༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༡༡ ཉིན་ཨིན་ཡུལ་གྱི་རྒྱལ་ས་ལོན་ཊོན་དང་། བྲྀས་ཊོལ། (Bristol) ལཱིཊ། (Leeds) བཱོར་ནི་མ་ཧུཊ་ (Bournemouth) བཅས་ཀྱི་བོད་མི་རྣམས་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ནོ་ཝེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༢ འཁོར་བའི་དུས་ཆེན་སྲུང་བརྩི་ཞུས་ཡོད།

དེ་ཡང་ལོན་ཊོན་ནང་ཡོད་པའི་བོད་མི་རྣམས་ཀྱིས་ལོན་ཊོན་དབུས་སུ་ཆགས་པའི་ཨུ་བྷེཊ་ཀོཊ་ཚོགས་ཁང་ (Aubert Court Community Centre) དུ་རིག་གཞུང་འཁྲབ་སྟོན་དང་། ༧སྐྱབས་མགོན་རིན་པོ་ཆེའི་སྐོར་རྩོམ་ཡིག་སྒྲོགས་སྦྱང་། འདྲི་གླེང་འགྲན་སྡུར་གོ་སྒྲིག་གནང་ཡོད་པ་མ་ཟད། ཤིང་སྣ་འདེབས་འཛུགས་ཀྱི་ལས་འགུལ་ཡང་སྤེལ་འདུགམཛད་སྒོའི་སྐུ་མགྲོན་གཙོ་བོ་ཨིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་འཚམས་འདྲི་དང་སྦྲགས། ཕྱི་ལོ་ ༡༩༨༩ ལོར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ནོ་ཝེལ་ཞི་བདེའི་གཟེངས་རྟགས་འབུལ་བཞེས་མཛད་པ་ལ་བརྟེན་ནས་བོད་ཀྱི་རྩ་དོན་རྒྱལ་སྤྱིའི་སྡིངས་ཆ་སྟེང་སླེབས་ཐུབ་པ་བྱུང་ཡོད་སྐོར་དང་། སྐུ་ཚབ་དོན་གཅོད་ངོས་ནས་པེ་ཅིང་དགུན་ཁའི་ཨོ་རྩེད་འགྲན་ཚོགས་དང་འབྲེལ་བའི་གནད་དོན་ཞུ་གཏུག་སླད་གྲོས་ཚོགས་འཐུས་མི་དང་ཕྱི་སྲིད་ལྷན་ཁང་ལ་འབྲེལ་བ་ཞུ་གི་ཡོད་སྐོར་གསུངས།

ཕྱོགས་མཚུངས་ཁོང་གིས་འཛམ་གླིང་ཁྱོན་ཡོངས་སུ་བོད་དོན་ཞུ་གཏུག་ལས་འགུལ་སྔར་ལྷག་ཤུགས་ཆེ་གཏོང་སླད་ཉེ་ལམ་བོད་མིའི་སྒྲིག་འཛུགས་ཀྱིས་དབུ་འཛུགས་གནང་བའི་དང་བླངས་བོད་དོན་ཞུ་གཏུག་ལས་གཞིར་ཨིན་ཡུལ་ནང་ཡོད་པའི་བོད་མི་རྣམས་ནས་དྲ་ཐོག་བརྒྱུད་ཐོ་འགོད་ཀྱིས་འཛུལ་ཞུགས་གནང་རོགས་ཞེས་འབོད་སྐུལ་གནང་འདུག 

མཛད་སྒོར་སྤྱི་ཟུར་ལྷ་མོ་སྐྱབས་ལགས་དང་། ཨིན་ཡུལ་སྐུ་ཚབ་དོན་གཅོད་ཟུར་པ་ཚེ་རིང་བཀྲ་ཤིས་ལགས་དང་། ཨིན་ཡུལ་སྐུ་ཚབ་དོན་གཅོད་ཁང་གི་ལས་བྱེད་རྣམས་ཀྱང་མཉམ་ཞུགས་གནང་ཡོད་པ་བཅས།།