༄༅། །ཕྱི་ལོ་ ༢༠༢༢ ཟླ་བ་ ༡ ཚེས་ ༡༨ ཉིན་བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཕ་རན་སི་གྲོས་ཚོགས་གོང་མའི་ནང་ཕ་རན་སི་བོད་དོན་ཚོགས་པའི་(French Tibet Group) ཚོགས་མི་དང་མཇལ་འཕྲད་གནང་ཡོད།

དེ་ཡང་ཚོགས་འདུའི་ཐོག་གྲོས་ཚོགས་གོང་མའི་འཐུས་མི་ལྕམ་ཇེ་ཁི་ལིན་ཨུས་ཀྲ་ཅི་ (Jacqueline Eustache-Brino) ལགས་དང་། ལྕམ་ཨ་ནིག་བྷི་ལོན་ (Annick Billon) ལགས། སྐུ་ཞབས་བྷར་ནར་ཊ་ཕོར་ནིར་ (Bernard Fournier) ལགས། སྐུ་ཞབས་ཨུ་ལི་ཝིར་རིཊ་མན་ (Olivier Rietmann) ལགས། སྐུ་ཞབས་ལོ་ཨིག་ཧར་ཝི་(Loic Herve) ལགས། སྐུ་ཞབས་ཨན་དྲེ་གྷ་ཊོ་ལིན་ (Andre Gattolin) ལགས་བཅས་མཉམ་ཞུགས་གནང་ཡོད་པ་རེད། 

ཐོག་མར་ཚོགས་གཙོ་ལྕམ་ཇེ་ཁི་ལིན་ཨུས་ཀྲ་ཅི་ལགས་ཀྱིས་ཕེབས་བསུ་དང་སྦྲགས། དུས་ཡུན་གང་འཚམ་རིང་ཏོག་དབྱིབས་ནད་ཡམས་ཁྱབ་གདལ་རྐྱེན་པས་ཚོགས་འདུ་ཚོགས་ཐུབ་མེད་ནའང་སྐབས་དེར་ཚོགས་པའི་ངོས་ནས་སྐུ་ཞབས་མེ་ཀལ་ཝན་ཝལ་ཊ་ (Michel van Walt) ལགས་དང་། བོད་མི་མང་སྤྱི་འཐུས་ཐུབ་བསྟན་དབང་ཆེན་ལགས། ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་ལ་སོགས་དང་མཇལ་འཕྲད་གནང་ཡོད་སྐོར་འགྲེལ་བརྗོད་དང་། དེ་བཞིན་ཁོང་མོས་སྐུ་ཚབ་དོན་གཅོད་བརྒྱུད་ཚོགས་པའི་ངོས་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་འཚམས་འདྲི་ཞུ་རོགས་ཞེས་རེ་སྐུལ་གནང་ཡོད། སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཚོགས་མི་ལྷན་རྒྱས་ལ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སྐུ་ཁམས་བདེ་ཐང་ཡིན་སྐོར་དང་། ཚོགས་མི་རྣམ་པ་སླར་ཡང་གྲོས་ཚོགས་གོང་མར་མཇལ་བར་དགའ་ཚོར་ཆེན་པོ་བྱུང་སྐོར་གསུངས་པ་དང་འབྲེལ། ཕ་རན་སི་བོད་དོན་ཚོགས་པ་དེ་བཞིན་ཕྱི་ལོ་ ༡༩༨༨ ནས་བཟུང་བོད་དང་འབྲེལ་བ་གྲུབ་ཚུལ་ངོ་སྤྲོད་གནང་། ཕྱོགས་མཚུངས་ཁོང་གིས་བོད་ནི་འཛམ་གླིང་ནང་ནས་རང་དབང་གི་གནས་བབ་སྐྱོ་ཤོས་གྲས་སུ་འཚུད་ཡོད་པ་དང་། རྒྱ་ནག་གཞུང་གི་དྲག་གནོན་ཆེ་བའི་སྲིད་བྱུས་འོག་བོད་མི་རྣམས་སྡུག་སྦྱོང་ཚད་མེད་མྱོང་གི་ཡོད་སྐོར་འགྲེལ་བརྗོད་སྐྱོན། དེ་ལྟ་བས་ན། ཁོང་གིས་ཚོགས་མི་ལྷན་རྒྱས་ལ་རྒྱ་མིའི་སྐུ་ཚབ་དང་། ཡུལ་སྐོར་སྤྲོ་འཆམ་པ། སློབ་ཕྲུག་སོགས་ནུབ་ཕྱོགས་རྒྱལ་ཁབ་ཏུ་རང་དབང་ངང་འགྲོ་འོང་ཆོག་པ་བཞིན་བོད་ནང་དུའང་དེ་ལྟར་འོང་བར་འབད་རྩོལ་ཡོང་བའི་འབོད་སྐུལ་ཞུས་ཡོད་པ་རེད། 

དེ་བཞིན་སྐུ་ཚབ་དོན་གཅོད་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནི་འཇིག་རྟེན་སྤྱི་དང་ཡང་སྒོས་ནང་པ་ཡོངས་ཀྱིས་བརྩི་བཀུར་ཞུ་ཡུལ་གྱི་བླ་ན་མེད་པའི་དབུ་ཁྲིད་ཅིག་ཡིན་སྟབས་ཁོང་གི་ཡང་སྲིད་དང་འབྲེལ་བའི་ཐད་ཇར་མ་ནི་དང་། བྷེལ་གན། ནི་དར་ལེནྜ། ཨ་རིས་གནང་བ་ལྟར་ཕ་རན་སི་གཞུང་གི་བཞེངས་ཕྱོགས་གང་ཡིན་གསལ་བསྒྲགས་གནང་དགོས་པའི་རེ་སྐུལ་གནང་། ད་དུང་ཁོང་གིས་མུ་མཐུད་ནས་བོད་མིའི་སྒྲིག་འཛུགས་ངོས་འཛིན་གནང་རྒྱུ་གལ་གནད་ཆེན་པོ་ཡིན་པ་བཞིན་བོད་རྒྱ་འབྲེལ་མོལ་སླར་གསོ་ཡོང་ཐབས་སུ་རྒྱ་ནག་ལ་གནོན་ཤུགས་སྤྲད་རྒྱུའང་གནད་འགག་ཆེན་པོ་ཡིན་པར་གསུངས། ཡུ་རོབ་མཐུན་ཚོགས་ཀྱི་གཙོ་སྐྱོང་ཕ་རན་སིས་གནང་བའི་སྐབས་སུ་ཕ་རན་སིའི་དབུ་ཁྲིད་འོག་ཡུ་རོབ་ཀྱི་རིག་གཞུང་ཁྱབ་སྤེལ་དང་། སྲིད་འཛིན་མེག་རོན་མཆོག་གི་དགོངས་གཞི་ལྟར་མང་གཙོ་སྲུང་སྐྱོབ་སླད་ཕྱག་ལས་གནང་དགོས་སྐོར་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་རེ་སྐུལ་གནང་བ་མ་ཟད། ཡུ་རོབ་མཐུན་ཚོགས་དང་རྒྱ་ནག་བར་གྱི་དཔོན་རིགས་ལྷན་ཚོགས་དང་། རྒྱ་ནག་ལྷན་དུ་འགྲོ་བ་མིའི་ཐོབ་ཐང་སྐོར་གྱི་གྲོལ་མོལ་སྐབས་བོད་ཀྱི་གནད་དོན་བཏོན་གནང་ཡོང་བའི་འབོད་སྐུལ་ཡང་གནང་ཡོད་པ་རེད། 

སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཚོགས་གཙོ་ལྕམ་ཇེ་ཁི་ལིན་ཨུས་ཀྲ་ཅི་ལགས་དང་ལྷན་དུ་ཚོགས་འདུ་འཚོགས་སྐབས་བོད་ཀྱི་གནད་དོན་ཐད་ཡུ་རོབ་མཐུན་ཚོགས་སུ་ཕ་རན་སིས་སྣེ་ཁྲིད་དགོས་པའི་རེ་སྐུལ་གནང་བ་ལྟར། ཁོང་མོས་རྒྱ་ནག་གི་ཁ་གཏད་དུ་ཡོད་པའི་བོད་ཀྱི་འཐབ་རྩོད་ནི་གནད་དོན་གཞན་ལས་གཏིང་ཟབ་ཅིང་། མགོ་རྙོག་ལ། ལོ་རྒྱུས་ཐོག་ནས་བལྟས་ན་འགོག་རྒོལ་ནུས་ལྡན་ཞིག་ཆགས་ཡོད་ཅེས་དང་། ནུབ་ཕྱོགས་རྒྱལ་ཁབ་ཁག་ཏུ་བོད་མི་མང་དུ་འགྲོ་གི་ཡོད་སྟབས་ཁོང་ཚོར་རྒྱབ་སྐྱོར་ཤུགས་ཆེ་རུ་གཏོང་དགོས་སྐོར་གསུངས་པ་མ་ཟད། སྐུ་ཚབ་དོན་གཅོད་ཀྱིས་རེ་སྐུལ་གནང་བའི་གནད་དོན་དེ་དག་གི་ཐོག་འབད་རྩོལ་གནང་རྒྱུ་ཡིན་པའི་ཞལ་བཞེས་ཀྱང་གནང་ཡོད། 

ཚོགས་འདུའི་ཐོག་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་ལྷན་དུ་དྲུང་ཆེ་རྣམ་རྒྱལ་བསམ་གྲུབ་ལགས་དང་། བསྟན་འཛིན་རྣམ་རྒྱལ་ལགས། གྲོས་ཚོགས་གོང་མའི་བོད་དོན་ཚོགས་པའི་དྲུང་ཆེ་སྐུ་ཞབས་ཐེ་རི་མུ་ནིར་ (Thierry Munier) ལགས་བཅས་ལྷན་བཅར་ཞུས་ཡོད་པ་བཅས།།