༄༅། །བོད་རིགས་ཀརྨ་ (Aftab Karma Purewal) ལགས་ཨ་རིའི་སིན་སིན་ན་ཊི་གྲོང་ཁྱེར་ (Cincinnati) གྱི་སྤྱི་ཁྱབ་ཏུ་བདམས་ཐོན་བྱུང་བ་ལྟར། ཕྱི་ལོ་ ༢༠༢༢ ཟླ་ ༡ ཚེས་ ༤ ཉིན་ཀརྨ་ལགས་ཀྱིས་ཨ་རིའི་སིན་སིན་ན་ཊི་གྲོང་ཁྱེར་སྤྱི་ཁྱབ་པའི་དམ་འབུལ་ཞུས་ཡོད་པ་དང་། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཀརྨ་ལགས་ཨ་རིའི་སིན་སིན་ན་ཊི་གྲོང་ཁྱེར་གྱི་སྤྱི་ཁྱབ་ཏུ་བདམས་ཐོན་བྱུང་བར་དགའ་བསུའི་འཚམས་འཕྲིན་གནང་བ་དེ་བཞིན་ཨ་རིའི་ཀན་ཊ་ཀེ་(Kentucky) དང་། ཨིན་ཌི་ཡ་ན། (Indiana) ཨོ་ཧཱཡོ་ (Ohio) བཅས་ཀྱི་མངའ་སྡེ་ནང་གནས་སྡོད་བོད་མིའི་སྐུ་ཚབ་རྣམ་པས་ཀརྨ་ལགས་ལ་ཕུལ་ཡོད།
དེ་ཡང་ཕྱི་ལོ་ ༢༠༢༡ ཟླ་ ༡༢ ཚེས་ ༧ ཉིན་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་ཀརྨ་ལགས་ལ་འཚམས་འཕྲིན་སྩལ་བའི་ནང་འཁོད་དོན། ཨ་རིའི་ཀན་ཊ་ཀེ་དང་། ཨིན་ཌི་ཡ་ན། ཨོ་ཧཱཡོ་བཅས་ཀྱི་མངའ་སྡེའི་ནང་གནས་སྡོད་བོད་མི་རྣམས་ཀྱིས་རྒྱ་གར་བོད་རིགས་འདྲེས་མ་ཨ་ཕི་ཏབ་པུར་ཝལ་ (Aftab Purewal) ལགས་ཨ་རིའི་སིན་སིན་ན་ཊི་གྲོང་ཁྱེར་གྱི་གྲོང་སྡེའི་སྤྱི་ཁྱབ་ཏུ་བདམས་ཐོན་བྱུང་བར་དགའ་བསུ་ཞུ་བཞིན་ཡོད་པ་ཤེས་རྟོགས་བྱུས་བས་ངོས་རང་དགའ་པོ་བྱུང་། ཕྱི་ལོ་ ༡༩༥༩ ལོར་ང་ཚོ་བོད་མི་རྣམས་རང་ཡུལ་བཞག་ནས་བཙན་བྱོལ་དུ་ཡོང་དགོས་བྱུང་ཡོད། དེ་ནས་བཟུང་ང་ཚོ་ཚང་མ་བཙན་བྱོལ་བ་ཆགས་པ་རེད། དང་ཐོག་ང་ཚོ་རྒྱ་བལ་འབྲུག་གསུམ་གྱི་ས་གནས་ཁག་ཏུ་གཞིས་ཆགས་པ་དང་། དེ་ནས་ལོ་མང་སོང་བའི་རྗེས་བཙན་བྱོལ་བོད་མི་ཁག་གཅིག་ནུབ་ཕྱོགས་པའི་རྒྱལ་ཁབ་ཁག་གི་ནང་ཕྱིན་ནས་གཞིས་ཆགས་པ་མ་ཟད། རིམ་པས་འབྲེལ་ཡོད་རྒྱལ་ཁབ་ཁག་གི་མི་སེར་ཆགས་ཡོད། ངོས་ཀྱིས་བཙན་བྱོལ་བོད་མི་རྣམས་དང་ལྷན་དུ་གླེང་མོལ་བྱས་པའི་ཁྲོད་ནས་གནས་སྟངས་གསར་པ་ཞིག་གི་འོག་སྡོད་བཞིན་ཡོད་མེད་ལ་མ་ལྟོས་པར་བཙན་བྱོལ་བོད་མི་དེ་དག་གིས་གཙོས་ཁོང་ཚོའི་བྱིས་པ་རྣམས་ཀྱིས་གནས་ཡུལ་རྒྱལ་ཁབ་ཡར་རྒྱས་གོང་འཕེལ་སླད་ཞབས་འདེགས་སྒྲུབ་པ་དང་མཉམ་དུ་སོ་སོའི་ངོ་བོ་སྲུང་སྐྱོབ་བྱེད་ཐུབ་ཀྱི་ཡོད་པ་ཤེས་རྟོགས་བྱུང་བས་ངོས་རང་སྙིང་སྟོབས་བསྐྱེད་བྱུང་།
ཉེ་བའི་ལོ་ཤས་རིང་ཁེ་ན་ཌ་དང་། སུད་སི། ཨ་རི་བཅས་ཀྱི་ནང་ཡོད་པའི་བོད་རིགས་ཚོས་ཀྱང་གནས་ཡུལ་རྒྱལ་ཁབ་ཀྱི་མི་མང་ལ་ཞབས་འདེགས་བསྒྲུབ་སླད་ཆབ་སྲིད་ཀྱི་ལས་ཁུངས་ཐོབ་ཐབས་གནང་འགོ་བཙུགས་ཡོད། བོད་རིགས་རྣམས་ཀྱིས་གཞན་གྱི་ཁེ་ཕན་ཆེད་དུ་བློས་བཏང་གིས་ཕྱག་ལས་གནང་བཞིན་པའི་སྐབས་ཁྱབ་ཁོངས་ས་གནས་མི་མང་ཉམ་ཐག་རྣམས་ལའང་དམིགས་བསལ་གྱིས་བྱམས་བརྩེ་ལྡན་པའི་སྒོ་ནས་ཐུགས་ཁུར་གནང་ཐུབ་པའི་རེ་བ་ཡོད། ཐུགས་སྨོན་དང་བཀྲ་ཤིས་བདེ་ལེགས་ཡོད། ཅེས་འཁོད་ཡོད།།
དེ་བཞིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཀྱང་ཨ་ཕི་ཏབ་པུར་ཝལ་ (Aftab Purewal) ལགས་ལ་དགའ་བསུའི་འཚམས་འཕྲིན་གནང་སྟེ་བོད་ཀྱི་བདེན་དོན་ཆེད་དུ་མུ་མཐུད་ཞུ་གཏུག་གནང་དགོས་པའི་འབོད་སྐུལ་གནང་ཡོད་པ་བཅས།།
གསུང་འཕྲིན་ངོ་མ་ཨིན་ཡིག་ཐོག་སྩལ་ཡོད་པས་ཚིག་དོན་ལ་ཧེ་བག་ཡོད་ཚེ་ཨིན་ཡིག་ལ་རྩ་འཛིན་ཡོང་བ་ཞུ།།
