༄༅། །ཕྱི་ལོ་ ༢༠༢༢ ཟླ་ ༡ ཚེས་ ༢༥ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་གསར་དུ་བདམས་ཐོན་བྱུང་བའི་ཡུ་རོབ་གྲོས་ཚོགས་ཀྱི་ཚོགས་གཙོ་ལྕམ་སྐུ་རོ་བྷར་ཊཱ་མེཊ་སོ་ལཱ་ (Ms. Roberta Metsola) མཆོག་ལ་དགའ་བསུའི་འཚམས་འཕྲིན་ཞིག་ཕུལ་བའི་ནང་འཁོད་དོན། སྐུ་ཉིད་ཡུ་རོབ་གྲོས་ཚོགས་ཀྱི་ཚོགས་གཙོར་བདམས་ཐོན་བྱུང་བར་ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་ལྕམ་སྐུ་མཆོག་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཡུ་རོབ་གྲོས་ཚོགས་ནི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ལ་ཡུན་རིང་འབྲེལ་བ་གཏིང་ཟབ་ཡོད་པས་ང་ཚོར་བཀའ་དྲིན་ཤིན་ཏུ་ཆེན་པོ་ཡིན།
ལྷག་པར་ཡུ་རོབ་གྲོས་ཚོགས་ཀྱི་ངོས་ནས་མང་གཙོ་དང་འགྲོ་བ་མིའི་ཐོབ་ཐང་སྲུང་སྐྱོབ་སླད་དུ་ཞབས་འདེགས་སྒྲུབ་རྒྱུའི་ཆོད་སེམས་བརྟན་པོ་ཡོད་པ་དེས་བོད་མི་རྣམས་ཚུད་པའི་མི་མང་པོར་རེ་བའི་འོད་སྣང་ལྟ་བུ་སྦྱིན་ཡོད། དེ་རིང་ཁང་སང་བོད་ནང་རྒྱ་ནག་གཞུང་གིས་བོད་མིའི་ཆོས་དང་། རིག་གཞུང་། ངོ་བོ་དང་བཅས་པར་དྲག་གནོན་བྱས་དང་བྱེད་བཞིན་ཡོད་སྟབས། བོད་མི་རྣམས་ལ་སྔར་ལས་ལྷག་ཡུ་རོབ་གྲོས་ཚོགས་དང་རྒྱལ་སྤྱིའི་ཚོགས་སྡེ་ཁག་གི་རྒྱབ་སྐྱོར་དགོས་མཁོ་ཡོད་པ་ཆགས་ཡོད།
ང་ཚོས་ལྕམ་སྐུ་མཆོག་གི་དབུ་ཁྲིད་འོག་ཡུ་རོབ་གྲོས་ཚོགས་ཀྱི་ངོས་ནས་མུ་མཐུད་བོད་རྒྱའི་དཀའ་རྙོག་སེལ་ཐབས་སུ་རྒྱབ་སྐྱོར་ཤུགས་ཆེ་གནང་སྟེ་བོད་ནང་གི་བོད་མིའི་དཀའ་སྡུག་སེལ་ཐབས་སུ་གཞོགས་འདེགས་གནང་བའི་རེ་བ་ཞུ་བཞིན་ཡོད། སླར་ཡང་ངས་ལྕམ་སྐུ་མཆོག་ལ་སྙིང་ཐག་པ་ནས་འཚམས་འདྲི་དང་བཀྲ་ཤིས་བདེ་ལེགས་ཞུ་རྒྱུ་ཡིན། ཞེས་འཁོད་ཡོད།།