༄༅། །བདག་ཉིད་ཆེན་པོ་གཱནདྷཱི་མཆོག་གི་དགོངས་རྫོགས་ཉིན་མོ་དང་སྟབས་བསྟུན་ཧིན་བོད་མཛའ་འབྲེལ་ཚོགས་པས་ཕྱི་ལོ་ ༢༠༢༢ ཟླ་བ་ ༡ ཚེས་ ༣༠ ཉིན་དྲ་ལམ་བརྒྱུད་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་འདུ་བསྐོང་ཚོགས་གནང་ཡོད། ཚོགས་འདུའི་དགོས་དམིགས་གཙོ་བོ་ནི་བོད་དོན་ཤུགས་ཆེ་རུ་གཏོང་ཆེད་བོད་དོན་རྒྱབ་སྐྱོར་ཚོགས་པ་ཁག་སྲ་བརྟན་དུ་གཏང་རྒྱུ་རེད་འདུག 

གོ་སྒྲིག་ཚོགས་ཆུང་གི་དྲུང་ཆེ་འབུམ་རམས་པ་མ་ནོཇ་ཀུ་མཱར་ལགས་ཀྱིས་ཕེབས་བསུ་དང་སྦྲགས་ཚོགས་མི་རྣམས་ལ་དྲ་ཐོག་ཚོགས་འདུའི་ལས་རིམ་རྣམ་གཞག་ངོ་སྤྲོད་གནང་། ཧིན་བོད་མཛའ་འབྲེལ་ཚོགས་པའི་རྒྱལ་ཡོངས་དྲུང་ཆེ་འབུམ་རམས་པ་ཨཱ་ནནྡ་ཀུ་མཱར་ལགས་ཀྱིས་ངོ་སྤྲོད་གསུང་བཤད་ནང་། ཧིན་བོད་མཛའ་འབྲེལ་ཚོགས་པས་རྒྱལ་ཡོངས་ཚོགས་འདུ་ཏོག་དབྱིབས་གཉན་རིམས་ཁྱབ་གདལ་ཆེ་བའི་དབང་གིས་གོ་སྒྲིག་ཞུ་ཐུབ་མེད་ནའང་། དེ་ལ་བརྟེན་ནས་བོད་དོན་རྒྱབ་སྐྱོར་ཚོགས་པ་ཁག་གིས་བོད་དོན་ལས་འགུལ་ལ་བར་ཆད་མ་འགྲོ་བ་གནང་དགོས། གནས་སྟངས་ལ་གཞིག་ནས་ཚོགས་མི་རྣམས་ཀྱིས་དུས་ནས་དུས་སུ་དྲ་ཐོག་བརྒྱུད་ཚོགས་འདུ་འཚོག་ནས་བགྲོ་གླེེང་དང་ལས་འཆར་བཀོད་སྒྲིག་གནང་དགོས་ཞེས་གསུངས། 

དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཞོན་ཟུར་པ་ཨཱ་ཅཱརྱ་ཡེ་ཤེས་ཕུན་ཚོགས་ལགས་ཀྱིས་བོད་ནང་གི་ད་ལྟའི་གནས་སྟངས་དང་། ཕྱི་ཡུལ་དུ་སྤེལ་བཞིན་པའི་བོད་དོན་རྒྱབ་སྐྱོར་ལས་འགུལ་ཁག་ངོ་སྤྲོད་གནང་། ཚོགས་འདུར་བཅར་ཞུགས་ཚོགས་མི་རྣམས་ནས་ཉེ་ལམ་ས་གནས་སོ་སོར་ལས་འགུལ་ཇི་སྤེལ་ཐད་ངོ་སྤྲོད་དང་། ལྷག་པར་ཏོག་དབྱིབས་ནད་ཡམས་ཁྱབ་གདལ་སྐབས་བོད་དོན་རྒྱབ་སྐྱོར་ཚོགས་པ་ཁག་ནས་ལས་འགུལ་ཇི་ལྟར་སྤེལ་དགོས་ཚུལ་ཐོག་བགྲོ་གླེང་དང་བསམ་ཚུལ་བརྗེ་ལེན་གནང་། ཕྱོགས་མཚུངས་ཚོགས་འདུ་འདིའི་ནང་རྒྱ་གར་མང་ཚོགས་ལ་བོད་དོན་གོ་རྟོགས་རྒྱ་ཆེར་སྤེལ་ཆེད་རྒྱ་གར་ནང་དུ་ཧིན་བོད་མཛའ་འབྲེལ་ཚོགས་པའི་ཡན་ལག་མང་དུ་གཏང་རྒྱུའི་ཐག་གཅོད་གནང་འདུག 

གཞན་ཡང་ཚོགས་འདུའི་ནང་བོད་རང་དབང་སླར་གསོའི་འགྲུལ་བཞུད་ཁྲོད་འདས་གྲོངས་སུ་གྱུར་བའི་ཧིན་བོད་མཛའ་འབྲེལ་ཚོགས་པའི་ཚོགས་མི་འབུམ་རམས་པ་དཱཨཱུཇཱི་གུཔྟཱ་ལགས་དང་། འབུམ་རམས་པ་ཇྱོ་ཏི་ཀར་ལགས། སྐུ་ཞབས་ཧ་རཱིཤ་ཨ་དྱཱལ་ཀར་ལགས་ཀྱིས་གཙོས་ཚེ་འདས་བོད་དོན་རྒྱབ་སྐྱོར་བ་རྣམས་ལ་རྗེས་དྲན་དང་ཐུགས་གསོ་ཞུས་འདུག  ཚོགས་འདུར་ཧིན་བོད་མཛའ་འབྲེལ་ཚོགས་པའི་ཡན་ལག་ས་གནས་ཉི་ཤུ་རྩ་ལྔའི་འབྲེལ་མཐུད་པ་དང་ཚོགས་མི་ཚོགས་བཅར་ཞུས་འདུག་པ་བཅས།།