༄༅། །ཕྱི་ལོ་ ༢༠༢༢ ཟླ་བ་ ༡ ཚེས་ ༡༤ ཉིན་བོད་མིའི་སྒྲིག་འཛུགས་ཀྱི་གཞུང་འབྲེལ་བརྙན་འཕྲིན་ཀྱི་བཅར་འདྲིར་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛ་ར་ཛེ་ཡ་མཆོག་གིས་ཨ་རི་གཞུང་ནས་བོད་ནང་འགྲོ་བ་མིའི་ཐོབ་ཐང་གནས་བབ་ཡར་རྒྱས་གཏོང་རྒྱུ་མཚོན། བོད་མི་ཡོངས་ལ་མིང་དོན་མཚུངས་པའི་རང་སྐྱོང་ཡོང་བར་རྒྱ་ནག་གཞུང་དང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གམ་མགོན་པོ་གང་ཉིད་མཆོག་གི་སྐུ་ཚབ་དང་ལྷན་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་གྲོས་མོལ་ཡོང་ཐབས་ཐད་རྒྱ་ནག་གཞུང་ལ་འབོད་སྐུལ་བྱེད་རྒྱུ་ཡིན་སྐོར་གསུངས་ཡོད། 

དེ་ཡང་ཁོང་མོས་བོད་དོན་དམིགས་བསལ་འབྲེལ་མཐུད་པའི་ལས་གནས་དེས་སྲིད་འཛིན་ཇོ་བྷའི་ཊེན་མཆོག་གི་ཕྱི་སྲིད་སྲིད་བྱུས་ནང་འགྲོ་བ་མིའི་ཐོབ་ཐང་དང་མང་གཙོའི་རིན་ཐང་རྩ་བར་བཟུང་ཡོད་པ་གསལ་པོ་ཡིན་པར་གསུངས་པ་མ་ཟད། ཁོང་མོ་རང་ཉིད་ནས་ལས་གནས་དེར་བསྐོ་གཞག་གནང་བ་གཞིར་བཟུང་རྒྱལ་སྤྱིའི་མི་མང་དང་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་ལས་ཀྱི་གནས་ཀྱི་སྣེ་མོ་བ་དང་མཇལ་མོལ་གྱིས་བོད་ནང་འགྲོ་བ་མིའི་ཐོབ་ཐང་གནས་བབ་ཡར་རྒྱས་གཏོང་རྒྱུ་དང་། བོད་མིའི་ཐུན་མོང་མ་ཡིན་པའི་ལོ་རྒྱུས་དང་ཆོས། རིག་གཞུང་། སྐད་ཡིག་གི་ཐོབ་ཐང་སྲུང་སྐྱོབ་ཆེད་ཕྱག་ལས་གནང་རྒྱུ་དང་། དེ་བཞིན་རྒྱ་ནག་གཞུང་ལ་༸རྒྱལ་བ་རིན་པོ་ཆེ་མཆོག་གིས་དབུས་བླ་ཆེན་རྣམ་པའི་ཡང་སྲིད་ངོས་འཛིན་ལ་ཐེ་བྱུས་མི་བྱེད་པའི་སྐུལ་མ་གཏོང་རྒྱུ་ཡིན་པ་གསུངས་ཡོད་པ་རེད། ཁོང་མོའི་ལས་འགན་ནང་ཨ་རིས་གཙོས་ཕྱི་ཡུལ་ན་ཡོད་པའི་བོད་མི་སྐྱབས་བཅོལ་བ་རྣམས་ལ་རྒྱ་ནག་གཞུང་གིས་དོགས་ཟོན་བྱ་ར་དང་ཐུབ་ཚོད་གཏོང་རྒྱུ་མཚམས་འཇོག་དགོས་པའི་འབོད་སྐུལ་བྱ་རྒྱུའང་འཚུད་ཡོད་པར་གསུངས། 

གཞན་ཡང་ཁོང་མོས།བྷ “ང་ཚོས་བོད་ནང་ཨ་རིའི་གཞུང་འབྲེལ་མི་སྣ་མཚོན་གཞུང་འབྲེལ་མི་སྣ་གཞན་དང་ཁྱེད་ལྟ་བུའི་གསར་འགོད་པ་རྣམས་དམ་བསྒྲགས་མེད་པར་འགྲོ་བསྐྱོད་ཆོག་པ་ཡོང་རྒྱུར་རྒྱ་ནག་གཞུང་ལ་འབོད་སྐུལ་བྱེད་ཀྱི་ཡོད། རྒྱ་ནག་གཞུང་གི་མི་སྣ་ཨ་རིར་དམ་བསྒྲགས་མེད་པར་འགྲོ་བསྐྱོད་ཆོག་པ་ཇི་བཞིན་རྒྱ་ནག་གཞུང་གིས་ཀྱང་ང་ཚོར་བོད་ནང་དེ་ལྟར་འགྲོ་བསྐྱོད་ཆོག་པའི་རང་དབང་སྤྲོད་དགོས། ང་ཚོས་བོད་མཐོ་སྒང་གི་ཁོར་ཡུག་དང་མི་འབུམ་ཕྲག་མང་པོའི་འཚོ་རྟེན་དུ་གྱུར་བའི་རྒྱུག་ཆུའི་འབྱུང་ཁུངས་སྲུང་སྐྱོབ་ཆེད་ལས་གཞི་སྤེལ་འདོད་ཡོད།”ཅེས་གསུངས། 

བོད་རྒྱ་འབྲེལ་མོལ་བསྐྱར་གསོ་ཡོང་ཐབས་ཐད་ཁོང་མོས་གསུང་དོན་ལ། ཨ་རི་གཞུང་དང་། གྲོས་ཚོགས། དེ་བཞིན་བློ་མཐུན་གྲོགས་པོ། རྒྱལ་སྤྱིའི་ནང་གི་སྲིད་གཞུང་ཁག་དང་མཉམ་སྦྲེལ་གྱིས་ཕྱག་ལས་གནང་འཆར་ཡོད་པ་དང་། བོད་རྒྱ་འབྲེལ་མོལ་སླར་གསོ་བྱ་རྒྱུ་དེ་ནི་བོད་དོན་དམིགས་བསལ་འབྲེལ་མཐུད་པའི་ལས་འགན་གལ་ཆེ་ཤོས་ཡིན་པ་མ་ཟད། དེའི་ཆེད་དུ་མུ་མཐུད་འབད་རྩོལ་ཞུ་འཆར་ཡོད་སྐོར་གསུངས། ཕྱོགས་མཚུངས་ཨ་རི་གཞུང་གིས་བོད་རྒྱ་འབྲེལ་མོལ་ལ་བརྟེན་ནས་བོད་མི་ཡོངས་ལ་མིང་དོན་མཚུངས་པའི་རང་སྐྱོང་བྱུང་ན། བོད་མིའི་ཆོས་དང་། རིག་གཞུང། སྐད་ཡིག་མི་ཉམས་རྒྱུན་འཛིན་བྱེད་ཐུབ་པའི་ཡིད་ཆེས་བྱེད་ཀྱི་ཡོད་པའང་གསུངས། 

རིང་མིན་རྒྱ་ནག་ཏུ་འཚོགས་འཆར་ཡོད་པའི་དགུན་ཁའི་ཨོ་རྩེད་འགྲན་ཚོགས་ལ་ཨ་རི་གཞུང་གི་ལངས་ཕྱོགས་ཇི་ཡིན་ཐད་བཀའ་འདྲི་ཞུས་པར། ལྕམ་ཨ་ཛ་ར་ཛེ་ཡ་མཆོག་གིས་ཨོ་རྩེད་འགྲན་ཚོགས་དང་འབྲེལ་བའི་ཐད་རྒྱ་ནག་གཞུང་ནས་ཤར་ཏུར་ཀིས་ཐན་དུ་མི་རིགས་སྡེབ་གསོད་ཀྱི་ལས་ངན་འཚབ་ཆེ་སྤེལ་བཞིན་པ་མ་ཟད། བོད་ཀྱིས་གཙོས་ཡུལ་ལུང་གཞན་ཁག་ཏུ་འགྲོ་བ་མིའི་ཐོབ་ཐང་རྡོག་རོལ་ཚད་མེད་བཏང་བར་ཨ་རི་གཞུང་གིས་གཞུང་ཚབ་དང་གཞུང་འབྲེལ་མི་སྣ་རྒྱ་ནག་དགུན་ཁའི་ཨོ་རྩེད་འགྲན་ཚོགས་ལ་གཏང་རྒྱུ་མིན་པའི་ཐག་གཅོད་གཙང་མ་གནང་ཡོད་ཅེས་ལན་འདེབས་གནང་། 

མཐར་ཁོང་མོས་སྲིད་འཛིན་བྷའི་ཊེན་མཆོག་དང་ཕྱི་སྲིད་དྲུང་ཆེ་བྷི་ལེང་ཀེན་མཆོག་གི་ཐག་གཅོད་ལྟར་ཁོང་མོ་ཨ་རིའི་བོད་དོན་དམིགས་བསལ་འབྲེལ་མཐུད་པར་བསྐོ་བཞག་གནང་བར་ཨ་རིའི་སྲིད་དོན་ཚོགས་པ་གཉིས་སྦྲེལ་གྱིས་རྒྱབ་སྐྱོར་ཚད་མཐོ་པོ་གནང་བར་དགའ་ཚོར་ཆེན་པོ་བྱུང་ཚུལ་གསུངས་ཡོད་པ་བཅས།།