༄༅། །ཕྱི་ལོ་ ༢༠༢༢ ཟླ་ ༠༡ ཚེས་ ༡༣ རེས་གཟའ་ཕུར་བུ་ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༩༤ དེ་འཕྲོད་བསྟེན་ལས་ཁུངས་ཀྱི་དྲུང་གཞོན་བསྟན་འཛིན་ཀུན་བཟང་ལགས་དང་། སྨན་པ་ཚེ་རིང་མཚམས་གཅོད་ལགས། སྨན་པ་བསྟན་འཛིན་བརྩོན་འགྲུས་ལགས་གསུམ་གྱིས་སྤེལ་གནང་སོང་།
དེ་ཡང་ཐོག་མར་འཕྲོད་བསྟེན་དྲུང་གཞོན་བསྟན་འཛིན་ཀུན་བཟང་ལགས་ཀྱིས་གསུང་དོན། དེང་སྐབས་རྡ་ས་ཁུལ་དང་དེ་བཞིན་བཙན་བྱོལ་བོད་མིའི་སྤྱི་ཚོགས་ནང་རིམ་བཞིན་ཨོ་མི་ཀྲོན་ (Omicron) ཞེས་པའི་ནད་ཡམས་འདི་ཉིད་ཁྱབ་བརྡལ་ཤུགས་ཆེ་རུ་འགྲོ་བཞིན་ཡོད་སྟབས། དཔལ་ལྡན་བཀའ་ཤག་ནས་ལམ་སྟོན་ཁག་གཅིག་ཕེབས་ཡོད་པ་མ་ཟད། དེ་རིང་སྔ་དྲོ་ནས་དཔལ་ལྡན་སྲིད་སྐྱོང་མཆོག་གིས་རྒྱ་གར་དང་བལ་ཡུལ་ནང་གི་ས་གནས་འགོ་འཛིན་དང་ལྷན་ཏོག་དབྱིབས་གཉན་རིམས་ཀྱི་གནས་སྟངས་རྒྱུས་ལོན་དང་ལམ་སྟོན་གནང་རྒྱུ་སོགས་ཀྱི་དྲ་ཐོག་ཚོགས་འདུ་འཚོགས་བཞིན་ཡོད།
ཚོགས་འདུའི་ཐོག་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས་ཀྱིས་ནད་ཡམས་འདི་ཉིད་དེ་སྔ་དང་མི་འདྲ་བར་ཧ་ཅང་འགོ་མྱུར་པོ་ཡོད་སྟབས། ཁ་རས་ངེས་པར་དུ་གྱོན་དགོས་པ་དང་། མི་ཚོགས་མང་སར་འགྲོ་མི་དགོས་པ་གཙོ་འདོན་གནང་རྒྱུ། དེ་བཞིན་རླུང་འགྲོ་ཡག་པོ་དགོས་རྒྱུ་ཧ་ཅང་གལ་ཆེན་པོ་ཡིན་སྐོར་ལམ་སྟོན་གནང་སོང་།
ལོ་ན་ ༦༠ ཡན་དང་བླ་གཉན་གྱི་ནད་གཞི་ཡོད་མཁན་རྣམས་ལ་ནུས་སྤར་སྔོན་ཁབ་རྒྱག་བཞིན་ཡོད་ནའང་ཁབ་དེ་བརྒྱབ་པར་སྔོན་འགོག་སྨན་ཁབ་རིམ་པ་གཉིས་པ་བརྒྱབ་ནས་ཟླ་བ་དགུ་ཕྱིན་ཟིན་དགོས། ཞེས་སོགས་གསུངས།
དེ་རྗེས་ལས་དོན་ཚོགས་ཆུང་གི་གསར་འགོད་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས་འདས་པའི་བདུན་ཕྲག་གཅིག་ནང་ཚོགས་ཆུང་གི་སྙན་ཐོའི་སྐོར་གསུང་དོན། འདས་པའི་བདུན་ཕྲག་ནང་རྒྱ་གར་ནང་གི་བཙན་བྱོལ་བོད་མིའི་གཞིས་ཆགས་ཁག་ ༡༠ ནང་གི་བོད་མི་གྲངས་ ༤༧༦ རང་ཁྱིམ་དུ་ཟུར་བཀག་ཐོག་བཞུགས་ཡོད་པ་དང་། ཚོགས་སྡེ་ཁག་གི་མཐུན་འགྱུར་འོག་འགོག་དབྱེ་ཟུར་འཇོག་ཁང་དུ་བཞུགས་མཁན་མི་གྲངས་ ༣༣༦ བཅས་ཁྱོན་བསྡོམས་བོད་མི་གྲངས་ ༨༡༢ འགོག་དབྱེ་ཟུར་བཀག་ཐོག་བཞུགས་ཡོད། གཞན་ཡང་ནད་ཡམས་ཁྱབ་བརྡལ་སྔོན་འགོག་སླད་འདས་པའི་བདུན་ཕྲག་ནང་རྒྱ་གར་ནང་གི་ས་གནས་གྲངས་ ༡༦ གི་བོད་མི་གྲངས་ ༡༥༣༡ ལ་ནད་གཞི་ཕོག་ཡོད་མེད་བརྟག་དཔྱད་གནང་ཐུབ་པ་བྱུང་ཡོད། དེ་བཞིན་འདས་པའི་བདུན་ཕྲག་ནང་ཏོག་དབྱིབས་ནད་གཞི་ཕོག་མཁན་མི་གྲངས་ ༤༣ ལ་སེམས་ཁམས་འཕྲོད་བསྟེན་དང་འབྲེལ་བའི་ལམ་སྟོན་སློབ་གསོ་གནང་ཐུབ་པ་བྱུང་འདུག
དེ་བཞིན་སྔོན་འགོག་སྨན་ཁབ་རྒྱག་སྒོ་ཚུགས་པ་ནས་བཟུང་ད་བར་རྒྱ་གར་ནང་གི་བོད་མི་ལོ་ན་ ༡༨ ཡན་གྲངས་ ༤༨༦༧༣ ལ་སྔོན་འགོག་སྨན་ཁབ་རིམ་པ་དང་པོ་དང་གཉིས་པ་གཉིས་ཀ་བརྒྱབ་ཟིན་པ་དང་། མི་གྲངས་ ༡༦༢༠ ལ་སྔོན་འགོག་སྨན་ཁབ་རིམ་པ་དང་པོ་བརྒྱབ་ཟིན། གཞན་ཡང་རང་ལོ་ ༡༥ ནས་ ༡༧ བར་གྱི་བྱིས་པ་ ༡༡༧༨ ལ་སྔོན་འགོག་སྨན་ཁབ་རིམ་པ་དང་པོ་དེ་བརྒྱབ་ཟིན་པ་མ་ཟད། སྨན་པ་དང་འཕྲོད་ལས་པ། མདུན་ཐོན་གདོང་ལེན་པ་བཅས་ཁྱོན་མི་གྲངས་ ༢༨༤ དང་། རང་ལོ་ ༦༠ ཡན་གྱི་རྒན་རྒོན་གྲངས་ ༡༠༩༧ ལ་ནུས་སྤར་སྔོན་ཁབ་བརྒྱབ་ཟིན། ཕྱོགས་མཚུངས་བལ་ཡུལ་ནང་གི་བོད་མི་གྲངས་ ༦༩༩༠ ལ་སྔོན་འགོག་སྨན་ཁབ་ཆ་ཚང་ཐོབ་ཡོད།
འདས་པའི་བདུན་ཕྲག་གཅིག་གི་ནང་རྒྱ་གར་ནང་གི་བོད་མི་གྲངས་ ༤༢༩ ལ་ནད་གཞི་ཕོག་པ་ར་འཕྲོད་བྱུང་ཡོད་པ་ལས་སྐྱེས་པ་གྲངས་ ༢༢༢ དང་། བུད་མེད་གྲངས་ ༢༠༧ དེའི་ནང་ནས་དགུང་ན་མཐོ་ཤོས་དེ་ལོ་ ༩༠ དང་ཆུང་ཤོས་དེ་བྱིས་པ་ལོ་ ༡ ཡིན། ད་བར་རྒྱ་གར་དང་བལ་ཡུལ་ནང་གི་བོད་མི་ནད་གཞི་ཕོག་པ་ཁྱོན་མི་གྲངས་ ༧༤༨༩ དང་། དྲག་སྐྱེད་བྱུང་བ་མི་གྲངས་ ༦༨༣༢། འདས་གྲོངས་སུ་གྱུར་བ་མི་གྲངས་ ༡༦༢། ད་ལྟ་གསོ་བཅོས་བྱེད་བཞིན་པ་མི་གྲངས་ ༤༩༥ ཡོད་ཅེས་སོགས་གསུངས་གྲུབ་མཚམས་རྡ་ས་བདེ་ལེགས་སྨན་ཁང་གི་སྨན་པ་བསྟན་འཛིན་བརྩོན་འགྲུས་ལགས་ཀྱིས་ལམ་སྟོན་གནང་དོན། ད་ལྟའི་ཆར་རྒྱ་གར་ནང་ཏོག་དབྱིབས་གཉན་རིམས་ཀྱི་ནད་གཞི་ཕོག་མཁན་གྱི་གྲངས་འབོར་གང་ཙམ་ཇེ་མང་དུ་འགྲོ་བཞིན་འདུག་པར་བརྟེན་ནད་རླབས་གསུམ་པ་དེ་སླེབས་ཟིན་པ་ལྟ་བུ་རེད། འདས་པའི་ཆུ་ཚོད་ ༢༤ ནང་རྒྱ་གར་དུ་ནད་གཞི་གསར་པ་ཕོག་མཁན་མི་གྲངས་འབུམ་གཉིས་དང་སྟོང་ཕྲག་བཞི་བཅུ་ཞེ་བདུན་ཙམ་བྱུང་འདུག
དེང་སྐབས་བདེ་ལེགས་སྨན་ཁང་དུ་ཆམ་ནད་ཕོག་པའི་ནད་པ་མང་པོ་ཞིག་སྨན་པ་བསྟེན་གཏུགས་སླད་ཡོང་གི་འདུག གལ་ཏེ་ཛ་དྲག་གི་ནད་གཞི་མེད་ན་ སྨན་ཁང་སོགས་སུ་སྨན་པ་བསྟེན་གཏུགས་ཉུང་ཙམ་འགྲིམ་འགྲུལ་རིགས་ཉུང་ཙམ་བྱ་དགོས། ད་ལྟའི་ཆར་རྒྱ་གར་ནང་ཏོག་དབྱིབས་གཉན་རིམས་ཀྱི་གནས་སྟངས་ཕྲན་བུ་ཛ་དྲག་ཏུ་འགྲོ་བཞིན་ཡོད་པར་བརྟེན་མང་ཚོགས་ནས་སྔོན་འགོག་གི་ཐབས་ལམ་ཁག་མུ་མཐུད་སྟེན་དགོས་རྒྱུ་ཧ་ཅང་གལ་ཆེན་པོ་ཡིན་པ་མ་ཟད། ལྷག་པར་ཁ་རས་ངེས་པར་དུ་གྱོན་དགོས་རྒྱུ་ཧ་ཅང་གལ་ཆེན་པོ་རེད་འདུག ཅེས་སོགས་ཀྱི་ལམ་སྟོན་གནང་སྟེ་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༩༤ དེ་མཇུག་སྒྲིལ་གནང་ཡོད། །
