༄༅། །རུ་སོག་སྐུ་ཚབ་དོན་ཁང་དང་། བོད་སྐྱོབ་དགེ་རྩ་ཚོགས་པ། འབྲས་སྤུངས་ཐེབས་རྩ་བཅས་ཐུན་མོང་གི་གོ་སྒྲིག་འོག་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཅན་གྱི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༢ འཁོར་བའི་དུས་ཆེན་གྱི་མཛད་སྒོ་སྲུང་བརྩི་གཟབ་རྒྱས་ཞུས་ཡོད།

དུས་ཆེན་སྲུང་བརྩི་མཛད་སྒོར་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་གིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་པའི་དུས་ཆེན་འདི་བཙན་བྱོལ་བོད་མི་རྣམས་ཀྱིས་སྲུང་བརྩི་ཞུ་ཡི་ཡོད་པ་ཙམ་མ་ཟད། དུས་ཆེན་འདི་རང་དབང་དང་། ཞི་བདེ། འགྲོ་བ་མིའི་ཐོབ་ཐང་། དྲང་བདེན་སོགས་ཀྱི་སླད་དུ་འཐབ་རྩོད་བྱེད་བཞིན་པ་རྣམས་ལའང་དམིགས་བསལ་ཅན་ཞིག་ཆགས་ཡོད། གོ་སྐབས་འདི་དང་བསྟུན་ངས་འདི་ལོའི་ནོ་སྦེལ་ཞི་བདེའི་གཟེངས་རྟགས་ཐོབ་མཁན་སྐུ་ཞབས་མུ་ར་ཊོབ་ (Dmitry Muratov) ལགས་ལའང་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།  

སྐུ་ཞབས་མུ་ར་ཊོབ་ལགས་ཨུ་རུ་སུ་ནང་འཁྲུངས་ཤིང་། ཁོང་གིས་སྨྲ་བརྗོད་རང་དབང་སྲུང་སྐྱོབ་སླད་དུ་འཐབ་རྩོད་གནང་དང་གནང་མུས་ཡིན་ལ། མང་གཙོ་དང་མཐར་ཐུག་གི་ཞི་བདེ་ཡོང་བར་སྨྲ་བརྗོད་རང་དབང་ནི་སྔོན་འགྲོའི་ཆ་རྐྱེན་ལྟ་བུ་ཆགས་ཡོད། ང་ཚོར་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་འདི་ལོའི་ནོ་སྦེལ་ཞི་བདེའི་གཟེངས་རྟགས་ཐོབ་མཁན་ཨུ་རུ་སུ་ནས་ཡིན་པའི་སྐུ་ཞབས་མུ་ར་ཊོབ་ལྟ་བུ་ཡོད་པ་ནི་ཧ་ཅང་གཟི་བརྗིད་དང་སྤོབས་པ་ཡོད། ཅེས་གསུངས།བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་འཛམ་གླིང་ནང་ཆེས་སྙན་གྲགས་ཅན་གྱི་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༢ འཁོར་བའི་དུས་ཆེན་གྱི་མཛད་སྒོ་དེ་བཞིན་མོ་སི་ཁོར་རྟེན་གཞི་བྱས་པའི་བོད་མིའི་འཕྲོད་བསྟེན་སྨན་ཁང་ (Center of Tibetan Health) གི་ཚོགས་ཁང་དུ་ཚོགས་ཡོད་པ་དང་། སྐབས་དེར་ཚོགས་བཅར་བ་ཡོངས་ནས་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་༸ཞབས་པད་བསྐལ་བརྒྱར་བརྟན་སླད་སྨོན་ལམ་གསུང་འདོན་དང་མཎྜལ་རྟེན་གསུམ། ཚོགས་བཅས་ཕུལ་ཏེ་དུས་ཆེན་སྲུང་བརྩི་གཟབ་རྒྱས་ངང་ཞུས་ཡོད་པ་བཅས།།