༄༅། །ཨེ་ཤེ་ཡ་རང་དབང་རླུང་འཕྲིན་ཁང་གིས་གནས་ཚུལ་སྤེལ་གསལ་ལྟར་ན། རྒྱ་ནག་གཞུང་གིས་བྲག་མགོ་རྫོང་ཁོངས་སུ་རྟེན་གཞི་བྱས་པའི་གནས་ནང་དགོན་པའི་དགོན་བདག་སྤྲུལ་སྐུ་ཆོས་ཀྱི་ཉི་མ་ལགས་དང་། ཁོང་གི་སྤུན་གྱི་སྲས་ཆེ་བ་བསྟན་འཛིན་ནོར་བུ་ལགས་དང་འབྲིང་བ་དབང་ཆེན་ཉི་མ་ལགས་ཕྱི་ལོ་༢༠༢༡ ཟླ་ ༨ ཚེས་ ༡༥ ཙམ་ལ་རྒྱ་ནག་གི་ཉེན་རྟོག་པས་འཛིན་བཟུང་བྱས་ཏེ་རྟའུ་རྫོང་གི་བཙོན་ཁང་ཞིག་ཏུ་བཀག་ཉར་བྱེད་བཞིན་པའི་གནས་ཚུལ་ཐོན་ཡོད་ཀྱང་འབྲེལ་ཡོད་ཚོས་གནས་ཚུལ་དེ་གསར་འགྱུར་བརྒྱུད་ལམ་ཁག་ལ་བསྒྲགས་ན་ཁོང་གཉིས་ལ་ཕན་ཐོགས་མེད་པའི་བསམ་ཚུལ་བྱུང་ནས་ད་བར་ཕྱིར་བསྒྲགས་བྱས་མི་འདུག
ད་ལྟའི་ཆར་བྲག་འགོ་རྫོང་གི་གནས་སྟངས་སྤྱི་ཡོངས་ནས་དམ་དྲག་འོག་ཡོད་པ་དང་། གོང་ཞུས་འཛིན་བཟུང་བྱས་པའི་གྲྭ་བ་སྤུན་གཉིས་ཀྱི་ནང་མི་ཚོ་ཁོང་གཉིས་ལ་ཐུག་འཕྲད་བྱེད་འཇུག་གི་མེད་པ་དང་། ཁོང་གཉིས་འཛིན་བཟུང་བྱེད་དགོས་པའི་རྒྱུ་མཚན་ཅི་ཡིན་སོགས་གསལ་པོ་ཤེས་ཀྱི་མེད་པ་འབྲེལ་ཡོད་ནིའུ་ཡོག་ཏུ་བཅའ་བཞུགས་མིང་བརྗོད་འདོད་མེད་མཁན་ཞིག་གིས་ངོ་སྤྲོད་གནང་བྱུང་།
དེ་བཞིན་གནས་ཚུལ་འདིའི་སྐོར་ལ་བོད་ཕྱི་ལོགས་སུ་བཞུགས་མཁན་འབྲེལ་ཡོད་མི་གཞན་ཞིག་གིས་ཡིག་ཐོག་ནས་གནས་ཚུལ་མཁོ་སྤྲོད་བྱས་པའི་ནང་དུ། གོང་ཞུས་འཛིན་བཟུང་བྱས་པའི་གྲྭ་དབང་ཆེན་ཉི་མ་ཤེས་ཡོན་དང་འཕྲོད་བསྟེན་སོགས་ཀྱི་ཐད་ནས་སློབ་གསོ་སྤེལ་བའི་རྐྱེན་གྱིས་སྔོན་མ་འཛིན་བཟུང་བྱས་མྱོང་བ་དང་། ཕྱི་ལོ་ ༢༠༡༥ ཙམ་ལ་རྒྱ་ནག་གཞུང་གིས་དགོན་པ་དེའི་སློབ་གྲྭ་སྒོ་བརྒྱབ་བཅུག་པའི་དོན་རྐྱེན་དང་འབྲེལ་ནས་ཁོང་གཉིས་ཀྱི་སྤུན་ཆུང་ཤོས་ཨོ་རྒྱན་ཆོས་གྲགས་ཞུ་བ་ཡང་འཛིན་བཟུང་བྱས་མྱོང་བའི་སྐོར་འཁོད་འདུག གོང་ཞུས་གྲྭ་བ་སྤུན་གཉིས་འཛིན་བཟུང་བྱས་པའི་ཉིན་གྲངས་གསུམ་གྱི་རྗེས་ཕྱི་ཟླ་ ༨ ཚེས་ ༡༨ ཉིན་གྱི་དགོང་དྲོར་དགོན་པའི་འདུ་ཁང་རྙིང་པ་ཞིག་ཡོད་པ་དེར་མེ་ཤོར་ནས་མཁན་པོ་ཐུབ་བསྟན་ཞུ་བ་མེ་སྐྱོན་ཁྲོད་འདས་གྲོངས་སུ་གྱུར་ཡོད་པ་དང་། མཁན་པོ་ཁོང་ནི་གསེར་རྟ་བླ་རུང་སྒར་ནས་སློབ་མཐར་ཕྱིན་ཡོད་པས་དགོན་པ་དེའི་སློབ་གསོ་སྤེལ་མཁན་གཙོ་བོ་ཞིག་ཡིན་པ་དང་། དེ་བཞིན་བུ་ཀྱོ་ཞེས་པའི་གྲྭ་བ་ཞིག་ཀྱང་མེ་སྐྱོན་གྱིས་ཕྱི་ཚེས་ ༡༩ ཉིན་སྨན་ཁང་དུ་འགྲོ་བའི་ལམ་བར་ནས་གྲོངས་སོང་བའི་གནས་ཚུལ་བྱུང་ཡོད་པ་དང་། ཡུལ་མི་ཚོའི་ཁྲོད་དོན་རྐྱེན་དེ་ནི་རྒྱ་ནག་གཞུང་གིས་བྱས་ཡོད་པའི་དྭོགས་པ་བྱེད་མཁན་མང་པོ་ཡོད་པ་འཁོད་འདུག
གནས་མང་དགོན་པ་ནི། བྲག་མགོ་རྫོང་ནས་རྟའུ་རྫོང་ཕྱོགས་སུ་འགྲོ་སའི་ཕྱོགས་ཏེ་བྲག་མགོ་རྫོང་ནས་སྤྱི་ལེ་ ༣༠ ཙམ་གྱི་སར་ཞིམ་མདའ་གྲོང་པ་ཞེས་པའི་ས་ནས་སྤྱི་ལེ་ ༤༠ ཙམ་གྱི་སར་ཞི་རི་ཁོག་ཅེས་པའི་ས་གནས་སུ་ཆགས་ཡོད་པ་དང་། གནས་ནང་དགོན་པ་འདི་ནི་རྙིང་མའི་དགོན་པ་ཞིག་ཡིན་པ་དང་། དེ་བཞིན་བྲག་མགོ་རྫོང་དུ་ཆགས་པའི་མདོ་མང་དགོན་པ་ལའང་རྒྱ་ནག་གཞུང་གིས་དམ་དྲག་བྱེད་བཞིན་པའི་གནས་ཚུལ་གོ་རྒྱུ་ཡོད་པ་ལས་ཞིབ་ཕྲ་སོགས་ཤེས་རྟོག་ཐུབ་ཀྱི་མེད་སྐོར་འགྲེལ་བརྗོད་གནང་བྱུང་།