

ཐེངས་འདིའི་ཚོགས་འདུའི་ནང་གྲོས་གཞི་སྣ་ཚོགས་ཐོག་གྲོས་བསྡུར་གནང་ཡོད་ཅིང་། དེའི་ནང་ནས་གཙོ་ཆེ་ཁག་ནི་བོད་ཀྱི་བདེན་དོན་ཆེད་རང་སྲོག་བློས་བཏང་གནང་མཁན་རྒྱས་གཅེས་པ་ ༡༥༧ གཙོས་པའི་བོད་ནང་གི་བོད་མི་རྣམས་ལ་གདུང་སེམས་མཉམ་སྐྱེ་ཞུ་རྒྱུ་དང་། ཨོསྟྲི་ལི་ཡའི་ནང་དུ་བོད་དོན་ཞུ་གཏུག་ཤུགས་ཆེར་གཏང་རྒྱུ། ཉེ་ལམ་བོད་མིའི་སྒྲིག་འཛུགས་ཀྱིས་དབུ་འཛུགས་གནང་པའི་དང་བླངས་བོད་དོན་ཞུ་གཏུག་ལས་གཞིར་ཕྱར་གྲུ་མཉམ་འདེགས་གནང་རྒྱུ་སོགས་ཡིན། ཕྱོགས་མཚུངས་ཚོགས་བཅར་བ་རྣམས་ནས་དང་བླངས་དཔྱ་དངུལ་ལག་དེབ་དང་ལག་དེབ་སྔོན་པོ་བརྒྱུད་དཔྱ་དངུལ་དང་ཞལ་འདེབས་གནང་གལ་ཆེ་བའི་སྐོར་ཡང་གྲོས་བསྡུར་གནང་ཡོད་པ་རེད། བགྲོ་གླེང་དང་བཅས་ཚོགས་བཅར་བ་རྣམས་ཀྱིས་དེ་སྔའི་གྲོས་ཆོད་ཁག་ལ་སྐྱར་ཞིབ་གནང་རྗེས། གྲོས་ཆོད་གསར་པ་བཅུ་བཞི་གཏན་འབེབས་གནང་བའི་ཁོངས་ཨོསྟྲི་ལི་ཡ་གཞུང་དང་གྲོས་ཚོགས་ཀྱིས་རྒྱ་ནག་གཞུང་ལ་པཎ་ཆེན་རིན་པོ་ཆེ་མཆོག་གིས་དབུས་བོད་ནང་གི་ཆབ་སྲིད་བཙོན་པ་རྣམས་གློད་བཀྲོལ་གཏོང་སླད་སྐུལ་མ་གཏང་རྒྱུ་དང་། བོད་ནང་ཆོས་དད་རང་དབང་དང་འགྲོ་བ་མིའི་ཐོབ་ཐང་རྡོག་རོལ་རྩིས་མེད་གཏོང་བཞིན་པར་ཐུགས་ཁུར་ཆེ་བཞེས་དགོས་པའི་ཞུ་སྐུལ་གནང་རྒྱུ་སོགས་འཚུད་ཡོད། 

མཐར་ཨོསྟྲི་ལི་ཡ་བོད་རིགས་སྤྱི་མཐུན་ཚོགས་པའི་རྒྱུན་ལས་གསར་འདེམས་གྲུབ་པ་དང་སྦྲགས་ཚོགས་འདུ་ལེགས་པར་མཇུག་སྒྲིལ་ཞིང་། རྒྱུན་ལས་གསར་པའི་ཚོགས་གཙོར་སྐལ་བཟང་ཚེ་རིང་ལགས་དང་། དྲུང་ཆེར་མགུར་འབུམ་རྒྱལ་ལགས་བསྐོ་བཞག་བྱུང་ཡོད། 

སྐབས་དེར་སྐུ་ཚབ་དོན་གཅོད་ཀརྨ་སེང་གེ་ལགས་དང་བོད་མི་མང་སྤྱི་འཐུས་རྡོ་རིང་བསྟན་འཛིན་རྡོ་རྗེ་ལགས་རྣམ་གཉིས་ཀྱིས་ནའུ་ར་ཁུལ་དུ་ཡོད་པའི་བོད་མི་རྣམས་དང་ཐུག་འཕྲད་ཀྱིས་བོད་རིགས་ཚོགས་པས་གོ་སྒྲིག་ཞུས་པའི་དུས་ཆེན་འདུ་འཛོམས་ཁག་ལ་བཅར་རྒྱུ་དང་། བོད་མི་ནང་ཁུལ་འཆམ་འཐུན་དགོས་རྒྱུ། བོད་ལ་ཤ་ཞེན་ཡོད་པའི་གཞོན་སྐྱེས་གསོ་སྐྱོང་གནང་གལ་ཆེ་བའི་སྐོར་གསུངས་ཡོད་པ་བཅས།།