༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་ཕྱི་ལོ་ ༢༠༢༡ ཟླ་བ་ ༡༡ ནང་ཅེཀ་སྤྱི་མཐུན་རྒྱལ་ཁབ་ཀྱི་སྲིད་བློན་པེ་ཊར་ཕི་ཡ་ལ་མཆོག་སྲིད་བློན་དུ་བདམས་ཐོན་བྱུང་བར་འཚམས་འཕྲིན་གནང་བར་ཕྱི་ལོ་ ༢༠༢༢ ཟླ་བ་ ༡ ཚེས་ ༡༩ ཉིན་སྲིད་བློན་ཕི་ཡ་ལ་མཆོག་གི་ལས་ཁུངས་ནས་འཕྲིན་ལན་ཞིག་གནང་སྟེ་ཐུགས་རྗེ་ཆེ་ཞུས་གནང་ཡོད།

དེ་ཡང་ཕྱག་བྲིས་འཁོད་དོན། སྲིད་བློན་པེ་ཊར་ཕི་ཡ་ལ་ (Petr Fiala) མཆོག་སྲིད་བློན་དུ་བདམས་ཐོན་བྱུང་བར་འཚམས་འཕྲིན་གནང་བར་ངས་ཁོང་གི་ཚབ་ཞུས་ཏེ་སྐུ་ཉིད་ལ་ཐུགས་རྗེ་ཆེ་ཞུ་རྒྱུ་ཡིན། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་ང་ཚོའི་སྲིད་འཛིན་ཟུར་པ་ཝ་ཀ་ལབ་ཧ་ཝེལ་ (Vaclav Havel) མཆོག་བར་གྱི་སྐུ་ཚེ་གཅིག་རིང་གི་མཛའ་འབྲེལ་ལ་བརྟེན་ནས་གྲུབ་པའི་ཅེཀ་མི་མང་དང་བོད་མི་བར་གྱི་འབྲེལ་བར་སྲིད་བློན་ཕི་ཡ་ལ་མཆོག་གིས་བརྩི་མཐོང་ཆེན་པོ་གནང་གི་ཡོད། ང་ཚོའི་སྲིད་གཞུང་གིས་རང་དབང་དང་། མང་གཙོ། འགྲོ་བ་མིའི་ཐོབ་ཐང་། ཁྲིམས་ཀྱི་དབང་བསྒྱུར་གོང་སྤེལ་གཏང་རྒྱུ་གཞི་རྩར་བཞག་པའི་ཐོག་བཀུར་འོས་མི་སྣ་གཉིས་ཀྱི་མཛད་རྗེས་ཀྱི་རྗེས་སུ་འབྲང་གི་ཡོད། ལམ་སྲོལ་དེ་དག་གཞིར་བཟུང་སྲིད་གཞུང་གསར་པའི་ངོས་ནས་རྒྱ་གར་དང་ཞི་བདེའི་རྒྱ་མཚོའི་མངའ་ཁུལ་བློ་མཐུན་མང་གཙོའི་རྒྱལ་ཁབ་ཁག་དང་ལྷན་དུ་འབྲེལ་ལམ་བཟང་དུ་གཏང་རྒྱུ་དམ་བཅའ་བརྟན་པོ་འདུག 

སྐུ་ཉིད་ཀྱི་ཕྱག་བྲིས་ནང་ང་ཚོའི་རྒྱལ་ཁབ་ཀྱིས་བོད་རང་དབང་འཐབ་རྩོད་ཐོག་བློ་སྤོབས་སྤེལ་ཡོད་སྐོར་བཀོད་གནང་འདུག དེར་ང་ཚོ་སྤོབས་པ་ཡོད་ལ་སླད་མར་མུ་མཐུད་རང་དབང་དང་འགྲོ་བ་མིའི་ཐོབ་ཐང་ཞི་བའི་ངང་འཐབ་རྩོད་གནང་མཁན་ཡོངས་ལ་བློ་སྤོབས་སྤེལ་རྒྱུ་ཡིན། གང་ཡིན་ཞེ་ན། ང་ཚོས་རང་དབང་གི་འཐབ་རྩོད་ག་ཚོད་ཐག་རིང་པོ་ཡོད་པ་དང་ཇི་ལྟར་དཀའ་ཚེགས་ཆེན་པོ་ཡོད་མེད་ཤེས་ཀྱི་ཡོད། ཅེས་བཀོད་གནང་འདུག །