༄༅། །སྐུ་ཞབས་སནྡེཤ་མེཤྲཱམ་ལགས་ཀྱིས་ཕྱི་ལོ་ ༢༠༢༡ ཟླ་བ་ ༡༢ ཚེས་ ༡༠ ཉིན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ནས་རྐང་འཁོར་ཐོག་བོད་དོན་གོ་རྟོགས་ལས་འགུལ་ཞིག་དབུ་འཛུགས་གནང་སྟེ། རྒྱ་གར་ལྷོ་ཕྱོགས་མངའ་སྡེ་ཀརནཱ་ཊཀ་དང་། ཀེ་རལ། ཏ་མིལ་ནཱ་ཌཱུ་ལྷོ་བརྒྱུད་དབུས་འཛིན་མངའ་ཁུལ་པུ་ཌུ་ཅེ་རཱི་ (Puducherry) རུ་ཕྱི་ལོ་ ༢༠༢༢ ཟླ་བ་ ༡ ཚེས་ ༢ ཉིན་འབྱོར་ཡོད་པ་དང་། སྐབས་དེར་པུ་ཌུ་ཅེ་རཱིའི་ས་གནས་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨད་ཝན་ (S. Adhavan) ལགས་དང་། ཟུང་སྦྲེལ་དྲུང་ཆེ་སྐུ་ཞབས་པན་ཊི་ན་ (I. Pandian) ལགས་དང་ཚོགས་མི་རྣམས་ནས་ཕེབས་བསུའི་སྣེ་ལེན་ཞུས་ཡོད། 

ཕྱི་ལོ་ ༢༠༢༢ ཟླ་བ་ ༡ ཚེས་ ༤ ཉིན་ས་གནས་ཧིན་བོད་མཛའ་འབྲེལ་ཚོགས་པའི་གོ་སྒྲིག་འོག་པུ་ཌུ་ཅེ་རཱིའི་གྲོས་ཚོགས་ཀྱི་ཁོར་ཡུག་ཏུ་སནྡེཤ་མེཤྲཱམ་ལགས་ལ་ཕེབས་བསུའི་དགའ་སྟོན་ཞིག་གོ་སྒྲིག་ཞུས་ཡོད་པ་དང་། སྐབས་དེར་པུ་ཌུ་ཅེ་རཱིའི་སྤྱི་ཁྱབ་བློན་ཆེན་སྐུ་ཞབས་རངྒཱ་སྭཱམཱི་ (N. Rangaswamy) མཆོག་དང་། པུ་ཌུ་ཅེ་རཱིའི་གྲོས་ཚོགས་ཀྱི་ཚོགས་གཙོ་སྐུ་ཞབས་སལ་ཝམ་(R. Selvam) མཆོག རྒྱ་གར་དབུས་གྲོས་ཚོགས་གོང་མའི་འཐུས་མི་སྐུ་ཞབས་སལ་ཝ་ག་ན་པ་ཐི་ (S. Selvaganapathy) ལགས་བཅས་ཕེབས་ཡོད་པ་རེད།

པུ་ཌུ་ཅེ་རཱིའི་གྲོས་ཚོགས་ཀྱི་ཚོགས་གཙོ་སྐུ་ཞབས་སལ་ཝམ་མཆོག་གིས་སྐུ་ཞབས་སནྡེཤ་མེཤྲཱམ་ལགས་ཀྱིས་བོད་དོན་ཆེད་སྐུ་ངལ་སྐྱོན་པར་གོས་གཟན་དང་བཅས་དགའ་བསུ་ཞུས་ཡོད་པ་དང་། མཛད་སྒོར་བོད་དང་རྒྱ་གར་གྱི་འབྲེལ་བ་དམ་དུ་གཏོང་ཕྱིར་རྒྱ་གར་དང་བོད་ཀྱི་རྒྱལ་དར་མཉམ་དུ་བསྒྲིགས་ཡོད་པ་མ་ཟད། བོད་ཀྱི་སྐོར་འགྲེམ་ཡིག་གནད་ཡོད་མི་སྣ་རྣམ་པ་དང་ཚོགས་ཞུགས་པ་ཡོངས་ལ་བགོ་འགྲེམས་གནང་ཡོད། 

པུ་ཌུ་ཅེ་རཱིའི་སྤྱི་ཁྱབ་བློན་ཆེན་སྐུ་ཞབས་རངྒཱ་སྭཱམཱི་མཆོག་གིས་སྐུ་ཞབས་སནྡེཤ་མེཤྲཱམ་ལགས་ཀྱི་མདུན་ཕྱོགས་བོད་དོན་གོ་རྟོགས་རྐང་འཁོར་འགྲུལ་བཞུད་འགོ་འཛུགས་ཀྱི་དར་ཆ་འཕྱར་ཏེ་སླད་ཀྱི་བོད་དོན་ལས་འགུལ་ལམ་ལྷོངས་ཡོང་བའི་སྨོན་འདུན་ཞུས་ཡོད། 

མཛད་སྒོར་གཞན་ཡང་པུ་ཌུ་ཅེ་རཱི་ས་གནས་ཀྱི་ཧིན་བོད་མཛའ་འབྲེལ་ཚོགས་པའི་ཚོགས་མི་སྐལ་བཟང་བསོད་ནམས་ལགས་དང་། ས་གནས་ཨོ་རོ་ཝིལེ་ལ་ཡོད་པའི་བོད་ཀྱི་རིག་གཞུང་ཁང་ (Auroville Pavilion of Tibetan Culture) གི་ལས་བྱེད། གསར་འགོད་པ་སོགས་ཆེད་བཅར་གནང་ཡོད། སནྡེཤ་མེཤྲཱམ་ལགས་པུ་ཌུ་ཅེ་རཱི་རུ་བཞུགས་སྐབས་ཨུ་རོ་ཝིལ་ལ་ནས་ཡིན་པའི་སྐལ་བཟང་ལགས་ཀྱིས་བཞུགས་གནས་གྲ་སྒྲིག་ཞུས་ཞིང་། སྐབས་དེར་ཁོང་གིས་བོད་རིག་པའི་མཁས་པ་དང་རྩོམ་པ་པོ་ཀ་ལའོ་ཊི་ཨར་པི་ (Claude Arpi) ལགས་དང་མཇལ་ཡོད་པ་རེད། 

བོད་དོན་གོ་རྟོགས་རྐང་འཁོར་འགྲུལ་བཞུད་ཀྱི་དགོས་དམིགས་གཙོ་བོ་ནི་རྒྱ་གར་མི་མང་དཀྱུས་མ་ནང་ཁུལ་བོད་དོན་སྤྱི་དང་། བོད་ནང་གི་ཛ་དྲག་གནས་སྟངས་གོ་རྟོགས་སྤེལ་རྒྱུ་དང་། དུས་རབས་མང་པོའི་རིང་གི་བོད་དང་རྒྱ་གར་བར་གྱི་འབྲེལ་ལམ་སྲ་བརྟན་གཏང་རྒྱུ། རྒྱ་གར་གྱི་བྱང་ཕྱོགས་ས་མཚམས་བོད་འཁེལ་གྱི་ཡོད་པ་ལས་རྒྱ་ནག་འཁེལ་གྱི་མེད་པའི་སྐོར་རྒྱ་གར་མི་མང་ལ་གོ་རྟོགས་སྤེལ་རྒྱུ་རེད་འདུག 

རྐང་འཁོར་འགྲུལ་དེ་བཞིན་ཕྱི་ལོ་ ༢༠༢༢ ཟླ་བ་ ༡ ཚེས་ ༡༢ ཉིན་རྒྱ་གར་ལྷོ་ཕྱོགས་གྲོང་ཁྱེར་བྷེང་ལོར་དུ་མཇུག་བསྡུ་གི་ཡོད་པ་བཅས།།