༄༅། །སུད་སི་དང་ལིག་ཊེན་ཚིན། ཇར་མ་ནཱིའི་བོད་མི་རྣམས་ཀྱིས་ཕྱི་ལོ་ ༢༠༢༢ ལོའི་རྒྱ་ནག་དགུན་དུས་ཨོ་རྩེད་འགྲན་ཚོགས་སུ་གཞུང་འབྲེལ་དང་གཞུང་ཚབ་མི་སྣ་གཏོང་གནང་མི་ཡོང་བའི་ཞུ་སྐུལ་གནང་འདུག 

དེ་ཡང་ཉེ་ལམ་ཕྱི་ལོ་ ༢༠༢༡ ཟླ་བ་ ༡༢ ཚེས་ ༡༨ ནས་ ༡༩ བར་ཕ་རཱན་སི་རྒྱལ་ས་པེ་རི་སིར་ཚོགས་པའི་ཡོ་རོབ་བོད་རིགས་ཚོགས་པའི་ཚོགས་འདུ་ཐེངས་གཉིས་པའི་ཐོག་སྤྱི་མོས་ཀྱིས་གྲོས་ཆོད་གཏན་འབེབ་གནང་དོན་ལྟར། ཕྱི་ལོ་ ༢༠༢༢ ཟླ་བ་ ༡ ཚེས་ ༤་སྟེ་རྒྱལ་སྤྱིའི་ལས་འགུལ་ཉིན་མོ་དང་སྟབས་བསྟུན་སུད་སི་དང་། ལིག་ཊིན་ཚིན་བོད་མི་རྣམས་ནས་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་མདུན་དུ་ཚང་འཛོམས་ཀྱིས་ཕྱི་ལོ་༢༠༢༢ ལོའི་རྒྱ་ནག་དགུན་དུས་ཨོ་རྩེད་འགྲན་ཚོགས་ལ་ངོ་རྒོལ་གནང་འདུགཕྱོགས་མཚུངས་ཇར་མ་ནཱིའི་བོད་མི་རྣམས་དང་། བོད་དོན་རྒྱབ་སྐྱོར་ཚོགས་པ་ (Tibet Initiative Deutschland) དེ་བཞིན་ཡུ་གུར་དང་། ཧོང་ཀོང་། ཕྱི་སྡོད་རྒྱ་རིགས་བཅས་མཉམ་འབྲེལ་གྱིས་བྷ་རན་ཊེན་བྷུར་གར་ (Brandenburger) ནས་བྷར་ལིན་ (Berlin) དུ་ཡོད་པའི་ཇར་མ་ནཱིའི་ཕྱི་སྲིད་བློན་ཆེན་གྱི་ལས་ཁུངས་བར་གོམ་བགྲོད་ཀྱིས་ཟླ་བ་རྗེས་མའི་ནང་རྒྱ་ནག་ཏུ་འཚོགས་འཆར་ཡོད་པའི་ཨོ་རྩེད་འགྲན་ཚོགས་ལ་ངོ་རྒོལ་དང་སྦྲགས། དེར་ཇར་མན་གཞུང་ནས་གཞུང་ཚབ་མི་སྣ་གཏོང་གནང་མི་ཡོང་བའི་ཞུ་སྐུལ་གནང་འདུག 

ཇི་ནི་ཝར་རྔམ་སྟོན་ཁྲོམ་སྐོར་སྐབས་བོད་མི་མང་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་རྒྱ་ནག་གཞུང་གིས་མུ་མཐུད་རྒྱལ་སྤྱིའི་འགྲོ་བ་མིའི་ཐོབ་ཐང་གི་འོས་འགན་རྡོག་རོལ་རྩིས་མེད་བཏང་བར་ཐུགས་འཚབ་དང་སྦྲགས། རྒྱ་ནག་ལ་ཨོ་རྩེད་འགྲན་ཚོགས་གོ་སྒྲིག་བྱ་རྒྱུའི་འོས་ཆོས་ཚང་མེད་ཅེས་དང་། མང་གཙོའི་རྒྱལ་ཁབ་རྣམས་ཀྱིས་རྒྱ་ནག་ཏུ་འཚོགས་རྒྱུའི་ཨོ་རྩེད་འགྲན་ཚོགས་སུ་མཉམ་ཞུགས་མ་གནང་སྟེ་ལོ་རྒྱུས་ཐོག་དྲང་བདེན་ཕྱོགས་སུ་བཞེངས་དགོས་པའི་འབོད་སྐུལ་ཡང་གནང་འདུག བོད་ནང་གི་གནས་སྟངས་ཛ་དྲག་ཏུ་འགྲོ་བཞིན་པ་གསལ་སྟོན་གནང་བཞིན་སུད་སི་སྐུ་ཚབ་དོན་ཁང་གི་འབྲེལ་ཡོད་ལས་བྱེད་སྐལ་ལྡན་མཚོ་མོ་ལགས་ཀྱིས་འདུས་ཚོགས་མི་མང་ལ་གསུང་བཤད་གནང་བ་དང་སྦྲགས། མང་གཙོའི་རྒྱལ་ཁབ་ཁག་གི་དབུ་ཁྲིད་རྣམ་པ་དང་འབྲེལ་ཡོད་རྣམས་ནས་བོད་ཀྱིས་གཙོས་རྒྱ་ནག་གཞུང་གི་དབང་བསྒྱུར་འོག་ཡོད་པའི་ས་གནས་ཁག་གི་གནས་སྟངས་ཞིབ་འཇུག་དཔྱིས་ཕྱིན་པ་གནང་སྟེ། རྒྱ་ནག་གཞུང་གི་དབང་བསྒྱུར་འོག་འགྲོ་བ་མིའི་ཐོབ་ཐང་མེད་པའི་ཉེས་མེད་མི་མང་རྣམས་ཀྱི་འབོད་སྒྲར་དོ་སྣང་གནང་དགོས་ཞེས་དང་། གཞན་ཡང་ཁོང་མོས་མང་གཙོའི་རྒྱལ་ཁབ་རྣམས་ཀྱིས་འགྲོ་བ་མིའི་ཐོབ་ཐང་དང་མང་གཙོའི་རིན་ཐང་གཞི་རྩར་བཞག་ནས་ཚོང་འབྲེལ་འཛུགས་དགོས་པ་དང་། ཡིད་ཆེས་དང། ཕྱི་གསལ་ནང་གསལ། དྲང་བདེན་སྲུང་སྐྱོབ་བྱས་པའི་ཐོག་རྒྱ་ནག་ལྷན་ཆབ་སྲིད་དང་། ཚོང་འབྲེལ། ཕྱི་སྲིད་འབྲེལ་ལམ་འཛུགས་དགོས་ཞེས་འབོད་སྐུལ་གནང་། དེ་བཞིན་འཇིགས་བྲལ་ཞེས་པའི་གློག་བརྙན་བཟོ་སྐྲུན་པ་དོན་གྲུབ་དབང་ཆེན་ལགས་ཀྱིས་ཀྱང་གསུང་བཤད་གནང་སྟེ། བོད་ནང་རྒྱ་ནག་གཞུང་གི་དྲག་གནོན་ཉིན་རེ་བཞིན་ཤུགས་ཆེ་གཏོང་བཞིན་བོད་མི་དང་། བོད་ཀྱི་རིག་གཞུང་དང་ངོ་བོ་རྩ་བརླག་ཏུ་གཏོང་གི་ཡོད་སྟབས། དོན་གྲུབ་དབང་ཆེན་ལགས་རང་ཉིད་ཀྱིས་བོད་ནང་གི་བོད་མིའི་ཚབ་བྱས་ཏེ་ཁོང་ཚོའི་སྡུག་བསྔལ་ཕྱིར་བསྒྲགས་གནང་རྒྱུ་དམ་བཅས་པ་མ་ཟད། བཙན་བྱོལ་ནང་ཡོད་པའི་བོད་མི་རྣམས་ཀྱིས་ཀྱང་རྒྱ་ནག་གཞུང་གི་གཉའ་གནོན་འོག་སྡུག་སྦྱོང་མྱོང་བཞིན་པའི་བོད་མི་རྣམས་ཀྱི་སྡུག་བསྔལ་གསལ་སྟོན་བྱེད་ཕྱིར་མདུན་དུ་ཐོན་དགོས་པའི་འབོད་སྐུལ་གནང་ཡོད། ད་ལྟའི་ཆར་དོན་གྲུབ་དབང་ཆེན་ལགས་ཡོ་རོབ་རྒྱལ་ཁབ་ཁག་ཏུ་རྒྱལ་སྤྱིའི་མི་མང་ནས་ཕྱི་ལོ་ ༢༠༢༢ ལོའི་རྒྱ་ནག་དགུན་དུས་ཨོ་རྩེད་འགྲན་ཚོགས་སུ་མཉམ་ཞུགས་མཚམས་འཇོག་དགོས་པའི་འབོད་སྐུལ་ཆེད་བསྐོར་བསྐྱོད་གནང་བཞིན་ཡོད། གཞན་ཡང་འདུ་འཛོམས་ཐོག་སུད་སི་དང་ལིག་ཊེན་ཚིན་བོད་རིགས་ཚོགས་པའི་ཚོགས་གཙོ་ཀརྨ་ཆོས་སྐྱིད་ལགས་དང་། སུད་བོད་མཛའ་འབྲེལ་ཚོགས་པའི་ཕེན་ནི་མོ་རལ་ལགས། ཡོ་རོབ་བོད་ཀྱི་ན་གཞོན་ཚོགས་པའི་ཚོགས་གཙོ་བཀྲ་ཤིས་ལགས། སུད་སི་བོད་ཀྱི་བུད་མེད་ཚོགས་པའི་ཚོགས་གཙོ་ཚེ་རིང་གཡུ་སྒྲོན་ལགས་བཅས་ནས་ཀྱང་གསུང་བཤད་གནང་འདུག སྐབས་དེར་སུད་སི་བོད་རིགས་ཚོགས་པའི་རྒྱུན་ལས་ཀུན་དགའ་འཆི་མེད་ལགས་ཀྱིས་སུད་སི་གཞུང་ནས་ཕྱི་ལོ་༢༠༢༢་ལོའི་རྒྱ་ནག་དགུན་དུས་ཨོ་རྩེད་འགྲན་ཚོགས་སུ་གཞུང་ཚབ་མི་སྣ་གཏོང་གནང་མི་ཡོང་བའི་ཞུ་འབོད་ཡི་གེ་སྒྲོགས་སྦྱང་གནང་འདུག དེ་བཞིན་ཡུ་རོབ་ས་གནས་གཞན་རྣམས་སུའང་བོད་མི་རྣམས་ཀྱིས་དེ་ལྟ་བུའི་ངོ་རྒོལ་གནང་འདུག་པ་བཅས།།