༄༅། །ཕ་རན་སིའི་སྐད་རྒྱག་མཁན་གྱི་སུད་སིའི་ས་ཁུལ་ཁག་གཅིག་དང་ལྷག་པར་ཇི་ནི་ཝ་གྲོང་ཁྱེར་ཁུལ་ལ་དམིགས་ཏེ་སུད་བོད་མཛའ་འབྲེལ་ཚོགས་པས་ (Swiss-Tibetan Friendship Association) ཕྱི་ལོ་ ༢༠༢༢ ཟླ་ ༠༡ ཚེས་ ༡༡ ཉིན་སུད་སིའི་སྐུ་ཚབ་དོན་གཅོད་ཁང་དུ་མ་འོངས་བོད་དོན་ཞུ་གཏུག་གི་ལས་གཞིའི་སྐོར་ཚོགས་འདུ་ཚོགས་ཏེ་གྲོས་སྡུར་གནང་ཡོད།

དེ་ཡང་སུད་སུའི་གྲོས་ཚོགས་འཐུས་མི་ཟུར་པ་དང་གྲོང་སྡེའི་སྤྱི་ཁྱབ་པ་རེ་མེ་ ( René Longet) ལགས་དང་། ཇི་ནི་ཝ་གྲོང་ཁྱེར་གྱི་གྲོང་སྡེ་སྤྱི་ཁྱབ་པ་ཟུར་པ་ལྕམ་སྐུ་ཁོན་ཊ་ཊི་ (Marguerite Contat ) ལགས་རྣམ་གཉིས་ཀྱིས་སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་དང་། དོན་ཁང་གི་ལས་བྱེད་བསྟན་འཛིན་ཆོས་བཟང་ལགས། སྐལ་ལྡན་མཚོ་མོ་ལགས་བཅས་དང་ལྷན་དུ་ཚོགས་འདུ་ཚོགས་ཏེ་མ་འོངས་བོད་དོན་ཞུ་གཏུག་གི་ལས་གཞི་གཙོ་བོར་གྱུར་བའི་གནད་དོན་ཁག་གཅིག་གི་སྐོར་གྲོས་སྡུར་ལྷུག་པོ་གནང་ཡོད།སུད་སུའི་གྲོས་ཚོགས་འཐུས་མི་ཟུར་པ་རེ་མེ་ལགས་དང་། ཇི་ནི་ཝ་གྲོང་ཁྱེར་གྱི་གྲོང་སྡེ་སྤྱི་ཁྱབ་པ་ཟུར་པ་ལྕམ་སྐུ་ཁོན་ཊ་ཊི་ལགས་རྣམ་གཉིས་ཀྱིས་ལྷག་བསམ་ཟོལ་མེད་ཀྱི་སྒོ་ནས་བོད་དོན་སླད་རྒྱབ་སྐྱོར་ཤུགས་ཆེ་གནང་དང་གནང་བཞིན་པར་སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས་ཐུགས་རྗེ་ཆེ་ཞུས་གནང་ཡོད་པ་བཅས།།