༄༅། །བེལ་ཇི་ཡམ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཕྱི་ལོ་ ༢༠༢༢ ཟླ་བ་ ༡ ཚེས་ ༧ ཉིན་ཐའེ་ཝན་གྱི་སྐུ་ཚབ་མིང་ཡན་ཚའི་(Ming-Yen Tsai) ལགས་དང་འཚམས་འདྲིའི་མཇལ་འཕྲད་གནང་ཡོད། མཇལ་ཕྲད་དེ་ནི་སྐུ་ཞབས་ཚའི་ལགས་ཀྱིས་ལས་ཁུར་བཞེས་རྗེས་སྐུ་ཚབ་རྣམ་གཉིས་ཀྱི་མཇལ་འཕྲད་ཐོག་མ་དེ་ཡིན། ཚའི་ལགས་སྔོན་གྱི་སྐུ་ཚབ་ཧ་རི་ཚང་ (Harry Tseng) ལགས་ཡིན་ཞིང་། ད་ཆ་ཁོང་ཐའེ་ཝན་གྱི་ཕྱི་སྲིད་བློན་ཆེན་གཞོན་པ་ཡིན་པ་དང་། ཁོང་དང་བེལ་ཇམ་སྐུ་ཚབ་དོན་གཅོད་བར་འབྲེལ་ལམ་བཟང་པོ་ཡོད་པ་མ་ཟད། ཁོང་ཉིད་བེལ་ཇི་ཡམ་སྐུ་ཚབ་དོན་གཅོད་ཀྱིས་ཡོ་རོབ་ཀྱི་གྲོས་ཚོགས་སུ་གོ་སྒྲིག་ཞུས་པའི་པར་རིས་འགྲེམས་སྟོན་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་ཐེ་བའི་མཛད་སྒོ་མང་པོར་མཉམ་ཞུགས་གནང་ཡོད། 

མཇལ་འཕྲད་སྐབས་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་རྒྱ་ནག་གཞུང་གི་དྲག་གནོན་ཆེ་བའི་སྲིད་བྱུས་ལ་བརྟེན་ནས་བོད་དང་། ཤར་ཏུར་ཀིས་ཐན། ལྷོ་སོག ཧོང་ཀོང་། ཐའེ་ཝན་ནང་དུ་གནས་སྟངས་ཇེ་སྡུག་ཏུ་འགྲོ་གི་ཡོད་སྐོར་དང་། གཞན་ཡང་རྒྱ་ནག་གིས་བོད་བཙན་བཟུང་བྱས་ནས་ལོ་ངོ་དྲུག་ཅུ་ལྷག་འགྲོ་གི་ཡོད་ནའང་བོད་མིའི་སྙིང་སྟོབས་དང་ལ་རྒྱ་གཏོར་ཐུབ་མེད་ཅེས་གསུངས་པ་དང་སྦྲགས། ཁོང་གིས་ཐའེ་ཝན་ལ་རྒྱུན་དུ་རྒྱ་ནག་གི་འཇིགས་སྐུལ་གཏོང་གི་ཡོད་པར་ཐའེ་ཝན་མི་མང་ལ་གདུང་སེམས་མཉམ་སྐྱེ་ཞུས་ཡོད་པ་རེད། 

སྐུ་ཚབ་ཚའི་ལགས་ཀྱིས་བེལ་ཇམ་སྐུ་ཚབ་དོན་གཅོད་དང་མཇལ་འཕྲད་ཆེད་ཕེབས་པར་ཐུགས་རྗེ་ཞུས་པ་དང་འབྲེལ། ས་གནས་སུ་རྒྱ་ནག་གི་སྲིད་བྱུས་ལ་བརྟེན་ནས་འགྲོ་བ་མིའི་ཐོབ་ཐང་རྡོག་རོལ་ཐེ་བའི་དཀའ་ངལ་དང་གོ་སྐབས་སོགས་གང་ཡོད་ཐད་ངོ་སྤྲོད་གནང་། དེ་བཞིན་ཁོང་གིས་ཡོ་རོབ་མཐུན་ཚོགས་ངོས་ནས་ཡོ་རོབ་མཐུན་ཚོགས་དང་རྒྱ་ནག་གི་འབྲེལ་ལམ་དང་ཁ་གཏད་དུ་འགྲོ་བའི་ལས་དོན་ཇི་སྤེལ་སྐོར་གསུངས། དེའི་ནང་ཡོ་རོབ་མཐུན་ཚོགས་ཀྱི་སྐུ་ཚབ་ཐའེ་ཝན་དུ་ཕེབས་པ་དང་། ཡོ་རོབ་མཐུན་ཚོགས་དང་རྒྱ་ནག་བར་གྱི་ཡོངས་ཁྱབ་མ་འཛུགས་གྲོས་མཐུན་ (EU-China Comprehensive Agreement on Investments) གནས་སྐབས་ཕྱིར་བསྡུ་གནང་བ། ལི་ཐུ་ནི་ཡཱ་གཞུང་ནས་ཐའེ་ཝན་སྐུ་ཚབ་ལས་ཁུངས་འཛུགས་རྗེས་ལི་ཐུ་ནི་ཡཱར་རོགས་སྐྱོར་སྲུང་སྐྱོབ་བྱེད་པ་འཚུད་ཡོད། 

ཕྱོགས་མཚུངས་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཨ་རི་གཞུང་ནས་ཉེ་ལམ་བོད་ཐོག་རྒྱབ་སྐྱོར་ཤུགས་ཆེ་རུ་བཏང་ཡོད་པའི་སྐོར་སྙན་སེང་ཞུས་ཤིང་། དེའི་ནང་གཙོ་བོ་བོད་དོན་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་དང་། བོད་ནང་ཕར་འགྲོ་ཚུར་འོང་གི་གོ་སྐབས་འདྲ་མཉམ་གྱི་ཁྲིམས། རྒྱལ་སྤྱིའི་མེག་ནི་སི་ཀི་ཁྲིམས་ལ་སོགས་ཡིན། དེ་བཞིན་ཡུ་རོབ་མཐུན་ཚོགས་ཀྱིས་ཀྱང་མེག་ནི་སི་ཀི་ཁྲིམས་གཏན་འབེབས་དང་། ཡོ་རོབ་མཐུན་ཚོགས་དང་རྒྱ་ནག་བར་གྱི་ཡོངས་ཁྱབ་མ་འཛུགས་གྲོས་མཐུན་གནས་སྐབས་ཕྱིར་བསྡུ་གནང་བ་སོགས་ཀྱིས་རྒྱ་ནག་གི་ཁ་གཏད་དུ་འགྲོ་བའི་ལས་གཞི་བརྩམས་ཡོད། སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཡོ་རོབ་མཐུན་ཚོགས་ངོས་ནས་རྒྱ་ནག་གི་ཁྱད་ཆོས་ལྡན་པའི་ལམ་ལུགས་ཀྱི་དབང་བསྒྱུར་འགོག་ཆེད་ཡོ་རོབ་མཐུན་ཚོགས་ཀྱི་ལངས་ཕྱོགས་སྔར་བས་བརྟན་དུ་གཏོང་བའི་རེ་བ་གནང་ཡོད།

ཚོགས་འདུའི་ནང་སྐུ་ཚབ་རྣམ་གཉིས་ནས་དཀའ་ངལ་འཕྲད་པའི་སྐབས་མཉམ་རུབ་ཐོག་ཕྱག་ལས་གནང་རྒྱུར་མོས་མཐུན་གནང་ཡོད། སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་ཕྱི་ལོ་ ༢༠༢༡ ཟླ་བ་ ༡༢ ནང་པེ་རི་སིར་ཐའེ་ཝན་གཞུང་ཚབ་ཧྤ་རན་ཀོ་ཡི་སི་ཆི་ཆུང་ཝུ་ (Francoise Chih-Chung Wu) ལགས་ཀྱང་མཇལ་འཕྲད་གནང་ཡོད་པ་རེད། 

ད་ཐེངས་ཀྱི་མཇལ་འཕྲད་སྐབས་སྐུ་ཚབ་དོན་གཅོད་དང་ལྷན་དུ་སྐུ་ཚབ་དོན་ཁང་གི་ཡོ་རོབ་མཐུན་ཚོགས་ཞུ་གཏུག་འགན་འཛིན་རིག་འཛིན་ཆོས་སྒྲོན་ལགས་དང་། སྐུ་ཚབ་ཚའི་ལྷན་དུ་ཐའེ་ཝན་ལས་ཁུངས་ཀྱི་ལས་བྱེད་གཉིས་བཅར་ཡོད་པ་བཅས།།