རྒྱ་གར་མང་གཙོའི་དུས་ཆེན་ཐེངས་ ༧༣ པ་སྲུང་བརྩིའི་མཛད་སྒོའི་ཐོག་དཔལ་ལྡན་ཚོགས་གཞོན་མཆོག་དང་། སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་རྣམ་གཉིས་སྐུ་མགྲོན་དུ་ཕེབས་པ།

གསར་ལས་ཁང་གི་གསར་འགོད་པས།

༢༠༢༢-༠༡-༢༧

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༢ ཟླ་ ༡ ཚེས་ ༢༦ རེས་གཟའ་ལྷག་པའི་ཉིན་གྱི་སྔ་དྲོ་ཆུ་ཚོད་ ༡༡།༠༠ ཙམ་ལ་ཧི་མ་ཅཱལ་མངའ་སྡེའི་ཀངྒ་ར་རྫོང་ལས་ཁུངས་ཀྱི་གོ་སྒྲིག་འོག་རྡ་སའི་སྐོར་སྲུང་ཉེན་རྟོག་ཐང་ཆེན་དུ་རྒྱ་གར་མང་གཙོའི་དུས་ཆེན་ཐེངས་ ༧༣ པ་སྲུང་བརྩི་གཟབ་རྒྱས་ཞུས་གནང་སོང་།

སྐབས་དེར་ཧི་མ་ཅཱལ་ཀངྒ་ར་རྫོང་སྡེ་ལས་ཁུངས་ནས་མགྲོན་འབོད་གནང་དོན་ལྟར། མཛད་སྒོའི་སྐུ་མགྲོན་དུ་དཔལ་ལྡན་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་དང་། སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་རྣམ་གཉིས་ཆེད་ཕེབས་གནང་བ་དང་། དེ་བཞིན་མཛད་སྒོའི་སྐུ་མགྲོན་གཙོ་བོར་རྒྱ་གར་ཧི་མ་ཅཱལ་མངའ་སྡེའི་གློག་གི་བློན་ཆེན་སྐུ་ཞབས་སུག་རམ་ཅའོ་དེ་རི་ (Shri Sukhram Chaudhary, Himachal Pradesh Power Minister) མཆོག་དང་། གཞན་སྐུ་མགྲོན་དུ་ཀངྒ་ར་ཁྱབ་ཁོངས་རྒྱ་གར་དབུས་གཞུང་གི་གྲོས་ཚོགས་འོག་མའི་འཐུས་མི་སྐུ་ཞབས་ཀི་ཤན་ཀཱ་པུར་ (Kishan Kapoor, Member of Parliament of Lok Sabha from Kangra) མཆོག རྡ་རམ་ས་ལའི་ཧི་མཱ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཝི་ཤལ་ནེ་རི་ཡ་ (Shri Vishal Nehria, MLA Dharamshala) ལགས་དང་། གཞན་མངའ་སྡེའི་གྲོས་ཚོགས་འཐུས་མི་ཁག་ཅིག ཀངྒ་ར་རྫོང་དཔོན་སྐུ་ཞབས་ནི་པུན་ ཇིན་ཌལ་ (Dr.Nipun Jindal) ལགས། རྡ་ས་གྲོང་སྡེ་ལས་ཁུངས་ཀྱི་སྤྱི་ཁྱབ་སྐུ་ཞབས་ཨོན་ཀར་ནེ་རི་ཡ་ (Shri.Onkar Nehria,Mayor of Dharamshala Municipal Corporation) ལགས། རྡ་ས་ཉེན་རྟོག་དཔོན་སོགས་ཕེབས་གནང་འདུག

དེ་ཡང་མཛད་སྒོའི་ཐོག་མར་སྐུ་མགྲོན་གཙོ་བོ་མཆོག་ནས་རྒྱ་གར་རྒྱལ་དར་མཁའ་དབྱིངས་སུ་སྒྲེང་འཛུགས་གནང་རྗེས། ཉེན་རྟོག་རུ་ཁག་གིས་རུ་སྒྲིག་གི་ལམ་ནས་ཆེ་མཐོང་ཞུས་གནང་བ་དང་། དེ་ནས་སྐུ་མགྲོན་གཙོ་བོ་མཆོག་གིས་མཛད་སྒོ་དང་འབྲེལ་བའི་གསུང་བཤད་གནང་གྲུབ་མཚམས། ས་གནས་མི་མང་ནས་རིག་གཞུང་འཁྲབ་སྟོན་གཟིགས་འབུལ་ཞུས་གནང་སོང་།

དེ་རྗེས་སྐུ་མགྲོན་གཙོ་བོ་མཆོག་དང་། གཞན་སྐུ་མགྲོན་ཁག་ཅིག དེ་བཞིན་དཔལ་ལྡན་ཚོགས་གཞོན་མཆོག་ནས་ཀངྒ་ར་རྒྱ་གྲམ་དམར་པོའི་ཚོགས་པ་ (Red Cross Society,Kangra) ཡིས་སྤྱི་ཚོགས་ཞབས་ཞུའི་ཆེད་གོ་སྒྲིག་ཞུས་པའི་རྒྱན་ཤོག་འཐེན་གནང་རྗེས་ཐེངས་འདིའི་མཛད་སྒོ་གྲོལ་གནང་སོང་།

གཞན་ཡང་མཛད་སྒོའི་ཐོག་དཔལ་ལྡན་ཚོགས་གཞོན་མཆོག་གིས་སྐུ་མགྲོན་གཙོ་བོ་རྒྱ་གར་ཧི་མ་ཅཱལ་མངའ་སྡེའི་གློག་གི་བློན་ཆེན་སྐུ་ཞབས་སུག་རམ་ཅའོ་དེ་རི་མཆོག་དང་། རྒྱ་གར་དབུས་གཞུང་གི་གྲོས་ཚོགས་འོག་མའི་འཐུས་མི་སྐུ་ཞབས་ཀི་ཤན་ཀཱ་པུར་མཆོག རྡ་རམ་ས་ལའི་ཧི་མཱ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཝི་ཤལ་ནེ་རི་ཡ་ལགས་བཅས་ལ་འཚམས་འདྲིའི་མཇལ་དར་ཕུལ་བ་དང་། ཆབས་ཅིག་གཞིས་བྱེས་བོད་མི་ཡོངས་དང་། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་རྒྱ་གར་མང་གཙོའི་དུས་ཆེན་ལ་འཚམས་འདྲི་ཞུས་གནང་སོང་བ་བཅས། །