༄༅། །ཕྱི་ལོ་ ༢༠༢༢ ཟླ་ ༡ ཚེས་ ༡༠ ཉིན་བྱང་ཨ་རི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་དང་དོན་ཁང་གི་དྲུང་ཆེ་བཀྲ་ཤིས་དོན་གྲུབ་ལགས་རྣམ་གཉིས་ཀྱིས་དྲ་ལམ་བརྒྱུད་ཨ་རིའི་རོགས་ཚོགས་ (USAID) ཀྱི་ཨེ་ཤི་ཡ་ལས་དོན་ཚན་པའི་འཛིན་སྐྱོང་ཕྱག་རོགས་གཞོན་པ་ཨན་ཇ་ལི་ཀཱོར་(Anjali Kaur) ལགས་དང་། ཨ་རིའི་རོགས་ཚོགས་ཀྱི་ལྷོ་དབུས་ཨེ་ཤི་ཡ་ལས་དོན་ཚན་པའི་འགན་འཛིན་ཐེའོ་ཌོ་ར་ཌེལ་ (Theodora B Dell) ལགས། ཨ་རིའི་རོགས་ཚོགས་ཀྱི་རྒྱ་གར་དང་འབྲུག་ལས་དོན་ཚན་པའི་ལས་གཞི་ཐབས་བྱུས་ཁྱད་མཁས་པ་ཇོལ་ཊེ་ཡི་ལོར་ (Joel Taylor) ལགས། ཨ་རིའི་རོགས་ཚོགས་ཀྱི་རྒྱ་གར་ལས་དོན་ཚན་པའི་འགན་འཛིན་ཇན་ནེ་ཧྥར་ལོ་རེ་ (Jennifer Lowry) ལགས། མེ་གྷན་ (Megan McLaughlin) ལགས་བཅས་དང་ལྷན་དུ་མཇལ་འཕྲད་གནང་ཡོད།

སྐབས་དེར་ཨ་རིའི་རོགས་ཚོགས་ཀྱི་ལྷོ་དབུས་ཨེ་ཤི་ཡ་ལས་དོན་ཚན་པའི་འགན་འཛིན་ཐེའོ་ཌོ་ར་ཌེལ་ལགས་ཀྱིས་ཨ་རིའི་རོགས་ཚོགས་ཀྱི་ངོས་ནས་རྒྱ་བལ་གཉིས་ཀྱི་ནང་ཡོད་པའི་བཙན་བྱོལ་བོད་མི་རྣམས་ཀྱི་འཚོ་བ་ཡར་རྒྱས་གོང་འཕེལ་དང་རང་མགོ་རང་ཐོན་ཡོང་སླད་དཔལ་འབྱོར་གྱིས་མཐུན་འགྱུར་རོགས་རམ་གནང་བཞིན་པ་སོགས་ཀྱི་སྐོར་ངོ་སྤྲོད་མདོར་བསྡུས་གནང་ཡོད།

བྱང་ཨ་རི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་ཀྱིས་ཨ་རིའི་རོགས་ཚོགས་ནས་བོད་མིའི་སྒྲིག་འཛུགས་ཀྱི་ལས་གཞི་འདྲ་མིན་དང་། དེ་བཞིན་བཙན་བྱོལ་བོད་མི་རྣམས་ལ་དཔལ་འབྱོར་གྱིས་མཐུན་འགྱུར་རོགས་རམ་གནང་དང་གནང་བཞིན་པར་ཐུགས་རྗེ་ཆེ་ཞུས་པ་དང་འབྲེལ་འབྱུང་འགྱུར་ཨ་རིའི་རོགས་ཚོགས་དང་ལྷན་དུ་མཉམ་རུབ་ཀྱིས་ཕྱག་ལས་གནང་འདོད་ཀྱི་འདུན་པ་ཤུགས་ཆེན་པོ་ཡོད་པ་སོགས་ཀྱི་སྐོར་གསུངས་ཡོད།

ཨ་རི་རོགས་ཚོགས་ཀྱི་ཨེ་ཤི་ཡ་ལས་དོན་ཚན་པའི་འཛིན་སྐྱོང་ཕྱག་རོགས་གཞོན་པ་ཨན་ཇ་ལི་ཀཱོར་ལགས་ཀྱིས་ཨ་རིའི་རོགས་ཚོགས་ཀྱི་ངོས་ནས་བཙན་བྱོལ་བོད་མི་རྣམས་ལ་མུ་མཐུད་རོགས་རམ་གནང་རྒྱུའི་ཆོད་སེམས་བརྟན་པོ་ཡོད་པའི་སྐོར་དང་། བོད་མིའི་སྒྲིག་འཛུགས་དང་ལྷན་དུ་མུ་མཐུད་མཉམ་རུབ་གནང་རྒྱུའི་འདུན་པ་ཡོད་པ་མ་ཟད། གང་མགྱོགས་བོད་མིའི་སྒྲིག་འཛུགས་ཀྱི་དབུ་ཁྲིད་རྣམ་པ་དང་ལྷན་དུ་དངོས་སུ་མཇལ་འཕྲད་གནང་འདོད་ཀྱི་འདུན་པ་ཤུགས་ཆེ་ཡོད་སྐོར་གསུངས་ཡོད་པ་བཅས།།