༄༅། །ཡེ་ཤུའི་བླ་ཆེན་དང་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མཛའ་གྲོགས་ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་གི་ཕུང་འདོན་ཆོ་ག་དེ་བཞིན་ཕྱི་ལོ་ ༢༠༢༡ ཟླ་བ་ ༠༡ ཚེས་ ༠༡ ཉིན་ཀེབ་ཀྲཽན་ (Cape Town) གྱི་སེནྜ་ཇོར་ཇ་ལྷ་ཁང་ (St. George cathedral) དུ་ཚོགས་ཡོད་པ་དང་། སྐབས་དེར་མཉམ་ཞུགས་པ་མི་གྲངས་ ༡༢༠ བྱུང་ཡོད་པའི་ཁོངས་ལྷོ་ཨཕ་རི་ཀའི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱང་ཕེབས་ཡོད་པ་རེད། དམ་པ་དེ་ཉིད་ཀྱི་ཕུང་འདོན་ཆོ་ག་ཀེབ་ཀྲཽན་གྱི་ཨར་ཆི་བྷི་ཤོབ་འབུམ་རམས་པ་ཐཱ་བོ་མག་གྷོ་བ་(Thabo Makgoba) མཆོག་གི་གཙོ་སྐྱོང་འོག་ཞི་ཞིང་དུལ་བའི་ངང་ཆུ་ཚོད་གཉིས་དང་ཕྱེད་ཀ་ལྷག་ཚོགས་ཡོད་ཅིང་། དེ་ནི་ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་གིས་ལྷོ་ཨཕ་རི་ཀར་མང་གཙོའི་བཅོས་བསྒྱུར་གཏོང་སླད་ཞབས་འདེགས་རླབས་པོ་ཆེ་ཞུས་པར་ངོས་འཛིན་ཆེད་ཡེ་ཤུའི་ལྷ་ཁང་གི་སྣེ་ཁྲིད་འོག་གཞུང་གིས་གོ་སྒྲིག་ཞུས་པའི་ཕུང་འདོན་ཆོ་ག་ཞིག་ཡིན། ཕུང་འདོན་ཆོ་གར་དམ་པ་ཁོང་གི་ཉེ་འབྲེལ་ནང་མི་སྤུན་མཆེད་དང་། གྲོགས་པོ་གྲོགས་མོ། དེ་བཞིན་གནད་ཡོད་མི་སྣའི་ཁོངས་སྲིད་འཛིན་སའི་རིལ་ར་མ་ཕོ་ས་ (Cyril Ramaphosa ) མཆོག་གིས་གཙོས་གྲོས་ཚོགས་འཐུས་མི་དང་། གཞུང་འབྲེལ་མི་སྣ་སོགས་མི་གྲངས་ ༡༢༠ ཕེབས་ཡོད་པ་རེད། 

སྐབས་དེར་ལྷོ་ཨཕ་རི་ཀའི་སྐུ་ཚབ་དོན་གཅོད་དངོས་གྲུབ་ལགས་ཀྱིས་ཟུར་དུ་རྒྱལ་སྤྱིའི་གསར་ཁང་གྲགས་ཅན་ཨེ་སི་ཨེ་སྦེ་སི་(SABC) དང་། ཨན་སི་ཨེ། (NCA) སི་ཨན་ཨན། (CNN) རོ་ཡི་ཊར་སི། (Reauters) མོ་ཛམ་བྷིག་ཁན་གསར་འགྱུར།(Mozambiqcan news) ལྷོ་ཀོ་རི་ཡའི་གསར་འགྱུར།(South Korean News paper) སོགས་ཀྱི་བཅར་འདྲིར་ལན་འདེབས་གནང་ཡོད། གཞན་ཡང་ཁོང་གིས་ཌེ་སི་མོན་ཊུ་ཊུ་ཐེབས་རྩའི་(Desmond Tutu Foundation) འགན་འཛིན་དང་མཇལ་འཕྲད་ཀྱིས་མ་འོངས་འཆར་གཞིའི་སྐོར་གྲོས་བསྡུར་གནང་བ་མ་ཟད། དེ་བཞིན་གནད་ཡོད་མི་སྣ་དང་ཆོས་ཕྱོགས་ཀྱི་མི་སྣ་སོགས་དང་མཇལ་མོལ་གྱིས་ཁོང་རྣམས་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་ཨར་ཆི་བྷི་ཤོབ་ཌེ་སི་མོན་ཊུ་ཊུ་རྣམ་པ་གཉིས་ཀྱི་ཐུན་མོང་མ་ཡིན་པའི་མཛའ་འབྲེལ་ལ་ཡི་རང་བསྔགས་བརྗོད་གནང་བ་དང་འབྲེལ། གལ་ཏེ་ཏོག་དབྱིབས་གཉན་རིམས་ཀྱི་རྐྱེན་པས་འགྲུལ་བཞུད་ལ་བཀམ་སྡོམ་མེད་ན་ཕུང་འདོན་ཆོ་གར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ཕེབས་ན་སྙམ་པའི་རེ་འདོད་ཡོད་སྐོར་གསུངས་ཡོད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་གཤིན་ཆེ་བའི་མཛའ་གྲོགས་ཨར་ཆི་བྷི་ཤོབ་ཌེ་སི་མོན་ཊུ་ཊུ་མཆོག་ཕྱི་ལོ་ ༢༠༢༡ ཟླ་བ་ ༡༢ ཚེས་ ༢༦ ཉིན་གུང་གྲངས་༩༠ ཐོག་དགོངས་པ་རྫོགས་ཡོད་པ་དང་། སྐབས་དེར་སྤྱི་ནོར་༧གོང་ས༧སྐྱབས་མགོན་ཆེན་པོ་མཆོག་གིས་ཐུགས་གསོའི་གསུང་འཕྲིན་སྩལ་ཡོད་པ་དང་།  དེ་བཞིན་འཛམ་གླིང་གི་གནད་ཡོད་མི་སྣ་མང་པོས་ཐུགས་གསོའི་གསུང་འཕྲིན་ཕུལ་ཏེ་དམ་པ་གང་དེའི་མཛད་རྗེས་རྣམས་རྗེས་དྲན་ཞུས་ཡོད་པ་བཅས།།