༄༅། །ཕྱི་ལོ་ ༢༠༢༢ ཟླ་ ༠༡ ཚེས་ ༢༥ རེས་གཟའ་མིག་དམར་ཉིན་ཆེས་མཐོའི་ཁྲིམས་ཞིབ་ཁང་གི་སྲོང་བཙན་ཚོམས་ཆེན་དུ་དཔལ་ལྡན་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག་གི་མདུན་དུ་ཟུང་དྲུང་པདྨ་བཟང་པོ་ལགས་ཀྱིས་ལ་དྭགས་ས་གནས་འཕྲལ་སེལ་ཁྲིམས་ཞིབ་པའི་ལས་ཁུར་དམ་བཅའ་འབུལ་བཞེས་ཀྱི་མཛད་སྒོ་ཞིག་ཚོགས་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་དཔལ་ལྡན་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག་དང་། སྤྱི་ཁྱབ་ཁྲིམས་དྲུང་ཡེ་ཤེས་དབང་མོ་ལགས། གཞན་ཡང་འབྲེལ་ཡོད་ལས་བྱེད་བཅས་ཚང་འཛོམས་ཀྱི་ཐོག་མར་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག་གིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་༧སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་དོད་འདེགས་འབུལ་ཞུས་གྲུབ་མཚམས་ཟུང་དྲུང་པདྨ་བཟང་པོ་ལགས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་༧སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་དོད་འདེགས་འབུལ་ཞུས་ཏེ་ཁྲིམས་ཞིབ་པ་ཆེ་བའི་ལས་ཚབ་མཆོག་གི་དྲུང་དུ་ལས་ཁུར་དམ་བཅའ་འབུལ་བཞེས་གྲུབ་མཚམས་ཁྲིམས་ཞིབ་པ་ཆེ་བའི་ལས་ཚབ་མཆོག་གིས་རྟེན་འབྱུང་མཇལ་དར་སྒྲོན་འབུལ་གནང་།

དེ་ནས་རྟེན་འབྱུང་གསོལ་ཇ་དང་འབྲས་སིལ་ཕུལ་ཏེ་སྤྱི་ཁྱབ་ཁྲིམས་དྲུང་ཡེ་ཤེས་དབང་མོ་ལགས་ཀྱིས་འཕྲལ་སེལ་ས་གནས་ཁྲིམས་ཞིབ་པ་པདྨ་བཟང་པོ་ལགས་ལ་རྟེན་འབྱུང་མཇལ་དར་བསྒྲོན་ཏེ་དམ་འབུལ་མཛད་སྒོ་ལེགས་པར་གྲོལ་ཡོད།པདྨ་བཟང་པོ་ལགས་ནི། ལ་དྭགས་བསོད་ནམས་གླིང་གི་ལ་བྱང་ས་ཁུལ་བྱང་ཐང་ཧན་ལེ་རུ་སྐྱེས་ཤིང་། འཛིན་རིམ་བཅུ་པ་བར་ལ་དྭགས་བོད་ཁྱིམ་སློབ་གྲྭ་དང་། འཛིན་རིམ་བཅུ་གཉིས་བར་སྦེལ་ཀོབ་བོད་ཁྱིམ། འཛིན་རིམ་བཅུ་གཉིས་རྒྱལ་ཡོངས་ཡིག་རྒྱུས་ནང་བརྒྱ་ཆ་༨༧་༥ ལོན་འབྲས་སུ་སྦེང་ལོར་རུ་རྟེན་གཞི་བྱས་པའི་མཐོ་སློབ་གྲགས་གྲས་སན་ཊི་ཇོ་སེ་ཧྥི་ཚོང་རིག་མཐོ་སློབ་(St.Joseph College of Commerce) ནས་ཚོང་རྩིས་སློབ་སྦྱོང་ཐོག་ཉེ་བའི་གཙུག་ལག་རབ་འབྱམས་པ་ཐོན། དེ་ནས་ལྡི་ལི་རུ་ཟླ་དྲུག་རིང་ཀམ་པུ་ཊར་ཐོག་སློབ་སྦྱོང་བྱས། ཕྱི་ལོ་༢༠༡༣ ཟླ་༥ ནས་༨ བར་ཟླ་གསུམ་རིལ་འཕྲལ་སེལ་ངོ་བོའི་ཐོག་ལ་དྭགས་བོད་མིའི་ས་གནས་ཁྲིམས་ཞིབ་ཁང་གི་ཁྲིམས་དྲུང་དང་རྩིས་པ་གཅིག་ལྕོགས་སུ་བསྐོ་གཞག་གནང་བ་བཞིན་ལས་འཁུར་ཞུས། ཆེས་མཐོའི་ཁྲིམས་ཞིབ་ཁང་ནས་ལ་དྭགས་ས་གནས་ཁྲིམས་དྲུང་གསར་འདེམས་གསལ་བསྒྲགས་གནང་བ་བཞིན་འཚང་སྙན་ཕུལ་པར་ཡིག་རྒྱུགས་འཕྲོད་རྗེས་ཕྱི་ལོ་ ༢༠༡༣ ཟླ་༨ ཚེས་༡༦ ནས་དྲུང་གཞོན་གནས་རིམ་ཐོག་ལ་དྭགས་བོད་མིའི་ས་གནས་ཁྲིམས་ཞིབ་ཁང་གི་ཁྲིམས་དྲུང་དང་རྩིས་པ་གཅིག་ལྕོགས་བསྐོ་གཞག་གནང་།ཕྱི་ལོ་ ༢༠༡༧ ཟླ་༡༢ ཚེས་ ༡༩ ཉིན་ནང་སྲིད་ལས་ཁུངས་ཀྱི་དྲུང་གཞོན་དུ་གནས་སྤོས་ལས་འགན་བཀོད་སྒྲིག་ཞུས་པར་ནང་སྲིད་ལས་ཁུངས་སུ་ལས་དོན་ཞུས་པའི་རིང་འཛིན་གཞིས་དང་ནང་ཞིབ་ཚན་པའི་འགན་འཛིན་ལས་འཁུར་ཞུས། ཕྱི་ལོ་ ༢༠༢༡ ཟླ་༥ ཚེས་ ༡ ཉིན་ནས་ཟུང་དྲུང་དུ་གནས་སྤར་གྱིས་ནང་སྲིད་ལས་ཁུངས་སུ་ལས་འགན་རང་འཇགས་ཐོག་བཀོད་སྒྲིག་ཞུས། ཕྱི་ལོ་ ༢༠༢༡ ཟླ་ ༧ ཚེས་༡ ནས་ཆེས་མཐོའི་ཁྲིམས་ཞིབ་ཁང་གི་ཟུང་དྲུང་དུ་གནས་སྤོས་ལས་འགན་བཀོད་སྒྲིག་གནང་བ་བཞིན་ལས་དོན་ཞུ་མུས་ཡིན་པར་ད་ལམ་དཔལ་ལྡན་ཆེས་མཐོའི་ཁྲིམས་ཞིབ་ཁང་ནས་ལ་དྭགས་བོད་མིའི་ས་གནས་ཁྲིམས་ཞིབ་ཁང་དུ་ཁྲིམས་ལུགས་རིག་པ་བའི་ཁྲིམས་ཞིབ་པ་ཞིག་གསར་བསྐོ་མ་བྱུང་བར་འཕྲལ་སེལ་ཐོག་ལ་དྭགས་བོད་མིའི་ས་གནས་ཁྲིམས་ཞིབ་པར་གནས་སྤོས་བསྐོ་གཞག་གནང་ཡོད།

མདོ་དོན་ད་བར་པདྨ་བཟང་པོ་ལགས་ཀྱིས་བོད་མིའི་སྒྲིག་འཛུགས་ཀྱི་ཁྲིམས་ལུགས་དབང་འཛིན་གྱི་ཆེས་མཐོའི་ཁྲིམས་ཞིབ་ཁང་དང་དེའི་ཁྱབ་ཁོངས་ས་གནས་ཁྲིམས་ཞིབ་ཁང་ལ་ལོ་ལྔ་མ་ཟིན་ཙམ་དང་འཛིན་སྐྱོང་ནང་སྲིད་ལས་ཁུངས་སུ་ལོ་གསུམ་དང་ཟླ་གྲངས་བརྒྱད་བཅས་ཁྱོན་ད་བར་ལོ་བརྒྱད་ལྷག་ཞབས་ཕྱི་ཞུས་འདུག་པར་བཞིན་མུ་མཐུད་སྲི་ཞུ་སྒྲུབ་མུས་ཡིན་པ་བཅས།།