༄༅། །ཨིས་ཀོཊ་ལེནཊ་གྲོས་ཚོགས་ཀྱི་སྲིད་དོན་ཚོགས་པ་མཉམ་འབྲེལ་གྱི་བོད་དོན་རྒྱབ་སྐྱོར་ཚོགས་པའི་ཟླ་གསུམ་རེའི་མཚམས་ཀྱི་ཚོགས་འདུ་དེ་བཞིན་ཕྱི་ལོ་ ༢༠༢༢ ཟླ་བ་ ༠༡ ཚེས་ ༢༨ ཉིན་དྲ་ཐོག་ཚོགས་ཡོད།

དེ་ཡང་ཚོགས་པའི་འབྲེལ་མཐུད་པ་ལྕམ་མཱར་སི་ཊིས་ཝི་ལལ་བ་ (Mercedes Villalba MSP) ལགས་ཀྱིས་གཙོ་སྐྱོང་དང་། དྲུང་ཆེ་ལྕམ་ཨི་ལི་ཡ་ནོར་བར་ནི་རོ་སིན་གི་རིན་(Eleanor Byrne-Rosengren) ལགས་ཀྱི་སྟངས་འཛིན་འོག་ཚོགས་འདུ་སྐར་མ་ ༩༠ རིང་ཚོགས་ཡོད་པ་རེད། 

གཙོ་སྐྱོང་བས་ཚོགས་མི་རྣམས་ལ་དགའ་བསུ་དང་སྦྲགས་ཚོགས་བཅར་གནང་བར་ཐུགས་རྗེ་ཆེ་ཞུས་གྲུབ་མཚམས་ཚོགས་འདུ་སྔོན་མའི་ཚིག་ཐོ་སྒྲོགས་སྦྱང་ཞུས་ཏེ་གཏན་འབེབས་དང་། ད་ཐེངས་ཀྱི་ཚོགས་འདུའི་གྲོས་གཞི་ངོ་སྤྲོད་གནང་། དྲུང་ཆེ་ལྕམ་ཨི་ལི་ཡ་ནོར་ལགས་ཀྱིས་ཚོགས་མི་རྣམས་ལ་རྒྱ་ནག་ཏུ་འཚོགས་འཆར་ཡོད་པའི་དགུན་ཁའི་ཨོ་རྩེད་འགྲན་ཚོགས་ལ་ངོ་རྒོལ་ལས་འགུལ་ཇི་སྤེལ་ཐད་དང་། སླེབས་ལ་ཉེ་བའི་གསུམ་ཅུའི་དུས་དྲན་གྱི་འཆར་གཞི་ཁག་སྙན་སེང་ཞུས། 

ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཆེ་རིང་ལགས་ཀྱིས་ཟླ་བ་སྔོན་མར་རྒྱ་ནག་དགུན་ཁའི་ཨོ་རྩེད་འགྲན་ཚོགས་ལ་ངོ་རྒོལ་ལས་འགུལ་དང་། བོད་དོན་ཞུ་གཏུག་ཤུགས་ཆེར་གཏོང་སླད་ཕ་རཱན་སིའི་རྒྱལ་ས་པེ་རི་སིར་ཚོགས་པའི་ཡུ་རོབ་བོད་རིགས་སྤྱི་མཐུན་ཚོགས་པ་ཁག་གི་ཚོགས་འདུའི་སྐོར་གསུངས། སྐུ་ཚབ་དོན་ཁང་གི་འབྲེལ་ཡོད་ལས་བྱེད་ཚེ་རིང་མཚོ་མོ་ལགས་ཀྱིས་ཚོགས་མི་རྣམས་ལ་རིང་མིན་ཕྱི་ཟླ་བདུན་པའི་ནང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དང་སྟབས་བསྟུན་མགོན་པོ་གང་གི་མཛད་རྣམ་དང་ཐུགས་བསྐྱེད་དམ་བཅའ་བཞིའི་སྐུ་པར་འགྲེམས་སྟོན་གནང་འཆར་ཡོད་སྐོར་ངོ་སྤྲོད་གནང་ཡོད། 

བོད་གནས་ལྟ་ཞིབ་ཁང་གི་ལས་བྱེད་བསྟན་འཛིན་ཆོས་སྐྱིད་ལགས་ཀྱིས་བོད་ནང་འགྲོ་བ་མིའི་ཐོབ་ཐང་རྡོག་རོལ་མུ་མཐུད་གཏོང་གི་ཡོད་པ་དང་། བོད་ཀྱི་རྩོམ་པ་པོ་འགའ་ཤས་གར་སོང་ཆ་མེད་གྱུར་པ། གཞན་རྣམས་འཛིན་བཟུང་བྱས་ཡོད་སྐོར་འགྲེལ་བརྗོད་གནང་། བོད་ནང་བོད་མི་མང་པོ་ཞིག་རང་གི་ཆོས་དང་། སྐད་ཡིག་རིག་གཞུང་སྲུང་སྐྱོབ་བྱེད་པར་རྒྱ་གཞུང་གིས་ཁྲིམས་མེད་ལུང་མེད་ཐོག་འཛིན་བཟུང་བྱེད་ཀྱི་ཡོད་པ་རེད། 

བོད་དོན་ལས་འགུལ་བསྟི་གནས་ཁང་གི་འགན་འཛིན་བཀྲས་ཐོང་ལྷ་སྒྲོན་ལགས་ཀྱིས་ཚོགས་མི་རྣམས་ལ་བོད་དོན་ལས་འགུལ་བསྟི་གནས་ཁང་གི་སྙན་ཐོ་གསར་ཤོས་ཀྱི་ནང་དོན་ངོ་སྤྲོད་དང་སྦྲགས། ཞིབ་འཇུག་ནང་གསལ་ལྟར་ན། བོད་ཁྱོན་ཡོངས་ནང་གི་རང་ལོ་ ༦ ནས་ ༡༨ བར་གྱི་བྱིས་པ་འབུམ་བརྒྱད་ཙམ་རང་གི་ཕ་མ་དང་། སྤྱི་ཚོགས་ནས་ཁ་བྲལ་དུ་བཏང་ནས་གཏན་འཇག་སློབ་གྲྭར་སློབ་འཇུག་བྱས་ཡོད་པ་དང་། ཕྲུ་གུ་དང་ཕ་མ་བར་འབྲེལ་བ་དེ་ཙམ་བྱེད་འཇུག་གི་མེད་ཚུལ་གསུངས།

ཁོང་མོས་རྒྱ་ནག་གཞུང་གིས་བོད་ཀྱི་ངོ་བོ་དང་རིག་གཞུང་རྩ་མེད་གཏོང་བར་བོད་མི་ན་གཞོན་རྣམས་ལ་དམིགས་པའི་སྲིད་བྱུས་ལ་ཐུགས་ཚབས་དང་འབྲེལ། གནད་དོན་དེ་རིགས་རྒྱལ་སྤྱིའི་སྡིངས་ཆའི་སྟེང་སླེབས་ཆེད་ཚོགས་པའི་རྒྱབ་སྐྱོར་གནང་སྐྱོང་ཡོང་བའི་རེ་སྐུལ་ཞུས། ཚོགས་མི་རྣམས་ཀྱིས་བོད་ནང་གི་གནས་སྟངས་ལ་ཐུགས་ཚབས་དང་བོད་དོན་ལ་རྒྱབ་སྐྱོར་གཙང་མ་ཡོད་སྐོར་གསུངས།

མཐའ་དོན་ཚོགས་པའི་དྲུང་ཆེས་མཇུག་བསྡུའི་གསུང་བཤད་དང་སྦྲགས་ཚོགས་འདུ་རྒྱལ་ཁའི་ངང་གྲོལ་ཡོད་པ་བཅས།།