༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཕྱི་ལོ་ ༢༠༢༡ ཟླ་ ༡༢ ཚེས་ ༢༡ ཉིན་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛ་ར་ཛེ་ཡ་མཆོག་བོད་དོན་དམིགས་བསལ་འབྲེལ་མཐུད་པར་བསྐོ་བཞག་བྱུང་བར་འཚམས་འདྲི་གནང་པར་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛ་ར་ཛེ་ཡ་མཆོག་གིས་ཐུགས་རྗེ་ཆེ་ཞུའི་གསུང་འཕྲིན་ཞིག་གནང་འདུག ད་ཐེངས་ཀྱི་ཕྱག་བྲིས་དེ་བཞིན་ཁོང་མོ་བོད་དོན་དམིགས་བསལ་འབྲེལ་མཐུད་པར་བསྐོ་བཞག་བྱུང་རྗེས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་ལ་གནང་བའི་ཕྱག་བྲིས་ཐོག་མ་དེ་ཆགས་ཡོད།

དེ་ཡང་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་ལ་བསྐུར་གནང་བའི་ཕྱག་བྲིས་ནང་འཁོད་དོན། ཁོ་མོ་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་བཞག་བྱུང་རྗེས་ཕྱི་ལོ་ ༢༠༢༡ ཟླ་བ་ ༡༢ ཚེས་ ༢༡ ཉིན་འཚམས་འདྲིའི་ཕྱག་བྲིས་ཤིག་གནང་སོན་བྱུང་བར་ཐུགས་རྗེ་ཆེ་ཞུ་རྒྱུ་ཡིན། ངས་ཀྱང་སྐུ་ཉིད་ཕྱི་ལོ་ ༢༠༢༡ ལོར་སྲིད་སྐྱོང་དུ་བདམས་ཐོན་བྱུང་བར་འཚམས་འདྲིའི་བཀྲ་ཤིས་བདེ་ལེགས་ཡོད། 

ཨ་རི་གཞུང་ངོས་ནས་རྒྱ་ནག་མི་མང་སྤྱི་མཐུན་རྒྱལ་ཁབ་དང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གམ་མགོན་པོ་གང་ཉིད་ཀྱི་སྐུ་ཚབ་ཡང་ན་བོད་མིའི་དབུ་ཁྲིད་ལྷན་དུ་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་འབྲེལ་མོལ་སླར་གསོ་ཐུབ་པའི་རེ་འདོད་ཆེ། ང་ཚོས་བོད་མིའི་འགྲོ་བ་མིའི་ཐོབ་ཐང་སྲུང་སྐྱོབ་དང་ཁྱེད་ཚོའི་ཐུན་མོང་མ་ཡིན་པའི་ལོ་རྒྱུས་དང་། སྐད་ཡིག ཆོས། རིག་གཞུང་གི་ངོ་བོ་མི་ཉམས་རྒྱུན་འཛིན་ཆེད་རྒྱབ་སྐྱོར་ཞུ་རྒྱུར་འགྱུར་བ་གཏན་ནས་མེད། བོད་མི་སྐྱབས་བཅོལ་བ་རྣམས་ལ་མི་སྤྱོད་བདེ་རྩའི་རོགས་སྐྱོར་མཁོ་སྤྲོད་བྱ་རྒྱུ་བྱུང་བར་ང་ཚོ་སྤོབས་པ་ཆེ་ཞིང་། སླད་མར་ཡང་མུ་མཐུད་གནད་དོན་དེ་ཚོའི་ཐོག་མཉམ་ལས་བྱ་རྒྱུའི་དམིགས་ཡུལ་ཡོད།

གཞན་ཡང་ང་ཚོས་བོད་ནང་འགྲོ་འོང་གུ་ཡངས་སུ་གཏོང་རྒྱུ་དང་། བོད་མཐོ་སྒང་གི་ཁོར་ཡུག་དང་ཆུའི་མཐོན་ཁུངས་སྲུང་སྐྱོབ་བྱ་རྒྱུར་འབད་རྩོལ་ཞུ་རྒྱུ་ཡིན། ཞེས་འཁོད་ཡོད། ཁོང་མོའི་ཕྱག་བྲིས་གནང་སོན་བྱུང་མ་ཐག་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཕྱི་ལོ་ ༢༠༢༢ ཟླ་ ༡ ཚེས་ ༡༩ ཉིན་སྤྱི་ཚོགས་རྒྱ་ལམ་ཊུའི་ཊར་བརྒྱུད་ཐུགས་རྗེ་ཆེ་ཞུས་འདུག་ཅིང་། དེར་ཁོང་གིས་ཁྱེད་ཀྱི་ཕྱག་བྲིས་དང་འཚམས་འདྲི་གནང་བར་ཐུགས་རྗེ་ཆེ། ཉེ་ལམ་ཁྱེད་ཀྱིས་བོད་མིའི་སྐུ་ཚབ་ལྷན་དུ་འབྲེལ་བ་གནང་བར་དགའ་བསུ་ཞུ་རྒྱུ་ཡིན། སླད་མར་གང་མྱུར་སྐུ་ཉིད་དངོས་སུ་མཇལ་ནས་ང་ཚོས་བོད་དོན་ཤུགས་ཆེར་གཏོང་སླད་འབད་རྩོལ་སྔར་ལྷག་ཞུ་རྒྱུའི་དམིགས་ཡུལ་ཡོད་ཅེས་བཀོད་གནང་འདུག །

                                                                              ཕྱག་བྲིས་ཀྱི་མ་གཞི་ཨིན་ཡིག་ཡིན་གཤིས་ནང་དོན་ལ་ཧེ་བག་འདུག་ན་ཨིན་ཡིག་ལ་རྩ་འཛིན་ཡོང་བ་ཞུ།