༄༅། །རྒྱ་གར་གྱི་གསར་འགོད་པ་རྒན་གྲས་སྐུ་ཞབས་ཅནྡྲ་བུ་ཤན་ལགས་ཀྱིས་ཧིནྡི་སྐད་ཐོག་བོད་དང་འབྲེལ་བའི་དཔེ་དེབ་ཁྱེད་ཀྱི་མིང་གང་ཡིན་ནམ། བོད། ཅེས་པ་བརྩམས་གནང་འདུག དེ་སྔ་ཁོང་ནཝ་བྷ་རཏ་དུས་བབ་སོགས་རྒྱ་གར་གྱི་གསར་ཁང་འདྲ་མིན་ནང་ལོ་མང་ཕྱག་ལས་གནང་མྱོང་བ་མ་ཟད། ཞོར་དུ་སྙན་ངག་དང་། དཔེ་དེབ་འགའ་བརྩམས་མྱོང་འདུག 

དེབ་འདིའི་ནང་དུ་རྒྱ་ནག་གཞུང་གིས་ཕྱི་ལོ་ ༡༩༤༩ ནས་བཟུང་བོད་ཀྱི་ཁོར་ཡུག་གཏོར་སྐྱོན་དང་། རིག་གཞུང་ངོ་བོ་དང་བཅས་པ་རྩ་མེད་གཏང་རྒྱུའི་ཐབས་བྱུས་ངན་པ་གསལ་སྟོན་གནང་འདུག ཁོང་ཕྱི་ལོ་ ༢༠༡༥ ལོར་གསར་འགོད་པའི་ལྟ་སྐོར་སྐབས་ལྷ་ས་གཙོས་པའི་བོད་ཀྱི་ས་ཁུལ་ཁག་ཏུ་བསྐྱོད་རྒྱུའི་གོ་སྐབས་བྱུང་ཡོད། དེབ་འདིའི་ནང་རྒྱ་ནག་གི་ཉེ་རབས་ལོ་རྒྱུས་དང་། བོད་མིའི་ངོ་བོ། རྒྱ་ནག་གཞུང་གིས་གསར་དུ་གཏན་ལ་ཕབ་པའི་སྲིད་བྱུས་ཀྱི་ཕམ་ཉེས། རྒྱ་ནག་རྒྱལ་ཞེན་རིང་ལུགས་ཀྱི་བསམ་བློ་ཤུགས་ཆེ་རུ་ཕྱིན་པར་བརྟེན་ནས་རྒྱ་གར་སོགས་རྒྱལ་ཁབ་གཞན་ལ་ཚད་ལས་བརྒལ་བའི་གྱོང་རྒུད་རག་ཚུལ་སོགས་བཏོན་འདུག 

དེ་བཞིན་དཔེ་དེབ་དེའི་བོད་ནང་གི་བོད་མི་རྣམས་ཀྱི་དངོས་ཡོད་གནས་སྟངས་སྤྱི་དང་། སྒོས་ཁོང་ཚོའི་ཚོར་བ། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་དད་དམ་གཡོ་བ་མེད་པ། བོད་མིའི་སྒྲིག་འཛུགས་ལ་ཡིད་ཆེས་བློས་འགེལ་ཡོད་སྐོར་གསལ། 

དཔེ་དེབ་ཀྱི་གླེང་བརྗོད་དུ་ཇ་བ་ཧར་ལལ་ནེཧ་རུ་གཙུག་ལག་སློབ་གཉེར་ཁང་གི་སློབ་དཔོན་འབུམ་རམས་པ་ཨཱ་ནནྡ་ཀུ་མཱར་ལགས་ཀྱིས་དེབ་འདིས་བོད་དང་རྒྱ་གར། རྒྱ་ནག་གསུམ་གྱི་འཐབ་རྩོད་ཀྱི་མུན་པར་གསལ་ཁ་གཏོད་འདུག་ཅེས་བྲིས་གནང་འདུག དེབ་ངོ་མ་ཕྱི་ལོ་ ༢༠༢༢ ཟླ་བ་ ༣ ནང་དབུ་འབྱེད་དང་འགྲེམས་སྤེལ་གནང་འཆར་འདུག་པ་བཅས།།