༄༅། །ཕྱི་ལོ་ ༢༠༢༢ ཟླ་བ་ ༡ ཚེས་ ༡༠ ཉིན་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བཀྲས་མཐོང་བསྟན་འཛིན་དབང་པོ་ལགས་ཀྱིས་བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་དང་མཇལ་འཕྲད་གནང་ཡོད། བཀྲས་མཐོང་བསྟན་འཛིན་དབང་པོ་ལགས་ཀྱིས་ཕྱི་ལོ་༢༠༢༡ ཟླ་བ་ ༡༠ པའི་ནང་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གྱི་ལས་འགན་བཞེས་གནང་ཡོད་པ་རེད། 

མཇལ་འཕྲད་སྐབས་བཀྲས་མཐོང་བསྟན་འཛིན་དབང་པོ་ལགས་ཀྱིས་རྒྱལ་སྤྱིའི་བོད་དོན་ལས་འགུལ་ཁང་གིས་ཆབ་སྲིད་བཙོན་ཟུར་དོན་གྲུབ་དབང་ཆེན་ལགས་དང་ལྷན་དུ་སྤེལ་བཞིན་པའི་ལས་འགུལ་སྐོར་ངོ་སྤྲོད་དང་སྦྲགས། ད་ཐེངས་ཀྱི་ལས་འགུལ་སྐབས་གནས་ཚུལ་ཚགས་ཤོག་སྟེང་རྒྱ་ཆེན་པོ་ཁྱབ་འཕེལ་བྱུང་བར་འདོད་བློ་ཚིམ་པོ་བྱུང་ཚུལ་གསུངས། དེ་བཞིན་བཀྲས་མཐོང་བསྟན་འཛིན་དབང་པོ་ལགས་ཀྱིས་ཡུ་རོབ་ནང་གི་བོད་ཀྱི་རྩ་དོན་དང་འབྲེལ་བའི་གནད་དོན་མང་པོའི་སྐོར་སྐུ་ཚབ་དོན་གཅོད་ཀྱིས་རྒྱུས་ལོན་གནང་ཡོད། 

སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་སྐུ་ཚབ་དོན་གཅོད་ཁང་དང་རྒྱལ་སྤྱིའི་བོད་དོན་ལས་འགུལ་ཁང་བར་གྱི་འབྲེལ་བའི་རྒྱབ་ལྗོངས་གནས་ཚུལ་ཞིབ་ཕྲ་འགྲེལ་བརྗོད་སྐྱོན་པ་མ་ཟད། སྐུ་ཚབ་དོན་གཅོད་ཁང་དང་རྒྱལ་སྤྱིའི་བོད་དོན་ལས་འགུལ་ཁང་གིས་སོ་སོའི་ལས་དོན་བྱེད་སྒོ་རྣམས་ཤེས་རྟོགས་ཡོད་པའི་ཐོག་མཐུན་ལམ་ལྡན་པའི་ངང་སྐབས་མང་པོར་ལས་འགུལ་ལྷན་དུ་སྤེལ་བ་དག་ལེགས་གྲུབ་བྱུང་ཡོད་ཅེས་དང་། སྐུ་ཚབ་དོན་གཅོད་ཁང་གིས་རྟག་ཏུ་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་བྱེད་སྒོ་ལས་དོན་ཁག་ལ་ཡི་རང་བསྔགས་བརྗོད་ཡོད་ཅེས་གསུངས། 

དེའི་སྔོན་ལའང་ཁོང་གཉིས་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ཟུར་པ་ཚེ་རིང་བྱམས་པ་ལགས་ཀྱི་གྱེས་སྟོན་སྐབས་མཇལ་འཕྲད་ཀྱིས་མཉམ་འབྲེལ་ལས་འགུལ་སྤེལ་ཕྱོགས་ཐད་གྲོས་བསྡུར་གནང་ཡོད་པ་མ་ཟད། ཕྱི་ལོ་ ༢༠༢༡ ཟླ་བ་ ༡༢ ནང་ལའང་བ་ར་སེལ་ (Brussels) དུ་དོན་གྲུབ་དབང་ཆེན་ལགས་ཀྱི་ལས་འགུལ་སྐབས་མཉམ་ཞུགས་གནང་ཡོད། 

མཇལ་མོལ་དེ་ལ་བརྟེན་ནས་སྐུ་ཚབ་དོན་གཅོད་ཁང་དང་ཡུ་རོབ་རྒྱལ་སྤྱིའི་བོད་དོན་ལས་འགུལ་ཁང་བར་གྱི་འབྲེལ་བ་ཇེ་བརྟན་དུ་བཏང་བ་མ་ཚད་དོན་ཕན་ལྡན་པའི་མ་འོངས་ལས་འཆར་ཁག་ལ་ལམ་བུ་བཏོད་ཡོད་པ་བཅས།།