༄༅། །ཕྱི་ལོ་  ༢༠༢༢ ཟླ་ ༡ ཚེས་ ༨ ཉིན་ཨཕ་རི་ཀའི་རྒྱལ་ཡོངས་ཀོང་རེ་སི་ཆབ་སྲིད་ཚོགས་པ་དབུ་བརྙེས་ནས་ལོ་ངོ་ ༡༡༠ འཁོར་བའི་དུས་དྲན་སྲུང་བརྩི་ཉིན་མོ་དང་བསྟུན། ཆོས་ལུགས་ནང་ཁུལ་གྱི་སྨོན་ལམ་འདུ་ཚོགས་ཤིག་ལྷོ་ཨཕ་རི་ཀའི་པོ་ལོག་ཝ་ནེ་ལིམ་པོ་པོ་མངའ་སྡེའི་ (Polokwane of Limpopo) ནང་རྟེན་གཞི་བྱས་པའི་པེ་ཊར་མོ་ཀ་བྷའི་ (Peter Mokaba) རྩེད་ར་ནང་ཚོགས་ཡོད་པ་དང་། སྐབས་དེར་ལྷོ་ཨཕ་རི་ཀའི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་དང་། དོན་ཁང་གི་ལྟ་གྲུབ་དགེ་རྒན་དགེ་བཤེས་བློ་བཟང་དོན་གྲུབ་ལགས་རྣམ་གཉིས་ཆོས་ལུགས་ནང་ཁུལ་གྱི་སྨོན་ལམ་འདུ་ཚོགས་སྟེང་མཉམ་ཞུགས་གནང་ཡོད།ཐེངས་འདིའི་ཆོས་ལུགས་ནང་ཁུལ་གྱི་སྨོན་ལམ་འདུ་ཚོགས་ཐོག་ཡེ་ཤུ་དང་། ཧིན་དུ། ནང་པ། འཇིའུ་སོགས་འཛམ་གླིང་གི་ཆོས་ལུགས་གཙོ་ཆེ་ཁག་བདུན་གྱི་དབུ་ཁྲིད་རྣམ་པ་མཉམ་ཞུགས་ཀྱིས་རང་རང་སོ་སོའི་ཆོས་ལུགས་གྱི་ལམ་སྲོལ་ལྟར་སྨོན་ལམ་གསུང་འདོན་གནང་ཡོད་པ་བཅས། །