༄༅། །ཉེ་ཆར་བྲག་མགོ་རུ་རྒྱ་ནག་གཞུང་གིས་ཐུབ་དབང་སྐུ་བརྙན་དང་རྗེ་བཙུན་བྱམས་པ་མགོན་པོའི་སྐུ་བརྙན། མ་ཎི་དུང་འཁོར་བཞི་བཅུ་ཞེ་ལྔ། སློབ་གྲྭ་བཅས་གཏོར་བཤིག་བཏང་ཡོད་པ་མ་ཟད། བོད་མི་བཅུ་གྲངས་ཤིག་འཛིན་བཟུང་བཀག་ཉར་བྱས་ཡོད།

དེ་ཡང་འཛིན་བཟུང་བཀག་ཉར་འོག་ཚུད་པའི་ཁོངས་སུ་བྲག་མགོ་དགོན་པའི་མཁན་པོ་དཔའ་དགའ་ལགས་དང་། ཕྱག་མཛོད་ཉི་མ་ལགས། གྲྭ་བསྟན་འཛིན་ཉི་མ་ལགས། གྲྭ་བཀྲ་ཤིས་རྡོ་རྗེ་ལགས། དེ་བཞིན་སྐུ་བརྙན་གྱི་རྡོ་བརྐོས་པ་ལྷ་མོ་གཡང་སྐྱབས་ལགས་དང་ནོར་པ་ཚེ་རིང་བསམ་གྲུབ་ལགས་བཅས་འཛིན་བཟུང་བཀག་ཉར་བྱས་ཡོད། བོད་མི་གཞན་རྣམས་ཀྱི་མིང་དང་གནས་སྟངས་ཇི་ཆགས་ད་ལྟའི་ཆར་ཤེས་རྟོགས་མ་ཐུབ། ཕྱོགས་མཚུངས་བསྟན་འཛིན་ཉི་མ་ལགས་ལ་རྣམ་འགྱུར་ཡག་པོ་མེད་ཚུལ་བརྗོད་དེ་རྡུང་རྡེག་མནར་གཅོད་དུ་མ་བཏང་ཡོད།ད་ལྟའི་ཆར་བྲག་མགོ་དགོན་པའི་རྭ་བའི་ནང་ཡོད་པའི་རྗེ་བཙུན་བྱམས་པ་མགོན་པོའི་སྐུ་བརྙན་ཕི་ཀྲི་ ༣༠ ཅན་ཞིག་ཡོད་པ་དེ་གཏོར་བཤིག་བཏང་ཡོད། རྫོང་སྲིད་གཞུང་གིས་རྗེ་བཙུན་བྱམས་པ་མགོན་པོའི་སྐུ་བརྙན་ཐེངས་གཉིས་ཙམ་གཏོར་རྩིས་བྱས་ཀྱང་གཏོར་བཤིག་བཏང་མ་ཐུབ་པར་བརྟེན་ཉེ་ཆར་འཕྲུལ་གླང་ (JCB Machine) བཏང་སྟེ་རྗེ་བཙུན་བྱམས་པ་མགོན་པོའི་སྐུ་བརྙན་ཕི་ཀྲི་ ༣༠ ཅན་དེ་ཡང་གཏོར་བཤིག་བཏང་ཡོད། 

བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས་ཀྱིས་གསུང་དོན། ཉེ་ཆར་རྒྱ་ནག་གཞུང་གིས་ཁམས་བྲག་མགོ་རུ་ཐུབ་དབང་སྐུ་བརྙན་དང་རྗེ་བཙུན་བྱམས་པ་མགོན་པོའི་སྐུ་བརྙན། མ་ཎི་དུང་འཁོར་བཞི་བཅུ་ཞེ་ལྔ། སློབ་གྲྭ་བཅས་གཏོར་བཤིག་བཏང་བ་དང་། དེ་བཞིན་བོད་མི་ཁག་གཅིག་འཛིན་བཟུང་བཀག་ཉར་བྱས་པ་དེ་ནི་རྒྱ་ནག་གཞུང་གིས་བོད་མིའི་ཆོས་དང་རིག་གཞུང་། སྲོལ་རྒྱུན། ངོ་བོ་བཅས་ལ་སྡང་ཟུག་བྱས་པ་སྟོན་གྱི་ཡོད་པ་མ་ཟད། འགྲོ་བ་མིའི་ཐོབ་ཐང་དང་ཆོས་དད་རང་དབང་ལའང་རྩིས་མེད་རྡོག་རོལ་བཏང་ཡོད། རྒྱ་ནག་གཞུང་གིས་བོད་ནང་གདུག་རྩུབ་ཅན་གྱི་སྲིད་བྱུས་ལག་བསྟར་བྱེད་བཞིན་པ་དེར་བོད་མིའི་སྒྲིག་འཛུགས་ནས་མཐའ་གཅིག་ཏུ་ངོ་རྒོལ་གནང་གི་ཡོད། ཅེས་གསུངས།།