༄༅། །འདི་གར་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༡ ཟླ་ ༡༢ ཚེས་ ༡༥ ཉིན་གྱི་སྔ་དྲོར་འཕྲོད་བསྟེན་ལས་ཁུངས་ཀྱི་སྨན་བཅོས་ལྟ་སྐྱོང་སྡེ་ཚན་ནས་ས་གནས་འགོ་འཛིན་དང་། སྨན་ཁང་འགན་འཛིན། སྨན་བཅོས་ལྟ་སྐྱོང་གི་འབྲེལ་ཡོད་ལས་བྱེད་བཅས་ལ་སྨན་བཅོས་ལྟ་སྐྱོང་ལས་གཞིའི་ཚོགས་མི་དམིགས་ཚད་སོགས་དང་འབྲེལ་བའི་དྲ་ལམ་བརྒྱུད་ཚོགས་འདུ་བསྐོང་ཚོགས་གནང་ཡོད། 

དེ་ཡང་ཚོགས་འདུའི་སྟེང་བོད་མིའི་སྒྲིག་འཛུགས་ཀྱི་འཕྲོད་བསྟེན་དྲུང་ཆེ་དཔལ་ལྡན་དོན་གྲུབ་ལགས་ཀྱིས་འཚམས་འདྲི་དང་འབྲེལ་སྨན་བཅོས་ལྟ་སྐྱོང་ལས་གཞིའི་བྱུང་རིམ་ལོ་རྒྱུས་དང་འཕེལ་རིམ། ད་ལྟའི་གནས་སྟངས་སོགས་ཀྱི་སྐོར་ངོ་སྤྲོད་དང་སྦྲགས་ས་གནས་ས་ཐོག་ཏུ་མི་མང་ལ་གོ་རྟོགས་དང་ཚོགས་མི་གང་མང་སྨན་བཅོས་ལྟ་སྐྱོང་ལས་གཞིའི་ནང་འཛུལ་ཞུགས་ཡོང་ཐབས་དགོས་པའི་ལམ་སྟོན་གནང་གྲུབ་མཚམས་སྨན་བཅོས་ལྟ་སྐྱོང་ལས་གཞིའི་འགན་འཛིན་གུ་རུ་ཉི་མ་ལགས་ཀྱིས་གནད་དོན་གསུམ་གྱི་ཐོག་ངོ་སྤྲོད་དང་ཚོགས་མི་འཛུལ་ཞུགས་ཀྱི་གྲངས་འབོར་འཕེལ་སྐྱེད་ཡོང་ཐབས་འབོད་སྐུལ་ཞུས་གྲུབ་བསྟུན་ཕྱོགས་མཐའ་ཁག་ནས་མཉམ་ཞུགས་གནང་མཁན་ས་གནས་འགོ་འཛིན་གྱིས་གཙོས་འབྲེལ་ཡོད་ལས་བྱེད་རྣམས་ཀྱི་དྲི་བ་ཁག་ལ་སྨན་བཅོས་ལྟ་སྐྱོང་ལས་གཞིའི་ལས་བྱེད་རྣམས་ནས་ལན་འདེབས་དང་གསལ་བཤད་གནང་ཡོད།དེ་ནས་ཁྱད་ལས་པ་ཨ་ལོག་གྷུབ་ཏཱ་ (Mr. Aloke Gupta) ལགས་ཀྱིས་རྩིས་ལོ་ ༢༠༢༢་་༢༠༢༣ ལོའི་ནང་ས་གནས་སོ་སོའི་སྨན་བཅོས་ལྟ་སྐྱོང་ལས་གཞིའི་དམིགས་ཚད་རྩིས་བསྐོར་ཞུས་གནང་བ་དེ་བཞིན་འབྲེལ་ཡོད་ས་གནས་སོ་སོར་གོ་བསྡུར་གྱིས་ལམ་ནས་དམིགས་ཚད་གཏན་འབེབས་གནང་།

ཚོགས་འདུའི་ཐོག་ས་གནས་ཁག་ ༣༨ ནས་ས་གནས་འགོ་འཛིན་དང་སྨན་ཁང་འགན་འཛིན། འབྲེལ་ཡོད་ལས་བྱེད་བཅས་ཁྱོན་མི་གྲངས་ ༥༠ མཉམ་ཞུགས་གནང་ཡོད་པ་བཅས། །