༄༅། །མེའོ་ཆོས་འཕེལ་གླིང་བོད་མིའི་གཞིས་ཆགས་ཀྱི་བུ་བསྟན་འཛིན་ཚེ་རིང་ལགས་སུ་ཕྱི་ལོ་ ༢༠༢༢ ཟླ་བ་ ༡ ཚེས་ ༢༦ ཉིན་རྒྱ་གར་མི་སེར་རྒྱལ་ཁབ་ཀྱི་ཉིན་མོ་ཐེངས་ ༧༣ པའི་ཐོག་མེའོ་རྫོང་དཔོན་གཞོན་པའི་ལས་ཁུངས་ནས་གཟེངས་བསྟོད་ཕྱག་འཁྱེར་ཞིག་གནང་འདུག 

དེ་ཡང་བསྟན་འཛིན་ཚེ་རིང་ལགས་ནི། ཕྱི་ལོ་ ༢༠༢༠ ལོའི་སྲིད་སྐྱོང་གཟེངས་རྟགས་འཐོབ་མཁན་གྲས་ཤིག་ཡིན་པ་དང། ཁོང་གིས་ཕྱི་ལོ་ ༢༠༢༡ ཟླ་བ་ ༡༠ ཚེས་ ༠༨ ནས་བཟུང་འཛིན་རིམ་ ༥ ནས་ ༨ བར་གྱི་སློབ་ཕྲུག་རྣམས་ལ་རིན་མེད་ཟུར་ཁྲིད་གནང་ཡོད་པ་མ་ཟད། གཞིས་ཆགས་ཉེ་འགྲམ་དུ་གནས་འཁོད་ཇ་ཤིང་ནང་ལས་ཀ་བྱེད་མཁན་ངལ་རྩོལ་བའི་ཕྲུ་གུ་རྣམས་ལའང་དམིགས་བསལ་ཟུར་ཁྲིད་གནང་འདུག

གཟེངས་བསྟོད་ཕྱག་འཁྱེར་ནང་དུ། མེའོ་བོད་མིའི་གཞིས་ཆགས་ཀྱི་དང་བླངས་དགེ་རྒན་བསྟན་འཛིན་ཚེ་རིང་ལགས་ཀྱིས་མེའོ་ས་གནས་ཡར་རྒྱས་ཆེད་ཞབས་ཞུ་ལྷོད་མེད་སྒྲུབ་པར་གཟེངས་བསྟོད་ཀྱི་ཚུལ་དུ་ཕུལ་ཞེས་གསལ་འདུག །