༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༡༧ ཉིན་ཨ་རིའི་གྲོས་ཚོགས་གོང་མས་སྐུ་ཞབས་ར་ཤིཊ་ཧུ་སེན་ (Rashad Hussain) ལགས་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་ཏུ་བསྐོ་བཞག་གནང་རྒྱུའི་ཐག་གཅོད་གནང་འདུག ར་ཤེཊ་ཧུ་སེན་ལགས་སུ་ཨ་རིའི་གྲོས་ཚོགས་གོང་མའི་ནང་རྒྱབ་སྐྱོར་འོས་གྲངས་ ༨༥ དང་། དགག་པའི་འོས་གྲངས་ ༥ བྱུང་སྟེ་ཁོང་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་གསར་པར་བསྐོ་བཞག་བྱུང་འདུག 

ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་ཟུར་པ་སྐུ་ཞབས་སཱམ་བྲ་ཧོན་བེཀ་ (Sam Brownback) ལགས་ཀྱིས་ཐག་གཅོད་དེ་དང་སྲིད་དོན་ཚོགས་པ་གཉིས་འབྲེལ་གྱི་མང་མོས་ལ་བསྔགས་བརྗོད་ཞུ་བཞིན་གསུང་དོན། འཛམ་གླིང་ཁྱོན་ཡོངས་སུ་ཆོས་ལུགས་ལ་སྡང་འཛིན་ཁྱབ་གདལ་འགྲོ་བཞིན་པའི་སྐབས་འདིར། འཛམ་གླིང་མི་མང་གིས་དཀའ་སེལ་སླད་ཨ་རིའི་དབུ་ཁྲིད་ལ་རོགས་མགོན་བཅོལ་གྱི་ཡོད་ཅེས་གསུངས། ཨ་རིའི་སྲིད་འཛིན་སྐུ་ཞབས་ཇོ་བཱཡི་ཌེན་ (Joe Biden) མཆོག་གིས་ཕྱི་ལོ་ ༢༠༢༡ ཟླ་ ༡༠ ནང་ཐེངས་དང་པོ་ཁ་ཆེ་བ་ཞིག་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་ཏུ་མིང་འདོན་གནང་རྗེས། སྐུ་ཞབས་ཧུ་སེན་མཆོག་གིས་རྒྱ་ནག་ལྷན་དུ་ཕྱི་འབྲེལ་དང་ཚོང་འབྲེལ་གྱི་གྲོས་མོལ་ཁྲོད་ཆོས་དད་རང་དབང་གི་གནད་དོན་དེ་བློས་གཏོང་ནམ་ཡང་བྱ་རྒྱུ་མིན་པའི་ཞལ་བཞེས་གནང་ཡོད། ཡུ་གུར་མི་རིགས་སྡེབ་གསོད་དང་འབྲེལ་ནས་ཨ་རི་གཞུང་གི་ལན་འདེབས་ཇི་ཡིན་ཐད་བཀའ་འདྲི་ཞུས་པར་ཁོང་གིས་རྒྱ་ནག་གཞུང་ནི་འཛམ་གླིང་ཁྱོན་ཡོངས་ནས་ཆོས་དད་རང་དབང་རྡོག་རོལ་གཏོང་མཁན་སྡུག་ཤོས་ཡིན་ཞེས་ལན་འདེབས་གནང་ཡོོད། ཧུ་སེན་མཆོག་གིས་ཡུ་གུར་ཙམ་མ་ཡིན་པར་བོད་མི་དང་། ཡེ་ཤུ་རྗེས་འབྲང་པའི་རྒྱ་རིགས། ཆོས་འཁོར་སྒོམ་སྒྲུབ་ (Falun Gong) ཉམས་ལེན་པ་རྣམས་ཀྱི་དཀའ་སྡུག་སེལ་ཆེད་ཨ་རིས་རྒྱ་ནག་གཞུང་ལ་གནོན་ཤུགས་སྤྲོད་དགོས་སྐོར་གསུངས། 

བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་གྲུབ་ལགས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་ཚབ་ཞུས་ཏེ། ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་གསར་པ་ར་ཤིཊ་ཧུ་སེན་མཆོག་ལ་འཚམས་འདྲི་ཞུས་པ་དང་སྦྲགས། གཞུང་ཚབ་མཆོག་དང་ལྷན་དུ་བོད་དང་། ཤར་ཏུར་ཀིསྠན། ལྷོ་སོག ཧོང་ཀོང་། རྒྱ་ནག་སྐམ་ས་ཆེན་པོར་ཆོས་དད་རང་དབང་ཡོང་ཆེད་མཉམ་ལས་གནང་འཆར་ཡོད་སྐོར་གསུངས་འདུག 

དེ་བཞིན་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་ཀྱིས་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་ཟུར་པ་སཱམ་བྲ་ཧོན་བྲེཀ་ལགས་ཀྱིས་བོད་ནང་ཆོས་དད་རང་དབང་ཆེད་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་འདུག རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་ཟུར་པ་ཁོང་ཕྱི་ལོ་ ༢༠༡༩ ཕྱི་ཟླ་ ༡༠ ནང་དྷརྨ་ཤཱ་ལཱར་ཆེད་ཕེབས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམས་དང་མཇལ་འཕྲད་གནང་ཡོད་པ་བཅས།།