༄༅། །ཕྱི་ལོ་ ༢༠༢༡ ཟླ་ ༡༢ ཚེས་ ༢ ཉིན་ཨ་རིའི་ཕྱི་སྲིད་ལྷན་ཁང་གི་དྲུང་ཆེ་གཞོན་པ་ལྕམ་སྐུ་ཝན་ཌེ་ཤར་མན་ (Wendy R Sherman) ལགས་དང་ཡུ་རོབ་སྤྱི་མཐུན་ཚོགས་པའི་ཕྱི་སྲིད་སྤྱི་ཁྱབ་དྲུང་ཆེ་སྐུ་ཞབས་སི་ཊེ་ཧྥ་ནོ་སན་ནི་ནོ་ (Stefano Sannino) ལགས་དབར་རྒྱ་ནག་དང་འབྲེལ་བའི་མཐོ་རིམ་གཉིས་པའི་གྲོས་མོལ་ཚོགས་འདུ་ཚོགས་ཏེ་བསྒྲགས་གཏམ་ཞིག་སྤེལ་ཡོད་པ་དང་། བསྒྲགས་གཏམ་དེའི་ནང་ཨ་རི་དང་ཡུ་རོབ་སྤྱི་མཐུན་ཚོགས་པས་ཕྱོགས་གཉིས་ཀའི་ཕྱི་སྲིད་ཀྱི་གནད་དོན་གྱིས་གཙོས་གནད་དོན་གཞན་ཁག་གཅིག་གི་སྐོར་གྲོས་བསྡུར་གནང་ཡོད་པ་མ་ཟད། རྒྱ་ནག་གཞུང་གིས་བོད་ནང་འཆར་གཞི་ལྡན་པའི་སྒོ་ནས་བོད་མིར་དྲག་གནོན་དང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་སྐོར་ལའང་གྲོས་བསྡུར་གནང་ཡོད་པ་རེད།

གཞན་ཡང་ཨ་རི་དང་ཡུ་རོབ་སྤྱི་མཐུན་ཚོགས་པས་རྒྱ་ནག་གཞུང་གིས་རྒྱལ་སྤྱིའི་ཁྲིམས་དང་། དེ་བཞིན་ཨ་རི་དང་ཡུ་རོབ་སྤྱི་མཐུན་ཚོགས་པ་གཉིས་ཀྱི་གཞི་རྩའི་རིན་ཐང་དང་ཁེ་ཕན་ལ་རྩིས་མེད་གཏོར་བཤིག་གཏོང་བཞིན་པའི་ཐད་ཨ་རི་དང་ཡུ་རོབ་སྤྱི་མཐུན་ཚོགས་པས་ཐུགས་འཚབ་གནང་གི་ཡོད་པ་སོགས་ཀྱི་སྐོར་གྲོས་བསྡུར་གནང་འདུག

ཕྱོགས་མཚུངས་ཨ་རིའི་ཕྱི་སྲིད་ལྷན་ཁང་གི་དྲུང་ཆེ་གཞོན་པ་ལྕམ་སྐུ་ཝན་ཌེ་ཤར་མན་ལགས་དང་ཡུ་རོབ་སྤྱི་མཐུན་ཚོགས་པའི་ཕྱི་སྲིད་སྤྱི་ཁྱབ་དྲུང་ཆེ་སྐུ་ཞབས་སི་ཊེ་ཧྥ་ནོ་སན་ནི་ནོ་ལགས་རྣམ་གཉིས་ཀྱིས་མུ་མཐུད་ཕྱི་ལོ་ ༢༠༢༢ ལོའི་ལོ་དཀྱིལ་དུ་ཕྱོགས་གཉིས་ཀྱི་མཐོ་རིམ་ལས་བྱེད་རྒན་པ་དང་ཁྱད་མཁས་མི་སྣ་དབར་གྲོས་མོལ་གྱི་ཚོགས་འདུ་འཚོགས་རྒྱུའི་ཐག་གཅོད་གནང་ཡོད་པ་བཅས།།