༄༅། །ཕྱི་ལོ་ ༢༠༢༢ ཟླ་ ༡ ཚེས་ ༦ རེས་གཟའ་ཕུར་བུ་ཉིན་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༩༣ དེ་སྤེལ་གནང་སོང་།

དེ་ཡང་ཐོག་མར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསུང་དོན། དེ་རིང་ཆེད་མངགས་མང་ཚོགས་ལ་གནད་དོན་གལ་ཆེན་ཞིག་སྟེ་ཏོག་དབྱིབས་གཉན་རིམས་དང་འབྲེལ་བའི་སྔོན་འགོག་སྐོར་ད་ལྟ་ནས་བསམ་བློ་མ་བཏང་བ་ཡིན་ན། ཕྱིས་སུ་སྤྱི་ཚོགས་ནང་དཀའ་ངལ་ཆེན་པོ་ཞིག་འཕྲད་རྒྱུའི་ཉེན་ཁ་ཡོད་སྟབས། དེ་རིང་མང་ཚོགས་ལ་ཞུ་རྒྱུའི་ལས་རིམ་འདིའི་ཐོག་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཕེབས་ཡོད། ཏོག་དབྱིབས་གཉན་རིམས་འདི་ཐོག་མར་བྱུང་བ་ནས་བཟུང་ཕྱི་ལོ་ ༢༠༢༡ ཟླ་ ༥ ཚེས་ ༢༧ བར་བཙན་བྱོལ་བོད་མིའི་སྤྱི་ཚོགས་ནང་མི་གྲངས་ ༡༡༦ ཙམ་འདས་གྲོངས་སུ་ཕྱིན་ཡོད། ད་བར་ཁྱོན་བོད་མི་གྲངས་ ༡༦༢ འདས་གྲོངས་སུ་ཕྱིན་པའི་ཁོངས་ཕྱི་ཟླ་ ༥ ཚེས་ ༢༧ ནས་ད་བར་ཟླ་བ་བདུན་ལྷག་ཙམ་རིང་བོད་མི་གྲངས་ ༤༦ ཙམ་ལས་འདས་གྲོངས་ཕྱིན་མེད་པ་འདི་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་གཙོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་དང་ཚོགས་མི་སྨན་པ་ས་འདུ་ཚང་ཚེ་བརྟན་རྡོ་རྗེ་ལགས། སྨན་པ་ཚེ་དབང་རྟ་མགྲིན་ལགས། ཕྱི་ལུགས་སྨན་པ་བསྟན་འཛིན་བརྩོན་འགྲུས་ལགས་དང་སྨན་པ་རིན་ཆེན་བཟང་མོ་ལགས། ཤེས་རིག་དྲུང་ཆེ་འཇིགས་མེད་རྣམ་རྒྱལ་ལགས། བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས། བོད་ཀྱི་སྨན་རྩིས་ཁང་གི་འགན་འཛིན་ཚེ་རིང་བཀྲ་ཤིས་ལགས་སོགས་ཀྱིས་འགན་བཞེས་པའི་ཐོག་དགོན་སྡེ་ཁག་དང་། བླ་མ། གཞུང་ཁོངས་མིན་པའི་ཚོགས་པ་ཁག་དང་གང་ཟག་སྒེར་སོ་སོ་བཅས་ཕྱི་ནང་ཚང་མས་མཉམ་རུབ་གནང་བ་ལ་བརྟེན་ནས་གནས་སྟངས་འདི་ལྟར་ཆགས་ཡོད། གང་ལྟར་གནས་སྟངས་ཐབས་སྡུག་པོའི་འོག་ནས་བཟང་བ་ལྟ་བུ་ཆགས་ཡོད་པ་དང་། ད་བར་བཙན་བྱོལ་བོད་མིའི་སྤྱི་ཚོགས་ནང་སྔོན་འགོག་སྨན་ཁབ་གཉིས་ཀར་བརྒྱབ་ཟིན་པ་ཡར་ཐོན་ཅན་གྱི་རྒྱལ་ཁབ་དང་གཅིག་མཚུངས་སླེབས་ཡོད།

ད་ལྟའི་དུས་སུ་འཛམ་གླིང་ནང་ཏོག་དབྱིབས་གཉན་རིམས་ཀྱི་ནད་འབུའི་ངོ་བོ་འགྱུར་བ་ཕྲན་བུ་ཕྱིན་ཏེ་ཨོ་མི་ཀྲོན་ (Omicron) ཞེས་པའི་ནད་ཡམས་འདི་ཉིད་ཁྱབ་བརྡལ་ཤུགས་ཆེ་འགྲོ་བཞིན་པའི་གནས་སྟངས་ཤིག་ཞུ་བཞིན་ཡོད། ད་ལྟ་ཡིན་ནའང་ཨོ་མི་ཀྲོན་སྐོར་འཛམ་གླིང་གི་ཚན་རིག་པས་ཉམས་ཞིབ་གནང་དང་གནང་བཞིན་པ་རེད། ཉམས་ཞིབ་གནང་བཞིན་པའི་བརྒྱུད་རིམ་གྱི་ཐོག་ནས་ད་ལྟ་གསུང་བཞིན་པ་ནི་ཌེལ་ཊ་ (Delta) དང་བསྡུར་བ་ཡིན་ན་སྲོག་ལ་ཉེན་ཁ་ཆུང་བ་ཡོད་སྐོར་གསུང་བཞིན་ཡོད། སྔོན་འགོག་སྨན་ཁབ་གཉིས་ཀར་བརྒྱབ་ཟིན་པ་རྣམས་ལ་ནད་ཡམས་འདི་རྩ་བ་ཉིད་ནས་མ་འགོ་བ་དེ་འདྲ་རེད་མི་འདུག འགོས་པ་དེ་འདྲ་མང་པོ་བྱུང་འདུག་པ་མ་ཟད། འདས་གྲོངས་སུ་གྱུར་བ་ཡང་བྱུང་འདུག 

བཙན་བྱོལ་བོད་མིའི་སྤྱི་ཚོགས་ལ་མཚོན་ན། ཏོག་དབྱིབས་གཉན་རིམས་ཕོག་པ་མི་གྲངས་ ༨༠ ཙམ་འདུག དེ་དག་གི་ཁོངས་ནས་མི་གྲངས་མང་ཤོས་དེ་རྡ་ས་ཁུལ་ནས་རེད་འདུག དེ་བཞིན་ལྡི་ལི་ནས་མི་གྲངས་ལྔ་དང་ལ་དྭགས་ནས་མི་གྲངས་གཉིས། སྦེལ་ཀོབ་ནས་གཉིས། མོན་གྷོ་ནས་གཅིག ཧོན་སུར་ནས་གཅིག ཏེ་ཛུ་ནས་གཅིག བདེ་སྐྱིད་གླིང་ནས་གཅིག སྤོན་ཌ་ནས་གཅིག་བཅས་འདུག བརྒྱུད་ལམ་ཁག་དང་བསྟི་གནས་ཁང་ཁག་གི་ཞིབ་འཇུག་གནང་བ་བརྒྱུད་གསུང་གསལ་ལ་ཕལ་ཆེར་འདི་ལོའི་ཕྱི་ཟླ་ ༠༢ ཚེས་ ༠༣ ཙམ་ནས་ནད་རླབས་གསུམ་པ་འདི་ཤུགས་ཧ་ཅང་ཆེ་རུ་འགྲོ་གི་རེད་ཅེས་ཚོད་དཔག་དེ་འདྲ་གནང་བཞིན་འདུག

ནད་ཡམས་ཀྱི་རྐྱེན་པས་གཞུང་འབྲེལ་ལས་དོན་བྱེད་ཕྱོགས་ལའང་ཁྱད་པར་མང་པོ་འགྲོ་བཞིན་ཡོད། ལྷག་པར་ལོ་གསར་སླེབས་ལ་ཉེ་བར་བརྟེན་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཁོངས་ནས་དགོངས་པ་ཞུས་ཏེ་རང་ཁྱིམ་དུ་ལོ་གསར་གཏོང་བར་འགྲོ་རྒྱུའི་བསམ་བློ་ཡོད་མཁན་གང་ཙམ་ཡོད་ངེས་རེད་བསམ་གྱི་འདུག ད་ལྟའི་ནད་ཡམས་ཀྱི་གནས་སྟངས་ལ་གཟིགས་ཏེ་ལོ་གསར་སྐབས་གུང་སེང་ལ་འགྲོ་མི་དགོས་པ་བྱུང་ན་ལེགས། སྤྱིར་ནང་མི་མ་ཐུག་པ་སོགས་ཀྱི་གནས་སྟངས་ཏན་ཏན་ཡོད་ཀྱི་རེད། འོན་ཀྱང་ལོ་གསར་སྐབས་གུང་གསེང་ཕྱིན་པ་ལ་བརྟེན་ནས་ནང་མིའི་སྲོག་དང་འཕྲོད་བསྟེན་ལ་གནོད་སྐྱོན་ཕྱིན་པ་ཡིན་ན། དེའི་འགན་དེ་སོ་སོའི་འཁྱེར་དགོས་ཀྱི་ཡོད། མཐའ་གཅིག་ཏུ་མ་འགྲོ་རོགས་ཞེས་ང་ཚོས་ཞུ་ཤེས་ཀྱི་མི་འདུག གང་ཡིན་ཟེར་ན་གནས་སྟངས་ཛ་དྲག་རིགས་ཡོང་སྲིད་པ་རེད། དེ་བཞིན་ནང་མི་ནད་ཀྱི་མནར་བ་སོགས་ཡོང་སྲིད་པ་རེད། དེ་འདྲའི་གནས་སྟངས་ཡིན་ན་དམིགས་བསལ་རེད་མ་གཏོགས་གཞན་འགྲོ་མི་དགོས་པ་རང་གནང་རོགས་ཞེས་དྲུང་ཆེ་རྣམ་པ་བརྒྱུད་སོ་སོའི་ལས་ཁུངས་དང་ཁྱབ་ཁོངས་ས་གནས་ཁག་ལ་འབོད་སྐུལ་གནང་བཞིན་ཡོད། 

དེ་རིང་འདིར་ཆེད་མངགས་བཅར་ནས་མི་མང་ལ་འབོད་སྐུལ་ཞུ་རྒྱུར། སུད་ཚོང་བ་ས་ཁུལ་སོ་སོའི་རྒྱུན་ལས་རྣམ་པ་ཚོས་སོ་སོའི་ཁྱབ་ཁོངས་མི་མང་རྣམས་ལ་གོ་བསྐོན་སློབ་གསོ་ངེས་པར་དུ་གནང་རོགས། གང་ཡིན་ཟེར་ན་བོད་མི་སུད་ཚོང་བ་ས་ཁུལ་མི་འདྲ་བ་ ༢༥༨ ཙམ་གྱི་ནང་ཡོད་སྟབས། དེ་དག་ཚང་མ་ལོ་གསར་སྐབས་རང་ཁྱིམ་དུ་ལོག་ཡོང་གི་ཡོད་པར་བརྟེན་སྤྱི་ཚོགས་ནང་ནད་ཡམས་ཤུགས་ཆེ་རུ་འགྲོ་རྒྱུའི་ཉེན་ཁ་ཡོད་སྟབས། འགན་དེ་ཕྱོགས་གཉིས་ནས་འཁྱེར་དགོས་ཀྱི་འདུག་མ་གཏོགས་བོད་མིའི་སྒྲིག་འཛུགས་ཁོ་ནས་འགན་འཁུར་ཏེ་དཀའ་ངལ་སེལ་ཐུབ་པ་ཞིག་རེད་མི་འདུག བོད་མི་སུད་ཚོང་བ་རྣམས་རང་ཁྱིམ་དུ་ཕྱིར་མ་ལོག་གོང་ཏོག་དབྱིབས་གཉན་རིམས་ཡོད་མེད་ངེས་པར་དུ་བརྟག་དཔྱད་གནང་དགོས་པ་དང་། ས་གནས་འགོ་འཛིན་རྣམས་ནས་ཀྱང་དེ་སྔ་ཟུར་བཀག་བྱེད་ས་ཡོད་པ་དེ་དག་གྲ་སྒྲིག་གནང་དགོས། གལ་ཏེ་ནད་རླབས་རིགས་བྱུང་བ་ཡིན་ན་མི་མང་ལ་དཀའ་ངལ་མི་འཕྲད་པའི་གནས་སྟངས་ཤིག་བཟོ་དགོས་རྒྱུ་ཧ་ཅང་གལ་ཆེན་པོ་རེད། 

ཕྱི་ཟླ་ ༥ ནང་བོད་མིའི་སྒྲིག་འཛུགས་ནས་ཐག་གཅོད་གནང་བའི་གནད་དོན་གཙོ་བོ་གསུམ་གྱི་ནང་ནས་གཅིག་ནི་སྔོན་འགོག་སྨན་ཁབ་གང་མང་བརྒྱབ་རྒྱུ་དང་། གཉིས་པ། ནད་ཀྱི་མནར་བཞིན་པ་རྣམས་ལ་མཐུན་རྐྱེན་སྦྱར་རྒྱུ། གསུམ་པ། ནད་ཡམས་འདིའི་རྐྱེན་པས་འཚོ་བར་དཀའ་ངལ་འཕྲད་པ་རྣམས་ལ་རོགས་སྐྱོར་བྱེད་རྒྱུ་བཅས་ཡིན། རྒྱ་གར་ནང་ཕྱི་ཚེས་ ༡༠ རྗེས་རང་ལོ་ ༦༠ ཡན་གྱི་རྒན་རྒོན་རྣམས་ལ་སྔོན་འགོག་སྨན་ཁབ་གསུམ་པ་རྒྱག་འགོ་ཚུགས་ཀྱི་ཡོད་སྟབས། ས་གནས་འགོ་འཛིན་རྣམས་ནས་འགན་བཞེས་ཏེ་ས་གནས་སོ་སོའི་སྤྱི་ཁྱབ་སྨན་བཅོས་འགན་འཛིན་དང་འབྲེལ་བ་གནང་སྟེ་བོད་མི་རྣམས་ལ་མངའ་གཞུང་ནས་སྔོན་འགོག་སྨན་ཁབ་མཐུན་འགྱུར་ཐོབ་ཐབས་གནང་དགོས། གལ་ཏེ་དེ་ལྟར་མ་བྱུང་བར་ས་གནས་སུ་དཀའ་ངལ་འཕྲད་ཚེ་འཕྲོད་བསྟེན་ལས་ཁུངས་དང་བདེ་ལེགས་སྨན་ཁང་ནས་མཐུན་རྐྱེན་སྦྱར་རྒྱུ་གྲ་སྒྲིག་ཆ་ཚང་ཡོད་ཅེས་ཞུ་རྒྱུ་ཡིན།

མིའི་སྲོག་བསྐྱབ་རྒྱུའི་ཆེད་དུ་འགྲོ་གྲོན་ག་ཚོད་གཏོང་དགོས་ཀྱི་ཡོད་ནའང་གཏོང་དགོས། ཟླ་གྲངས་གཉིས་གསུམ་ཙམ་གྱི་སྔོན་ལ་ཏོག་དབྱིབས་ཛ་དྲག་ཚོགས་ཆུང་གི་ཚོགས་གཙོ་གཙོས་པའི་བདེ་ལེགས་སྨན་ཁང་གི་འགན་འཛིན་དང་སྨན་རྩིས་ཁང་གི་འགན་འཛིན། དེ་བཞིན་སྨན་རྩིས་ཁང་ནས་སྨན་པ་གཉིས་དང་བདེ་ལེགས་སྨན་ཁང་གི་སྨན་པ་བསྟན་འཛིན་བརྩོན་འགྲུས་ལགས། ཤེས་རིག་དྲུང་ཆེ་བཅས་ས་ཁུལ་ཕལ་ཆེ་བར་སྐོར་སྐྱོད་གནང་སྟེ་ནད་རླབས་གསུམ་པ་བྱུང་བ་ཡིན་ན་མཐུན་རྐྱེན་འདང་ངེས་འདུག་དང་མི་འདུག་ཞིབ་འཇུག་གནང་ཡོད།  ཅེས་སོགས་ཀྱི་གསུང་བཤད་གནང་གྲུབ་མཚམས་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་ཚོགས་གཙོ་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་གསུང་དོན། ཟླ་གྲངས་བཅོ་བརྒྱད་ཙམ་གྱི་ནང་ཏོག་དབྱིབས་གཉན་རིམས་ཀྱི་རྐྱེན་པས་བོད་མི་ཙམ་དུ་མ་ཟད། འཛམ་གླིང་ཁྱོན་ཡོངས་ལ་ལུས་སེམས་གཉིས་ཀྱི་དཀའ་ངལ་འཕྲད་པའི་ནང་གཙོ་བོ་བོད་མིའི་སྒྲིག་འཛུགས་བཀའ་ཤག་གི་ངོས་ནས་ལམ་སྟོན་དང་དཔལ་འབྱོར་གྱི་རྒྱབ་རྟེན་ལ་བརྟེན་ནས་ད་ལྟའི་ཆར་རྒྱ་གར་དང་བལ་ཡུལ་ནང་བཞུགས་མཁན་བོད་མི་ཕལ་ཆེ་བར་གང་ཙམ་ལྟ་རྟོག་གནང་ཐུབ་པ་བྱུང་ཡོད། ཕྱི་ལོ་ ༢༠༢༡ ཟླ་ ༡༡ ཚེས་ ༢༤ ཉིན་ལྷོ་ཨཕ་རི་ཀ་ནས་ཨོ་མི་ཀྲོན་ཞེས་པའི་ནད་ཡམས་ཁྱབ་ཡོང་གི་ཡོད་པའི་གནས་ཚུལ་བྱུང་མ་ཐག་དབུས་ཛ་དྲག་ལས་དོན་ཚོགས་ཆུང་གི་ངོས་ནས་ཚོགས་འདུ་ཚོགས་ཏེ་ཕྱི་ཟླ་ ༡༡ ཚེས་ ༣༠ དང་ཕྱི་ཟླ་ ༡༢ ཚེས་ ༠༤ ཉིན་སློབ་གྲྭ་ཁག་གི་དབུ་འཛིན་དང་སྨན་ཞབས་པ་རྣམས་ལ་སྨན་པ་ཚེ་བརྟན་རྡོ་རྗེ་ལགས་དང་བསྟན་འཛིན་བརྩོན་འགྲུས་ལགས་རྣམ་གཉིས་ཀྱིས་ཨོམ་ནི་ཀྲོན་སྐོར་ངོ་སྤྲོད་དང་། ནད་ཡམས་ལ་གདོང་ལེན་བྱེད་སྟངས། རང་ལོ་ ༡༥ ནས་ ༡༨ བར་གྱི་བྱིས་པར་སྔོན་འགོག་སྨན་ཁབ་བརྒྱབ་རྒྱུའི་སླད་གྲངས་ཐོ་བསྡུ་རུབ་བྱེད་སྟངས་སྐོར་དྲ་ལམ་བརྒྱུད་ཚོགས་འདུ་ཚོགས་ཡོད། ཅེས་སོགས་གསུངས་གྲུབ་མཚམས་རྡ་ས་བདེ་ལེགས་སྨན་ཁང་གི་སྨན་པ་བསྟན་འཛིན་བརྩོན་འགྲུས་ལགས་ཀྱིས་ལམ་སྟོན་གནང་དོན། འདས་པའི་ཆུ་ཚོད་ ༢༤ ནང་རྒྱ་གར་དུ་ནད་གཞི་གསར་པ་ཕོག་མཁན་མི་གྲངས་སྟོང་ཕྲག་དགུ་བཅུ་གོ་གཅིག་མ་ཟིན་ཙམ་བྱུང་འདུག་པ་མ་ཟད། མི་གྲངས་ ༣༢༥ ཙམ་འདས་གྲོངས་སུ་གྱུར་འདུག ཁ་སང་དང་དེ་རིང་དབར་བརྒྱ་ཆ་ ༥༡ ཙམ་ཡར་འཕར་འདུག ཚང་མས་ལག་པ་ཡང་ཡང་བཀྲུ་རྒྱུ་དང་། ཁ་རས་གྱོན་རྒྱུ། རྒྱང་ཐག་འཇོག་རྒྱུ་སོགས་སྔོན་འགོག་གི་ཐབས་ལམ་ཁག་མུ་མཐུད་སྟེན་རོགས། ཞེས་སོགས་ཀྱི་ལམ་སྟོན་གནང་སྟེ་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༩༣ དེ་མཇུག་སྒྲིལ་གནང་ཡོད། །

ཞིབ་ཕྲ་གཟིགས་ཆེད་འདིར་གནོན།